8
Yinǝm Mamnda Firis ndǝna Ƙǝrǝsti
1 ˈYa nǝm a ndaarha nanǝnya ndǝna, nǝghǝm tǝ Mamnda firis na tsau hu tsǝnggam kutǝryirha a yisǝmad Faara a talara,
2 tǝ ǝna taara a mbǝrha na chahal, ahu ka chamɗi na ngga ǝnana Chinǝm, mbǝ yanɗi ǝnana niifa wa.
3 Kala mamnda firis targhǝn ni fǝr ǝnfǝra tǝ sataka, nanǝn kee mamnda firis ɗi kyanǝm ya tǝtani a fǝr ˈya nǝn.
4 Andam nǝghǝn hu ƙǝshiirha ni, kam mbǝ tam tsaurha firis wa, ƙǝsǝr na firistaya sǝ na fǝr satakhkya ƙǝla sakhna ɗeleewar ngyakrha.
5 Na firistayini ya ǝna tar ndan a mbǝrha na chahal na ƙǝla ǝngya na a talara. Ƙǝsǝr a sayidɗi na Musa a taksa chama yi Faara, ƙǝs nda thlǝmadghǝn tǝ ndaarha, “A sǝnasǝ a ǝna ǝngya na heu ƙǝla kyaɗo ni a wumnda.”
6 Amma nanǝnya fǝrang nda tar firis Yeeso yanɗi na ngga kaan kalgha yi kaar, ƙǝla nana weerinda ɗǝfmiɗi ngga kaan, nanǝn Yeeso ni ishgha a pathlang Faara tǝ fiya. Ƙǝsǝr ǝnagha ndan aten weerinda ɗǝfmee na ngga.
7 Ƙǝsǝr andam mbǝ ˈyasǝ ɗimi aten ɗǝfmiɗi na kaar ya wa, kam mbǝm nggǝr kaɗa ɗǝfmee pak wa.
8 Amma Faara naɗǝ ɗimiyid nafiyighǝn ndǝn ndaanǝn, “Na sayi ɓayi, ndana Chinǝm,
niya nggǝr fǝr weerinda ɗǝfmee tǝ nafiya Isǝreela hǝu tǝ nafiya Yahuda.
9 Mbǝ a naarha ƙǝla ɗǝfmiɗi ǝnani tǝ chichiyindan wa,
a farɗi ƙǝs ni haar ndan kyang ni kanda sǝ hu chehweed Masar,
ƙǝsǝr ish wanda aten ɗǝfmina wa,
kang ƙǝsǝra ni kanda, Chinǝm ndagha kee.
10 Kulo weerinda ɗǝfmina ni ya, niya ǝnarha tǝ nafiya Isǝreela,
ndagha Chinǝm,
niya chireethlǝng nggyahad na hai ahu huten nggindan
tǝ hur yindan.
Niya tsaurha Faar ndan
kanda ƙǝm nafina.
11 Mba nda nggǝr tsahang tula yindan ha,
nduwa nggǝɗayi ndan tǝ ndaarha, ‘sǝnna Chinǝm.’
Ƙǝsǝr ko wunni nǝn a sǝn nggi,
katǝrarha aten tǝfeewunda ɗǝgha hu tǝpamǝnda ɗǝ.
12 Ƙǝsǝr niya chahang ɗimiyid ndan kanda ɗǝ,
tǝƙǝm mbi nggǝr ɗal ɗimiyid ndan teena ɓalwa.”
13 Ndikna Faara aten weerinda ɗǝfmee, tsang ɗǝ yi katǝradghǝn suhurghǝn. Tǝƙǝm ˈya na yi ƙǝtǝm, tsauɗǝ suhur ɗǝ, tsǝɓaku nǝn a sahatta.