Zefaniah
Talk Fo God
1
Da One In Charge Tell How
Da Judah Peopo Goin Come Wipe Out
1 Da One In Charge give dis message to me, Zefaniah, Cushi boy, Gedaliah grankid, Amariah great-grankid, King Hezekiah great great-grankid. I pass on da message da time Josiah, Amon boy, stay king fo da Judah peopo.
2 Da One In Charge tell, “I goin wipe out eryting
From on top da earth.
3 I goin wipe out all da peopo an all da animals.
I goin wipe out da birds in da sky.
An da fish in da ocean.
Da idol kine statues dat look jalike dem
Goin come wipe out too.
Same time, da bad kine peopo goin come wipe out,
Wen I cut off all da peopo from on top da earth.”
Az wat Da One In Charge tell.
Da One In Charge
Talk Bad Bout Da Judah Peopo
4 “I goin use my powa agains da Judah peopo,
An erybody dat live inside Jerusalem.
I goin wipe out from dis place eryting dat still stay bout da Baal god.
I goin wipe out even da names fo da pries guys fo da idol kine gods,
An fo da pries guys dat wen bag from me, Da One In Charge.
5 I goin wipe out da peopo dat go on top dea flat roofs
Fo go bow down in front
Da sun, da moon, an all da star gods.
An I goin wipe out da peopo dat use my name ‘Da One In Charge’ fo pray to me,
An same time dey use da Molek god name fo pray to him too.
6 An I goin wipe out da peopo dat wen bag from me, Da One In Charge,
An tell me fo help dem,
O try find out from me wass good fo dem do.
7 “Shhh! No talk notting in front da Boss,
Da One In Charge!
Cuz pretty soon, da time goin come
Wen Da One In Charge goin judge an punish erybody!
Cuz Da One In Charge make ready fo kill da Judah an Jerusalem peopo,
Jalike dey one sacrifice!
Da One In Charge tell da nations
Dat stay agains Judah fo come fo kill dem.
8 Da time wen me Da One In Charge make dat sacrifice,
I goin punish da leadas an da king ohana peopo,
An all da peopo dat pray to da gods from anodda place.
9 Dat time, I goin punish
Erybody dat jump ova da flat stone
Unda da door a da temple
Fo show respeck fo dea gods.
Dose guys bulai peopo an bus um up,
Fo dem fill up dea bosses house
Wit stuff dey get
From rip off peopo.”
10 Da One In Charge tell, “Dat time, somebody goin yell fo help from da Fish Gate.
Dey goin cry from da Secon Districk.
Dey goin hear one loud crash from da hills.
11 Cry, you guys dat live aroun da market place!
Cuz all da guys dat come fo do biznis wit you guys,
Goin come wipe out!
An all da guys dat weigh da silva fo you guys,
Goin get kill!
12 Dat time I goin use small olive oil lamps
Fo look all ova Jerusalem town,
An punish da peopo dat no kea wat God tink.
Dey jalike da wine dat jus sit wit da junk kine stuff inside.
Dey figga, ‘Da One In Charge no goin do notting to us guys,
Good o bad!’
13 Dat kine peopo, goin get all dea rich kine stuffs rip off.
An dea houses all bus up.
Dey goin build houses,
But dey no goin live inside um.
Dey goin plant grape fields,
But dey no goin drink da wine.”
Da Day Da One In Charge Come Da Judge
14 “Da day stay nea wen me Da One In Charge come fo judge da peopo!
Goin happen fas!
Lissen! Da peopo goin yell real hard.
Da guys dat fight goin scream ova dea.
15 Dat time goin be one day
Wen me Da One In Charge goin come real huhu.
One day wen peopo goin come bum out an get stress.
One day wen peopo goin get plenny trouble an come wipe out.
One day wen goin come dark, jalike da dark stay thick.
One day wen goin get plenny clouds an black sky.
16 One day wen dey goin hear da sheep horn trumpets an yelling fo fight
Agains da big towns dat get strong wall,
An towas on top da cornas fo da wall.
17 Me, Da One In Charge, I goin make da peopo come bum out.
Dey goin walk jalike dey no can see notting,
Cuz dey wen do bad tings agains me, Da One In Charge.
Dea blood goin pour out jalike watta.
Dea guts goin come out jalike doodoo.
18 Dea silva an gold no can get dem outa trouble dat day
Wen Da One In Charge go wild wit dem.
He goin be jealous, jalike one fire
Dat goin burn up all da peopo inside da world.
Cuz az fo real, dat he goin bring one skery end
Fo all da peopo dat live on top da earth!”