1-2 Angken si‐kak, palobos met ja dag‐en koy pansigshan ko, nem ekak inpakat. Ẃaray nandasinan ko met so ni eshom ma emati, tep apostolak; inon‐an ko met ta mismo si Apo Jesus! No kowan ni eshom ey aliẃen apostolak, istay amtayo koma mango, ta si‐kak i kabol la emati‐an jo son Apo Jesus. Jet sotan i ka‐asan to ey si‐kak, agpayson apostolak. 3 Say naka isongbat so nonta ira toon eg memigbig ey apostolak, kowan ko ey si‐kayon i‐Korinto koma ja emati i asen sha.

4 Nem ekak inpakat i kina‐apostol ko. Apay aliẃen palobos aya son si‐kami, no i‐aknan jokami ni kenen mi tan inomen mi? 5 Apay aliẃen palobos aya no kaspangarigan ey mekidkidaw i aseẃa mi shi mika dawdaẃi? Sota kait min apostol, pati si Pedro, tan sota agi ira nen Apo Jesus, shaka ngo pekidkidaw i aseẃara. 6 Sota eshom, joka ira i‐alosi ni i‐ala sha ni mesepol sha; nem si‐kamin Birnabi ket eg jo mango pansalsheng ja mandeka ni embel‐at ta obda ni sajay ya mika pansilbi son Apo Jesus? 7 Sipay inon‐an jon solsharo ja emekikobat ey si‐kato shorog i mankastos ni mesepol to? Sipay inon‐an jon nanmola jet eg to ninamtan sota apit to? Sipay inon‐an jon nanpastol ni animal, ja eg to ninamtan i katas nontan na pinastol to? Si‐kak i kabol la emati‐an ni eshakel la totoo, nem angken nganto, enshiy nak kinshaw son si‐kara. 8 Sajay i inosal kon arig ta amtak ey eẃatan jo iyay, nem ẃara pay i bilin nen Apo Shiyos ja arig met laeng niyay, 9 ja nay‐awat so nen Moises nonta bayag da, ja kowan to ey, “Karejo koma bosalan sota animal no emengidik ni pagey, ta say namtan to koma ngo sota sabal ni toka pan‐idika.” Kowan to, jet edawag ey aliẃen sota pansigshan niyay ya animal bengat i kaytoshongan niyay ya bilin. 10 Apay eg jo aya eẃatan ey sajay ya naysolat ket, si‐katejon too i kaytoshongan to? Sota man‐obda, ẃara komay namnama ton kon‐oren. Arig to sota mengesharo: enshiy imdeng ton mengesharo no enshiy namnama ton to epiten, tan kasta met sota mengidik. 11 No si‐kamiy kabol la inamta‐an jo so ni mapteng nga toro pangkep son Apo Shiyos, apay embel‐at aya son si‐kayo no mayda‐kam kami ngo son si‐kayo ni kasapolan mi? 12 No sota ira eshom ja engitosho son si‐kayo ket, ẃaray nebeng sha ja manbeka ni mesepol sha son si‐kayo, istay ebadbadeg komay nebeng mi ey si‐kara. Si‐kami, ẃaray istay nebeng min manbeka son si‐kayo koma ni kasapolan mi, nem eg kami nanbaga; inenosan mi ngon man‐obda ni kasapolan mi. Ta no manbeka kami, amangan no sotan i ondingding so nonta mapteng nga shamag maypangkep son Cristo, ja mika pan‐itoro. 13 Apay eg jo aya amta ey sota ira eman‐obda shima Timplo nen Apo Shiyos ket, shiman i shaka pengal‐i ni shaka panbiyag? Ta ireka may‐akni nonta maydeton shima kowan sha ey altar shi Timplo. 14 Inges to met laeng sota ira emengikowan ni mapteng nga shamag maypangkep son Jesucristo. Say kowan nen Apo Jesus, sota ira emengitosho, say pengal‐an sha koma ni kasapolan sha, sota ira shaka pantod‐i. 15 Nem si‐kak, ekak inosal ira jay ya istay palobos sa dag‐en ko. Jet sajay ira den insolat ko, aliẃen naka mengshaw ni kasapolan ko. Mapmapteng ja angken meteyak ni agang ko nem say nak mankekkekshaw, nakol ni damsisen sha sota naka pan‐itoro ja mapteng nga shamag maypangkep son Jesus. Baka kowan sha ey sota kenen koy naka nemnema.

