4
Guy:
1 You know wat?! You look real good looking, Honey Girl!
Fo real kine, so good looking!
Yoa eyes behind yoa veil,
Dey look pretty, jalike dove eyes.
Yoa hair, az jalike da goats
Dat stay come down from Mount Gilead.
2 Yoa teets stay real white,
Jalike da sheeps dat come up
Afta you wash um inside da stream.
Now dey ready fo cut da wool from um.
Yoa uppa an lowa teet match
Jalike dey one twin.
No mo teet missing!
3 Yoa lips look jalike one dark red ribbon.
Real nice, yoa mout stay
Yoa cheeks behind yoa veil
Look jalike da two halfs a one pomagram.
4 Yoa neck look jalike da towa King David wen build,
Dat stay real strong.
Yoa necklace jalike da tousan shields dat hang on top dea,
All from da army guys dat fight.
5 Yoa two breases look nice, jalike two bebe deers,
Jalike dey twin bebe deers,
Dat go thru da lilies fo eat.
6 Befo da early morning wind come
An da shadows run away,
I goin go up da mountain wea get da myrrh,
An da hill wea get da incense.
7 Honey Girl, you look so beautiful all ova.
No mo notting look bad bout you.
8 Go come stay wit me, my bride,
No matta you stay far, Lebanon side!
No matta you gotta leave da top a Mount Amana,
O Mount Senir, o da top a Mount Hermon!
Go come by me from da place wea da lions stay,
An from da hills wea da leopards stay!
9 Eh sistah! You wen steal my heart, my bride!
Da firs time you look at me, you steal um,
Az was wen I see one string from yoa necklace.
10 Az real awesome, wen you make love to me, my bride!
You da one I love!
I feel mo good inside wen you make love to me,
Cuz az mo betta den wen I drink wine.
Yoa perfume smell mo betta den any kine spices.
11 Wen you kiss me, yoa lips sweet jalike honey, my bride.
Yoa tongue jalike milk an honey togedda.
Yoa clotheses smell good, jalike stuff from Lebanon.
12 Eh sistah! You jalike one garden dat stay all lock up ony fo me, my bride.
You jalike one puka wea plenny watta come out, dat stay lock up.
13 Yoa legs, jalike dey hide one park dat get plenny pomagram trees dea,
An da bestes kine fruits,
An henna flowas an nard perfume.
14 You jalike nard an saffron spice,
Calamus dat smell nice an cinnamon,
Wit all kine trees fo make incense,
Myrrh an aloe,
An all da bestes kine spices!
15 You jalike one fountain dat watta da gardens,
One puka wit plenny watta,
Dat come down from Lebanon.
16 Eh! North wind, wake up!
An you, south wind, come!
Go blow on top my garden
Fo da nice smell from da spices go all ova.
Wahine:
I like da one dat love me come hea inside his garden,
An taste da bestes kine fruits inside hea.