Ɗeleewar Mbulus a Afisaya.
Ten laɓaara.
Mbulus ndǝn chirethgha ɗeleewar ɗiya a sayidɗi nanǝn ahu porsǝna a Roma, asǝmha ahu hurarha kumggit mikki a kwasamad nggǝtta Yeeso. Thlǝnang na Mbulus ɗeleewar ɗiya a Afisaya ɗǝ tǝ numa ndaarha a ngwalang nda karatang nda, nggǝra nda thlǝnanggǝn fingya ɗǝ pak fatakkwaya.
ˈYa na manggǝn ahu ɗeleewar ɗiya ndǝna kwamana ǝnana Faara na a wumanggǝn nafiya na ahu ƙǝshiirha hǝu a kamu ngyakhrha Yeeso Ƙǝrǝsti ɓa, mbǝ ma fiya kee wa, amma heu tǝ yibya heu ǝnana Faara a talara tǝ hweeɗe.
Ɗeleewar ɗiya fǝrang ɗǝ kaali fiya na a tsawa nda ahu kwamana na a kyad ndaarha tsau nda tal yi ƙǝkafek, mbǝ ahu mee kee wa.
Ahu ɗeleewar ɗiya katǝranggǝn tsǝ laɓaara hai aten wum teena, kyadɗǝ kwamana wurna Faara nafiyighǝn, kyaɗǝ ƙǝm nggayidghǝn hu kwaman chakh ɗimiyid ndan ǝnang nǝn kanda, kyang nǝn kanda sǝ ahu ngyakhrha ɗimiyirha ƙǝsǝr ka mǝrra Ƙǝrǝsti Yeeso, tǝ ɗǝf nǝn miighǝn hu tar Sǝsǝna tǝ Peɗǝnda.
A hu ɗeleewar ɗiya na karapuya sǝ kyadgha wum ten nafiya Faara tǝ Ƙǝrǝsti. Saghang nda nafiya Ƙǝrǝsti tǝ fad niifa, Ƙǝrǝsti ƙǝm ndǝna teena. Saghang nda kanda sǝ tǝ wuronga, Ƙǝrǝsti ƙǝm ndǝna wutsamnda. Saghang nda kanda sǝ tǝ ɗǝf sar kǝnna na tsauka tǝ shembe. Ənana Faara ǝnɗiya ƙǝsǝr a tǝrang ngganda thlǝmnggǝn sǝ.
Əngya na ahurghǝn
Katǝra laɓara 1:1-2
Tsaurha tǝ ndan tal hu Ƙǝrǝsti 1:3-3,21
Kwamana na kyad ndaarha nǝghǝm tal 4:1-6,20
Mii ngwala laɓaara 6:21-24
1
Ɗeleewar Mbulus chireethleng nǝn Afisaya ɗǝ
1 Kyagha ɗeleewar ɗaɓa ya a har Mbulus, wurna Faara ka a tsauka tǝthlǝnda Yeeso Ƙǝrǝsti. Niyi a chireethleng nafiya Faara ɗǝ na chahal a Afisa, nafiya na a ɗǝrha mbeeɗǝ tǝ fǝrƙǝkafek fa ahu Yeeso Ƙǝrǝsti.
2 Ngwa tsauka nggayirha tǝ tsawud ɗǝɗemnggirha yi Faara na yinǝm China tǝ Chinǝm Yeeso Ƙǝrǝsti a tsauka tǝ kun.
Parkaya yi Sǝsǝna ahu Ƙǝrǝsti
3 Tsau faala yi Faara tǝ Chin Chinǝm Yeeso Ƙǝrǝsti. Fǝrangga parka ƙǝm a talara hai tǝ kala Sǝsǝn parka hu Ƙǝrǝsti.
4 Kapa nǝn ǝna ƙǝshiirha, nggǝm Faara kǝm wurɗǝ ƙǝm ahu Ƙǝrǝsti a tsawum chahal kula ǝn ˈyaara hu yidghǝn.
5 Faara ˈwaɗǝ teena ƙǝtǝm na a tsawum fa wurayighǝn tǝ wumang nda ƙǝm a thlǝmadghǝn ɓa tsawum wanggighǝn ahu Yeeso Ƙǝrǝsti. Ənɗani na midghǝn ya a ǝnagha, ka a mbǝnanggǝn kaan.
6 Nanǝn kee faala ma Faara ƙǝsǝr ka mamnggit nggayidghǝn fǝrang nǝn ƙǝm tǝka ahu Wanggǝn nggǝm nǝn.
7 Ƙǝsǝr ka far Ƙǝrǝsti ndǝn wal nǝm pǝla, ndǝna, chahang nda ɗimiyid nǝm ƙǝm ɗǝ. Ƙǝsǝr ka nggayidghǝn mulgha hai,
8 fǝrang nǝn ƙǝm hangga heu tǝ thladwayirha tǝ sǝnda.
