3
Si Juan ja para bonjag, inshogi toy obda to
1-3 Idi kinsin tawen ja nantoray si Ari Tibirio shi Roma, ẃaray inkowan nen Apo Shiyos ja bilin to so nen Juan ja anak nen Sakarias. Wara nontan si Juan shima dogad ja nay‐araẃid kadnan ni too. Jet ẃinasẃas ton emin i dogad shima kilig nonta ebadeg ga pa‐dok ja kowan sha ey Jordan, ja to intod‐an iray totoo. Jet say kowan to, “Mesepol la manbebawi kayo, asan kayoka manpabonjag, say pekawanan nen Apo Shiyos i basol jo.”
Nontan ngon timpo, si Poncio Pilato i gobinarol shi Jodia, si Hirodis ngod Galilia, tan si Felipe ja agi nen Hirodis shi Itoria tan shi Trakoniti. Asan si Lisanias i toray shi Abilini. Say kangeto‐an nontan ja pari, si Anas nen Kaipas.
4 Sota inpantoro nen Juan, si‐katoy nantongpalan nonta padto nen Isaias nonta bayag da, ja kowan to ey ẃara aliy toon ikeljaw toy esel to shima dogad ja nay‐araẃi shi kad‐an ni totoo, ja ikowan to ey, “Pansagana kayo ni para imotok ali nen Apo! Singpet joy shalan na pan‐akshan to!
5 No nankinayang i shalan shi shonshontog, simpayo. No kolkolba ja shalan, mesepol ja maydelteg, tan sota ngaaw ngon shalan, mesepol la medimpiyo.
6 Jet emin na too, asen shay mengisedakan ja medepo ali son Apo Shiyos.”
7-8 Say kowan nen Juan so nonta ira toon dimaw son si‐kato, ja kowan sha ey ira manpabonjag, kowan to ey, “Si‐kayo, singa oleg i ogadiyo! Say kowan jo, mebedin na disi‐an jon eg meshosa no manpabonjag kayo bengat? Enshi! Mesepol la ma‐sas shi ogadiyo ey nanbebawi kayo pangkep nonta basol jo. Karejo panshindan sota kowan jo ey si‐kayo ket poli shakejo nen Abraham. Enshi, eg on‐anay! Si Apo Shiyos, mebedinan ton osalen i bato ja palsowa‐en na too jet kowan to ey poli nen Abraham.
9 Jet niman, ẃaray naysagana ja may‐eshig ey mayẃa‐tek shi damot ni kadasan ja eg ondames ni mapteng. Emin ira jay, mebetang et maypool shi apoy.” Sajay i kowan nen Juan so ni totoon dimaw son si‐kato.
10 Jet sota ira totoo, nansalodsod ira ja kowan sha ey, “Nganto ngarod i pesing mi?”
11 Simongbat si Juan ja kowan to ey, “No showay barom, i‐kan moy sakey so nonta enshiy osal to. Kasta met no ẃaray sobdam ja mekan, i‐aknim sota ira toon enshi‐anan.”
12 Angken sota ira para singil ni bowis, dimaw ira ngon manpabonjag, jet inbag‐an sha ngo si Juan ja kowan sha ey, “Maistoro, ngaranto ngoy pesing mi?”
13 Simongbat mowan si Juan ja kowan to ey, “Niman, say singilen jon bowis ira ni totoo, sota koskoston kowan ni gobirno; karejo sodokan.”
14 Jet sota ira solsharo, kowan sha ngo ey, “Si‐kami ngay? Ngaranto ngoy pesing mi?”
Si Juan, simongbat ja kowan to ey, “Sota sowilshoyo, si‐katoy enosan jo. Ibi‐jag joy joka pesing nga mengeda ni pilak ni too ja joka ira ta‐ta‐kota tan joka pebesoli ira angken enshiy basol sha.”
15 Sota ira totoo, idi intenengan shay kowan nen Juan, kowan shen shorog shi nemnem sha ey, “Sigosho sajay emo sota inkari nen Apo Shiyos nonta bayag da ja ibetkag to din mengisedakan.” Jet shaka sesseskeren pasiya nem ngaranto pay i ikowan to.
16 Nem say kowan nen Juan son si‐kara, kowan to ey, “Nem si‐kak, dimawak ali ja shanom i inpamonjag ko son si‐kayo. Nem ẃaray ondaw alin maysa‐dat son si‐kak ja ebadbadeg i panakabalin to nem say si‐kak. Jet ekak pay maykeshi ja angken baga‐en to koma ja mengkal ni sapatos to. Jet sotan aliy onbonjag son si‐kayo ni Ispirito Santo nen Apo Shiyos, asan pay ya apoy.”
