5
GOD KAT YELAVƗTAA KƗPMAMBA LƗGA VAK KAT KWULAK KIYANƗN
Jisas God njana nyana waa yelavɨkiyaa nɨmba ndi Godna nɨmba ndi. Kɨta nyan nɨna nyaek God kat woviyaguga lɨndeyan Godna nyangu kat aywaa woviyaguga lɨgiyandɨ. 2-3 God kat woviyaguga lɨga ndɨnai waa nyaangɨtmba yetɨneyan ndɨna nyangu kat woviyaguga lɨgiyanɨn. Kɨmbɨk vat kɨta vap mbɨt. God kat woviyaguga lɨneya vat. God waa nyaangɨtmba yetyɨneya vak. Bɨt kɨta vat bɨt. God nɨn kat wagalanda njɨvwa vali lɨga njɨvwa ana ndɨ. God njana nɨmba kɨpmamba lɨga kavle vak kat kwulak kiyandi. Jisas Kraist nɨnagwinala tɨgandɨ waa yelavɨtnjeyan wan kavle vak kat kwulak kiyandi. Jisas God njana nyana waa kɨta nyan yelavɨtndeyan wan nyan kɨpmamba lɨga kavle vak kat kwulak kiyandɨ.
JISAS GOD NJANA NYANA WAA WALƗGA NƗMBA
Jisas Kraist ngaga yalaa ngu yagulaa tɨga kiyandɨ. Ngu mɨna yaguvat ana yandɨ. Ngu yagulaa kiyavat yandɨ. Jisas God njana nyan tɨndangat Godna waagan ana woseka walɨgandɨ. Jisas God njana nyana waa mbutɨkandi kuvut da. Godna waagan mbutɨkandɨ. Jisas ngu yagua njɨmbla nyɨnangwutmba lɨgalɨga kwundi wandɨ. Jisas kiyanda njɨmbla God njana nyanat tɨndangat vɨndi. Wundi kuvut nda kɨta nyaangɨt mɨna mbutɨnkandi. Mandɨp mandɨp nyaangɨt ana mbutɨkandi. Kwo nɨmba waiga vat wutɨganɨn. God waa nyaangɨt ndina nyaangɨk kat kwulatɨgandɨ. Ngi kat tɨga ndɨna nyaangɨt wukiyanɨn. God wandɨ.
Jisas wunai njana nyana waa wandɨ. 10 Kɨta nyan Jisas kat ndɨna mbangɨ wiyo waavi laagandeyan wan nyan Jisas God njana nyana waa maawupmba yelavɨk kiyandɨ. Kɨta nyan God waa nyaangɨk kat kai wandeyan wan nyan God kat mɨn woseka walɨgamɨn waa walɨga nyana. Wan nyan God ndɨna nyan kat walɨnda nyaangɨk kat kai wandɨ. 11 God waa nyaangɨt kɨngiyan.
Wuna nyan kwiwun maa ngwuk kat njɨmbla njɨmbla waa wandɨ God. 12 Godna nyan kat kwutaa la nɨmba njɨmbla njɨmbla apma vat tɨndjeya vat klandi. Godna nyan kat kwutapman la nɨmba njɨmbla njɨmbla apma vat tɨnjeya vat ana klandi.
NJƗMBLA NJƗMBLA APMA VAT YETƗNEYA VAT KLAMƗN WAA YELAVƗK KIYANƗN
13 Ngwuk Jisas God waa nyana waa yelavɨtɨga nɨmba ngwuk. Ngwuk kat wan pas pɨlɨwutɨgowun. Pɨlɨwukwa nyaangɨt vɨlaa njɨmbla njɨmbla apma vat yetɨneya vak tamba klanɨn waa yelavɨk kiyangwuk. 14 Godna yelavɨk vapmba wagalaneyan nɨnai waiga vat God wukiyadɨ. Wutndeyangat nɨna mbangɨ ana kɨlɨpangɨ yigiyandɨ. 15 Nɨnai waiga vat wutɨgandɨ. Vɨlɨganɨn. Ngi kat tɨga wagalaneya nda kwigiyandɨ. Vɨlɨganɨn.
16 Kɨta nyan ndɨna kɨta mbaapma nyan kwo kavle vat yetɨndeyan wan nyan God kat wagalgiyandɨ. Wuna kɨta mbaapma nyan kat kwunak waa wagalgiyandɨ. Wagalandeyan God ndɨ kat kwunatndɨ, apma vat tɨgiyandɨ. Nat nɨmba ana kwo kavle vat yetɨlɨgandi. Ndi God kat kai walaa kavle vat yiga yetɨlɨgandi. God kat ndi kat manda kat wagalgiyangwuk. Ndi kat ana alɨpsɨga kwunakiyandɨ. 17 Kɨta nyan kavle vat yiga yetɨndeyan ana nglaatndɨ. Nat nɨmba God kat kai walapman kwo kavle vat yiga yetɨlɨnjeyan nɨma glei vat ana ndɨ. God ndɨ kat alɨpsɨga kwunak kiyandɨ.
18 God njana nɨmba ana kavle vat yiga yetɨlgandi. God njana nyan Jisas dina lak kwalɨgandɨ. Ngi kat tɨga wan kavle nyan Seten ana ndi kat ngway tolala kwutaa lɨgiyandɨ. 19 Nɨn god njana nɨmba nɨn. Wan kɨpmamba lɨga kwo nɨmba kat wan kavle nyan Seten ndi kat kwutaa lɨgandɨ.
20 Godna nyan ngaga yalaa nɨn kat apma maawut kwindɨ. Nɨn kat kwinda maawupmba Godna sɨ wuka ndɨ kat yelavɨka lɨganɨn. Nɨn Godnonala kɨta lulu lɨganɨn. Dɨ apma vat tɨga nyana. Nɨn ndɨna nyan Jisas Kraistonala kɨta lulu lɨganɨn. Ndɨ ndɨno apma vat tɨga nyana. Jisas Godna. Ndɨ njɨmbla njɨmbla apma vat tɨneya vak kwilɨga nyana.
21 Mat nyangu, waagan kait kwunatɨnja vak kwagala ngwula.