5
1 Sota ira ememati ey si Jesus, si‐kato sota inbetkag ali nen Apo Shiyos shiya dobong, si‐karay podnon annak nen Apo Shiyos, jet sota ira ẃaray semek to son Apo Shiyos ja Maka‐anak son si‐kara, ẃara ngoy semek sha so nonta kait shen annak to.
2 Say amta‐an tayo so ey ensemek tayoy kait tayon annak nen Apo Shiyos, no tayoka pati‐a i bilin to.
3 Say ka‐asan ni semek tayo son Apo Shiyos, sota pemati tayo ni bilin to. Jet sajay ya bilin to, aliẃen edigat ta mepati,
4 ta si‐katejon annak nen Apo Shiyos, si Apo Shiyos i ontolong son si‐katejo tep ẃaray pamati tayo son Cristo. Isonga eg kito ontolok ja ma‐ebak ja mandeka ni ngaaw ja inges toy kedagdag‐a ni karakdan na tood ja dobong.
5 Enshiy eshom ma makabaal ja mengebak ni olay nem eg ira sota ememati ey si Jesus, si‐kato sota Anak nen Apo Shiyos.
Sota kabol ni kepenigorado‐i ni emati son Cristo
6 Sajay ya si Jesucristo, dimaw ali shiya dobong, jet nonta indaw to ali, ebonjagan ni shanom, tan imayos i shaleto ni inkatey tod koros. Eg maykowan ey shanom bengat i takshol to ni indaw to di, no diket naytakshol pay son si‐kato sota shala. Jet sota Ispirito Santo nen Apo Shiyos i emengikowan ey podno iyay, ta sotan na Ispirito Santo, podnon emin i ẃara son si‐kato.
7-8 Isonga ẃaray tedo ja sesakey i kowan sha pangkep son Cristo, jet sajay ira sota tedo: sota Ispirito Santo nen Apo Shiyos, sota shanom, tan sota shala, jet saja tedo, nan‐i‐inges i kowan sha.
9 No tayoka pati‐a i kowan ni too pangkep ni inon‐an sha, mas epatpateg pay i kowan nen Apo Shiyos, jet say inkowan to maypangkep son Jesus, kowan to ey, “Si‐katoy Anak ko.”
10 Jet sota ememati so nonta Anak nen Apo Shiyos, sajay ngoy shaka nemnemnema; nem sota ira eg memati, enshi, eg sha nemnemen. Ta eg sha pinati sota kowan nen Apo Shiyos maypangkep so nonta Anak to. Jet singa si Apo Shiyos et ngo mowan i kowan sha ey ma‐owap.
11 Jet sotan na kowan nen Apo Shiyos, ja mesepol la pati‐en, kowan to ey ẃaray in‐akan ton biyag son si‐katejo ja enshiy to engintegan, jet sajay ya biyag, may‐ekan bengat so nonta ira memati son Jesus ja Anak to.
12 Isonga sota ira memati son si‐kato, ẃara son si‐kara iyay ya biyag, nem sota ira eg memati son Jesus ja Anak nen Apo Shiyos, enshi son si‐kara iyay ya biyag ja enshiy to engintegan.
Sota esa‐nopan ni inkowan ko la
13 Insolat ko la iyay son si‐kayo ja emati so ni ngaran nen Jesus ja Anak nen Apo Shiyos, say penigorado‐an jo ey si‐kayo, ẃaray biyag jon enshi to engintegan.
14 Asan sakey pay ja piyan kon penigorado‐an jo, sota maypangkep ni pansheẃat jo son Apo Shiyos. Ta no mansheẃat kito son Apo Shiyos, sintilen to, no maykompas nodta piyan ton medeka.
15 Siya, toka sintila i shawat tayo; isonga sota ibaga tayo son si‐kato, amta tayo ey i‐akan to.
16-17 Emin na ngaaw wa aramid ja dag‐en ni too, maybidang ey basol. Nem eg nan‐i‐inges i pengikesho ni basol. Iman i eshom ma basol ja aliẃen patey ingkatod ingka i pantongpalan to. Nem ẃara ngoy eshom ma basol ja patey i pantongpalan to. Isonga no ẃaray inon‐an jon nanbasol ja agi jod pamati, ikshawi jo son Apo Shiyos ni kaasi, no sotan na basol to ket, aliẃen patey i pantongpalan to. No sotan i dag‐en jo, si Apo Shiyos, biyagen to sotan na agi jo. Nem sota eshom ma basol, ja patey i pantongpalan to, aliẃen sotan i kowan ko ey ishawatan jo son Apo Shiyos.
18 Amta tayo ey si‐katejon annak nen Apo Shiyos, inbi‐jag tayon manbesol ma, ta si Jesucristo ja Anak nen Apo Shiyos, si‐katoy emengitoshong son si‐katejo shi mapteng. Jet si Satanas, enshiy pesing ton onsharal son si‐katejo.
19 Amta tayo pay ey ẃara kito son Apo Shiyos, nem saja intiron dobong ja naydaokan tayo, tinngel nen Satanas.
20 Jet amta tayo pay ey sota Anak nen Apo Shiyos, dimaw ali shiya dobong jet engi‐kan son si‐katejo ni koston pannemnem say eẃatan tayo i maypangkep son Apo Shiyos, ey si‐kato i podno. Jet say kawad‐an tayo ma niman, sota podnon Shiyos, tan si Jesucristo ja Anak to. Sajay i podnon Shiyos, ja emengi‐kan ni biyag ja enshiy to engintegan.
21 Niman si‐kayon naka ikarin annak ko, tanshaaniyo; baka ẃara iray aliẃen podnon Shiyos ja pati‐en jo. Siya, satan da.