3
Yahaya tǝ Mbaptisǝma tangsang ɗǝ kwamana Yeeso ɗǝ
1 Ahu hurarha kumkap tuf yi kutǝryid Kaisar Tǝmbariyani; Mbuntus Mbilatus ndǝna ngwamna Yahudiya, Hirdus ndǝna kutǝr Nggalili, wanman na Filibus ndǝna kutǝr Ituriya tǝ Tarakunitas, Lisaniyas ndǝna kutǝr Ambiliya.
2 Nda Hanana tǝ Kayafa ndǝna Mamngya Firistaya. A faryini ndikka Faara tǝ Yahaya wan Dzakariya a hee.
3 Tǝrgha Yahaya wenggǝn chehweed yina hai na a mii kufad Djodan ndǝghǝn a thlǝk laɓar Faara a fiya tǝ ndaarha, a malangganda ɗimiyindan ka a fanangganda kanda tǝna Faara chahang ɗimiyindan kanda ɗǝ.
4 Kǝla nanǝn chichirethlee hai ahu ɗeleewar annabi Ishaya tǝ ndaarha,
“Urarha a aah farha a kaheerha tǝ ndaarha,
‘Taksaman kwamana Chinǝm sǝ,
katǝraman pǝpǝnang nda kwamangya ɗǝ.
5 Njighaman suhwadya heu,
fǝlaman mbǝya ɗǝ na ɗangkam, ɗangkam tǝ wumngya.
Pǝpǝnaman kwamangya ɗǝ na ƙǝƙǝɓa, ƙǝƙǝɓa tsawa nda ndip,
kwamangya na kukuchang nanda ngga.
6 Fiya na heu nanda a na hǝrǝkrha Faara!’ ”
7 Kǝsǝrke, nǝghǝn a ndang nda fiya na ɓaarha ɓa ka a fananggǝn kanda, “Kun huthlingya! Wun ƙǝsgha thlǝmannun ƙǝsǝr ka sǝbrha hur Faara na ɓayi?
8 Nama ˈya kyadgha ndaarha malangɗun ɗimiyinnun. A numaɗun ahur nun ndon Ibrahim ndǝna Chinun wa. Niya ndangnda kun Faara nǝn mbang ǝnang wundakhnaya Ibrahim sǝ tǝ feryini ya.
9 ˈWanda teena pangnda wurra a kul ɗǝfrha, kala ɗǝfrha mbuwa nggǝtta nanda kyathlang nda ɗǝ muwangganda ahu waarha ɗǝ.”
10 Tsahangga fiya mee ha tǝ ndaarha, “Ma nan ǝnaarha mbiya?”
11 Nggǝmanggǝn tǝ ndaarha, “Niifa na tǝ lukrha sǝri tǝranggǝn niifa ha mbuwana yighǝnsǝ, niifa na tǝ ǝnnarhami ha, nagha kee ndǝghǝn nggima.”
12 Fa thlǝ tsamngya ƙǝm ɓa nda ɓa na a fananggǝn kanda, tsahang mee nda, “Mala, ma nan ǝnaarha?”
13 Ndanggǝn kanda, “A thlǝɗun ˈya kalgha yanɗamu tǝ thlǝghang nanda kun wa.”
14 Sodjaya ƙǝm tsahang mee nda ha, “Kanggiwu ma nan ǝnaarha?” Ndanggǝn kanda, “A ngyaɓangɗun fiya a fǝrang wuɗǝɓǝla nda kun wa. A nggaɓaɗun kanda ƙǝsǝr a fǝrang ˈya nda kun wa. Usama Faara tǝ ˈya na nda a teng nda kun.”
15 Nana fiya a ƙǝla ɓad Ƙǝrǝsti fa ɓa, tǝrgha fiya na heu kanda a numarha ahur ndan tǝ ndaarha, ko Yahaya ndǝna Ƙǝrǝsti ɗi.
16 Ndangga Yahaya kanda, na heu, “Niya fanang nda kun tǝ aama. Amma niifa sǝ na ɓayi na tǝ sǝsǝmnda fa kalgha nggi mu, tsǝkki na a kwasanggi sahad pahamggǝn hai wa, ndǝghǝnggi ɓanǝn fanang nda kun tǝ Sǝsǝna tǝ Peɗǝnda tǝ waarha.