16 Si‐kak, enshiy nebeng kon mengilastog ni naka pengitosho nonta mapteng nga shamag maypangkep son Jesucristo. Nay‐awat iyay ya obda son si‐kak jet kapiditan na nak itoro. Kaasi‐ak ali no ekak ikowan iya mapteng nga shamag pangkep son Jesucristo! 17 No sajay ket dingkak ja nandapo bengat shi nemnem ko, mebedin na ẃaray idastog ko. Nem aliẃen nemnem ko iyay, no diket si Apo Shiyos i emili son si‐kak, jet inpiyal to iyay ya obda son si‐kak. 18 Jet ngarantoy kon‐oren ko? Enshiy eshom nem eg sajay: Sota naka pengitosho nonta mapteng nga shamag maypangkep son Cristo, dibshi, ekak panbedjad ira sota naka pan‐itod‐i. Tan say sakey pay, ekak inosal sota istay palobos sa pengshaw ko ni mesepol ko so nodta ira naka pantod‐i.

19 Angken sipen too, enshiy toon memidit son si‐kak no ngantoy dag‐en ko, nem say ninemnem ko, inpanbalin ko iya bakdang kon singa baga‐en ni emin na totoo, say eshakel koma i itorong kon memati son Jesucristo. 20 Isonga no ẃara‐ak shi kad‐an ni Hodiyos, singa Hodiyosak, say eẃisen ko iren memati son Jesucristo. Aliẃen kapiditan son si‐kak ja onoren i dinteg sha, nem naka i‐anam son si‐kara, balang nem eẃisen ko iren memati. 21 No ẃara‐ak so nonta ira toon aliẃen Hodiyos ja eg maka‐amta ni bilin nen Apo Shiyos ja in‐awat to so ni Hodiyos, naka i‐anam son si‐kara, say eẃisen ko ngo iren memati. Nem aliẃen na kowan ko ey enshiy bilin nen Apo Shiyos ja onoren ko, ta naka onora met sota bilin nen Cristo. 22 No ẃara‐ak ja naykadẃa so nonta ira eg pay laeng etod‐an ni kosto, ekak ipilit i kostok, say eẃisen ko iren onkedsang i pamatira son Jesucristo. Angken sipen too i kaydaokan ko, naka i‐anam i naka pesing son si‐kara, say ẃara koma iray eshom ma memati ja maysedakan. 23 Sajay i naka dagdag‐a say ma‐shoman ira sota memati nonta mapteng nga shamag maypangkep son Jesucristo, tan say onshakel i kait kon mayda‐kam nodta pansigshan ja kai‐akan ni mapteng nga shamag.

24-25 Amtayo met ey sota ira emekilongba, olay toy matekal ja mepangdo. Jet saksakey bengat i mengebak ja on‐awat so ni primiyo. Isonga shaka bidina shorog i bakdang sha, ja aliẃen kompormi i shaka dagdag‐a. Sajay komay onoran jo, say ẃaray kon‐oren jo di. Sota ira mekilongba, shaka singpetay shaka pekilongba say meprimiyo‐an ira, nem sotan na primiyo sha, eg onbayag, mesheshal met laeng. Nem si‐katejo, mas pay komen singpeten tayo i pesing tayo, ta sota eẃaten tayo, eg mesheshal, ẃara ni olay ingkatod ingka. 26 Si‐kak, singa nay‐arigak shi emekilongba niya naka dagdag‐a niman. Jet diritso i naka pesing, aliẃen palashan. Singa boksingiro pay i kay‐eshigan ko, jet aliẃen inges ko sota boksingiron eg to amten mekiboksing: 27 naka bidina shorog i bakdang ko, say aliẃen sota piyan koy ma‐onod. Sajay i naka dagdag‐a, tep piyan kon sigorado‐en sota primiyok shi dangit. Si‐kak met i engitosho so ni eshom, nem baka enshiy nak kon‐oren shi ka‐onoran.