9 Nanǝnya kyaɗang Faara sǝndǝghǝn ƙǝm na ɓǝɓee aten Ƙǝrǝsti, ˈya ǝnanǝn ka a lǝɗanggǝn ˈya na midghǝn ahu Ƙǝrǝsti.
10 A lǝghǝd sayi, na Faara a ǝna ǝngya heu na midghǝn, na Ƙǝrǝsti a wumang ǝngya heu na a talara tǝ na a hweeɗe nagha a harghǝn.
11 Ƙǝsǝr ka nanǝm hu Ƙǝrǝsti, thlǝ ɗǝm langaarha a har Faara, ƙǝsǝr ƙǝtǝm ˈwaɗǝ teena wurɗǝ ƙǝm, tsanggǝn ǝngya ǝna nda ƙǝla na midghǝn ǝnaarha.
12 Taama ƙǝm Yahudaya ˈwagha shiteena tǝ Ƙǝrǝsti tama tsawum fal mamnggitghǝ nǝm.
13 Nanǝnya kun mbuwa Yahudaya sǝk ɗun laɓar ƙǝkafek ɗi ƙǝm, laɓarɗi na mbǝnggǝn yi hǝrǝkrha. A sayidɗi fǝr nun ƙǝkafek tǝ Ƙǝrǝsti, fǝrang Faara Sǝsǝna kun tǝ Peɗǝnda ƙǝla ɗǝf nǝn miighǝn ƙǝtǝm, tsauɗǝ ƙǝla ǝnsakhrha na kyat ndarha kun yighǝn ni.
14 Sǝsǝn tǝ peɗǝnda ndǝn kyaɗangga ndarha ƙǝm ɗǝf Faara miighǝn a nafiyighǝn, ndǝn kyaɗangga ndaarha ƙǝm na Faara a fǝrang alteena fingya tsauka yighǝn. Taama fal mamnggitghǝn nǝm.
Hwan Mbulus Faara ka nafiya Afisa
15 Nanǝn kee, sǝk ni laɓar fǝrƙǝkafekkid nun fǝr nun a Chinǝm Yeeso, tǝ ƙǝm nggǝm ndǝnun a nafiya Faara na chahal,
16 malanggwi usa Faara ka kun wa. Ni naarha hwan Faara ka kun ƙǝtsar,
17 hwan Faara ni Faara yi Chinǝm Yeeso Ƙǝrǝsti, tǝ Chinɗi na manggǝn, fǝrang Sǝsǝna nǝn kun yi thladwayirha tǝ sǝnda tǝnun chik sǝnggǝn ngga.
18 Niya hwan Faara a inanggǝn hur nun ɗǝ na kukwaryidghǝn nun, tǝnun sǝn tǝmani shiiten ɗi aah nǝn kun ka kamanggǝn, tǝ ƙǝm sǝn hangnda mamnggit parkayidghǝn ɗǝf nǝn miighǝn a nafiyighǝn na chahal.
19 Niya nggǝr hwanda ƙǝm tǝnun sǝn mamnggit sǝsǝmndǝghǝn kalgha mbǝrha mu, na a ǝna taara ahur nǝm, ƙǝm fǝrgha ƙǝkafek. Sǝsǝmndǝɗi na ǝna taara ahur nǝm, nǝghǝn tal tǝ mamnggit sǝsǝmndǝɗi.
20 Ndǝn ǝnagha taara ahu Ƙǝrǝsti a sayidɗi thleng nanda sǝ hu mǝrra, tǝ ƙǝmɗa fǝrang ɗǝ tsǝnggam tsaurha a yisǝmadghǝn a talara.
21 A mbǝɗa ni na Ƙǝrǝsti a ǝna kutǝryirha sǝ aten kutǝrya heu tǝ sǝsǝmnda, nduwa tǝ shembe tǝ kutǝryirha. Nǝghǝn tǝ thlǝma kalgha thlǝma mu heu na nda a fǝra, mbǝ hu ƙǝshiidɗi kee ya wa, ta hu ƙǝshiirha ɗǝ na ɓayi
22 Faara ɗǝfang ɗǝ komani a kamu sar Ƙǝrǝsti, tsau ɗǝ teena yi kutǝryid ǝngya heu, ka a thlar Ƙǝn hwan Faara nǝn
23 na fadghǝn, nǝghǝn lǝlǝgɗa hu Ƙǝrǝsti, ƙǝla nanǝn tǝ altenggǝn lǝɗang nǝn ǝngya heu.