17 Nǝghǝn tǝ ɗeng pǝra ha, nǝn a pǝrang ɗiɗiirha ɗǝ ngwanggǝn wan hwalidghǝn ahu ɓirukkun hai. Nǝn a njang nda ɗiɗidghǝn ɗǝ tǝ Waarha mbuwa mǝra hai.”
18 Tǝ yiyi thlamarha hangga, Yahaya thlǝkɗǝ laɓar Faara na ngga a fiya.
19 Yahaya yanang ɗǝ Hirdus, ƙǝsǝr Hirdus kahang ɗǝ Hirudiya nu wanman, tǝ ƙǝm ǝnaɗǝ ǝngya mbuwa ngga.
20 A kwasamadghen Hirdus nggǝrɗǝ sǝɓang nda ɗǝ tǝ ngyakhrha fǝrnǝn a kanda heu. A ƙǝsangganda Yahaya changganda ƙǝnɗǝ.
Fanang Yahaya Yeeso
21 A kwasamadɗi fanang nda fiya, Yeeso ndǝghǝn nggima fanangganda. Tǝrgha nanǝn a hwan Faara, frakh amshi inggaɗǝ,
22 Sǝsǝna tǝ Peɗǝnda tǝrgha atenggen hai ƙǝla titiliurha, sǝk urarha nda a talara hai tǝ ndaarha, “Sani na waana tǝtali nggǝmni, tǝkɗi mbǝnduwa fa kaan.”
Turya Yeeso
23 A farɗi katǝrangna Yeeso targhǝn hai yi tsaharhaha, nǝghǝn a kaɗa hurarha kumnggit mahan ahu ƙǝshiirha. Tǝrgha fiya ndǝn tǝ ndaarha wan Yisufuni,
na wan Heli,
24 Heli wan Mattaat,
Mattaat wan Lawi, Lawi wan Malki,
Malki wan Yanna, Yanna wan Yisufu,
25 Yisufu wan Mattaatiya, Mattaatiya wan Amos,
Amos wan Nahum, Nahum wan Asaliya,
Asaliya wan Nanjaya,
26 Nanjaya wan Maˈata,
Maˈata wan Mattaatiya, Mattaatiya wan Shimeya,
Shimeya wan Njosek, Njosek wan Yahuda,
27 Yahuda wan Yowanan, Yowanan wan Refaya,
Refaya wan Dzarubabel, Dzarubabel wan Sheyaltiyel,
Sheyaltiyel wan Niri,
28 Niri wan Malki,
Malki wan Addi, Addi wan Kosama,
Kosama wan Almadama, Almadama wan Er,
29 Er wan Djoshuwa, Djoshuwa wan Eliyeser,
Eliyeser wan Yorim, Yorim wan Mattaat,
Mattaat wan Lawi,
30 Lawi wan Simiyon,
Simiyon wan Yahuda, Yahuda wan Yisufu,
Yisufu wan Yonana, Yonana wan Eliyakim,
31 Eliyakim wan Malaya, Malaya wan Mainana,
Mainana wan Mattaata, Mattaata wan Natan,
Natan wan Ndauda,
32 Ndauda wan Njessi,
Njessi wan Obida, Obida wan Mbuwasa,
Mbuwasa wan Salmon, Salmon wan Nashon,
33 Nashon wan Amminadab, Amminadab wan Aram,
Aram wan Hesruna, Hesruna wan Feresa,
Feresa wan Yahuda,
34 Yahuda wan Yakubu,
Yakubu wan Ishaku, Ishaku wan Ibrahim,
Ibrahim wan Tera, Tera wan Nahor,
35 Nahor wan Serug, Serug wan Reyu,
Reyu wan Feleg, Feleg wan Eber,
Eber wan Shela,
36 Shela wan Kenan,
Kenan wan Arfakshad, Arfakshad wan Shem,
Shem wan Nuhu, Nuhu wan Lamek,
37 Lamek wan Metusela, Metusela wan Enok,
Enok wan Yared, Yared wan Mahalalel,
Mahalalel wan Kenan,
38 Kenan wan Enosh,
Enosh wan Shitu, Shitu wan Adamu,
Adamu ƙǝm wan Faara.