17 Jet si Juan, in‐arigan to ira ja kowan to ey, “Sotan aliy may‐eshig ey mengisi‐jan ni bekas shi taap. Sota bekas, isingpet tod tado‐an, nem sota taap, ipool tod apoy ya emanshedang ni olay ja eg ma‐ma‐shep.”
18 Sajay i inpasing nen Juan ni inpamidin to, tan na‐na‐jew pay i inpasing ton engikowan ni mapteng nga shamag so ira ni totoo.
19 Nem say inkowan to son Hirodis ja gobinarol shi Galilia, kowan to ey, “Ngaaw i inpiliw mo so nen Hirodiyas ja aseẃa nen agim. Tan ẃara pay i eshakel la ngaaw ja aramid mo.”
20 Nem si Hirodis, endedamsis to sota bilin nen Juan son si‐kato; mina‐ma to et i kakedsel to, ja inbalod to pay si Juan.
21 Idi sakey ya akew, ja naksheng iren emin sota totoo ja nanpabonjag, nanpabonjag ngos Jesus so nen Juan. Idi naksheng, nanshawat si Jesus son Apo Shiyos, jet idi maramen emansheẃat, edo‐katan i dangit.
22 Jet dimespag aliy Ispirito Santo nen Apo Shiyos son si‐kato, ja na‐sas ja singa inges toy itsora ni kalopati. Jet si Apo Shiyos, imesel alid dangit ja kowan to ey, “Si‐kam i Anak ko et ensemek taka, tan si‐kam i naka pan‐imdengi.”
Sota ngaran ira nonta makapoli so nen Jesus
23 Si Jesus, ẃaray tedon tawen to nonta inshogi ton engitosho. Jet say pangkep ira ni karakdan, kowan sha ey anak nen Jose.
Iyay i ngarangaran iren makapoli so nen Jose. Say ama nen Jose, si Eli;
24 say ama nen Eli, si Matat; say ama nen Matat, si Levi; say ama nen Levi, si Melki; say ama nen Melki, si Yanay; say ama nen Yanay, si Jose;
25 say ama nen Jose, si Matatias; say ama nen Matatias, si Amos; say ama nen Amos, si Naom; say ama nen Naom, si Isli; say ama nen Isli, si Nagay;
26 say ama nen Nagay, si Maat; say ama nen Maat, si Matatias; say ama nen Matatias, si Simi; say ama nen Simi, si Josik; say ama nen Josik, si Joda;
27 say ama nen Joda, si Joanan; say ama nen Joanan, si Risa; say ama nen Risa, si Sorobabil; say ama nen Sorobabil, si Salatiil; say ama nen Salatiil, si Niri;
28 say ama nen Niri, si Melki; say ama nen Melki, si Adi; say ama nen Adi, si Kosam; say ama nen Kosam, si Ilmodam; say ama nen Ilmodam, si Ir;
29 say ama nen Ir, si Josue; say ama nen Josue, si Ilisir; say ama nen Ilisir, si Jorim; say ama nen Jorim, si Matat; say ama nen Matat, si Levi;
30 say ama nen Levi, si Simeon; say ama nen Simeon, si Joda; say ama nen Joda, si Jose; say ama nen Jose, si Jonan; say ama nen Jonan, si Iliakim;
31 say ama nen Iliakim, si Milia; say ama nen Milia, si Mina; say ama nen Mina, si Matata; say ama nen Matata, si Natan; say ama nen Natan, si David;
32 say ama nen David, si Jesse; say ama nen Jesse, si Obid; say ama nen Obid, si Boos; say ama nen Boos, si Salmon; say ama nen Salmon, si Naason;
33 say ama nen Naason, si Aminadab; say ama nen Aminadab, si Aram; say ama nen Aram, si Arni; say ama nen Arni, si Isrom; say ama nen Isrom, si Piris; say ama nen Piris, si Joda;
34 say ama nen Joda, si Jacob; say ama nen Jacob, si Isaac; say ama nen Isaac, si Abraham; say ama nen Abraham, si Tari; say ama nen Tari, si Nakor;
35 say ama nen Nakor, si Sirog; say ama nen Sirog, si Ragaw; say ama nen Ragaw, si Pilig; say ama nen Pilig, si Ibir; say ama nen Ibir, si Sala;
36 say ama nen Sala, si Kainan; say ama nen Kainan, si Alpiksad; say ama nen Alpiksad, si Sim; say ama nen Sim, si Noe; say ama nen Noe, si Lamik;
37 say ama nen Lamik, si Matosalin; say ama nen Matosalin, si Inok; say ama nen Inok, si Jarid; say ama nen Jarid, si Makaliil; say ama nen Makaliil, si Kainan;
38 say ama nen Kainan, si Inos; say ama nen Inos, si Sit; say ama nen Sit, si Adan; say ama nen Adan, si Apo Shiyos.