3
Da Main Leada Guys Fo Da Church
1 If one guy like come da main leada guy fo da church, fo shua dass one good ting.
2 Da main leada guy gotta do eryting da right way fo nobody poin finga him. He stay tight wit his one wife. He know how fo hold back wen he gotta hold back. He know how fo ack erytime, an he get one good rep fo do da right tings. He know how fo make peopo feel real good wen dey come his house. He know how fo teach peopo stuff.
3 He no get piloot. He no like beef wit odda guys, but he know how fo make nice to peopo. He no like make argue wit nobody. He no love money.
4 He handle his ohana real good. His kids lissen an show respeck fo him.
5 (Cuz you know, if get one guy dat donno how fo handle his ohana, how he goin take kea God church peopo?!)
6 Mo betta he trus God long time, den he no goin get big head bumbye. Cuz if he get big head, den God judge him jalike God goin judge da Devil.
7 He get one good rep wit da peopo dat no go church cuz a da way he ack. Den no mo notting goin make um come shame fo da Devil trap him.
Da Helpa Guys Fo Da Church
8 Da helpa guys fo da church, same ting. Dey gotta be solid kine peopo fo da odda peopo get respeck fo dem, an dey gotta mean wat dey tell. Dey betta not drink plenny an do shame kine stuff cuz dey greedy.
9 Dey know da kine stuff bout Jesus dat befo time was secret. Dey trus um, an stay shua dey do wass right in front God.
10 You gotta check um out real good firs fo know fo shua dey no do notting wrong. If dey do da right ting, den dey can come da helpa guys fo da church.
11 Da wahines dat help in da church, same ting. Dey gotta be solid kine peopo. Dey no talk bad bout odda peopo. Dey no drink plenny cuz dey gotta know how fo ack. Can trus um bout eryting.
12 Da helpa guys stay tight wit dea one wife. Dey gotta handle dea kids an dea ohana da right way.
13 Da guys dat awready stay helpa guys, an do one good job, erybody tink good bout dem. Dey no sked fo talk bout Jesus, da Spesho Guy God Wen Sen, cuz dey trus him real good.
Da Secret Stuff God Wen Show Us
14 Eh Timoty! I like go see you now, but I stay write dis stuff to you firs.
15 Cuz if I no can go right now, den you still goin know how da peopo inside God ohana gotta live. Da God dat stay alive foeva, his ohana, dass da church peopo. Da church peopo, dey make shua dey tell da true stuff God tell. Dey jalike da foundation an da main pos dat stay hold up da building.
16 We all tell dis: Da stuff bout God, dat befo time was secret, dass importan fo real kine.
Christ wen come,
Wit one body jalike us.
God Spirit wen show proof dat Christ stay right.
Da angel guys from God wen see him.
His guys wen teach
Da diffren peopos all ova da world bout him.
Get peopo inside da world dat trus him.
God wen take him back
To da awesome place inside da sky.