12
Sota epateg ga ogadi ni toon emati son Cristo
1 Jet niman si‐kayon a‐akik shi pamati, kinaasi‐an shakejo nen Apo Shiyos; isonga iyay i kekshawen ko son si‐kayo. Niman na ẃara kayod biyag pay laeng, i‐kan jon mismo i biyag jo son Apo Shiyos ja singa daton jo son si‐kato, jet si Apo Shiyos ni olay i nemnemnemen jo. Sajay i dag‐en jo ni olay, ta sajay i mengi‐kan ni pan‐imdengan to. Sajay i koskoston pesing nga manshedjaw son si‐kato, ta eg mayba‐ba‐ngat.
2 Karejo on‐onoran i ngaaw wa aramid ni karakdan na tood ja dobong, no diket ipedobos jo koma ja si Apo Shiyos i onbaliw so ni nemnem jo say mannemnem kayo ma ni kosto. No sajay i pesing jo, amta‐en jo sota aramid ja toka kosto‐i. Jet sota piyan nen Apo Shiyos ja medeka, sotan i mapteng, sotan i enshiy kolang to, sotan i mengi‐kan ni pan‐imdengan to.
3 Ebadeg i kaasi nen Apo Shiyos son si‐kak, ni inpanbalin towak so ni apostol; isonga ibilin ko iyay son si‐kayo. Si‐kayon emin, nemnem jo koma no ngantoy koston in‐akan nen Apo Shiyos ja kabaalan jon itolong shi eshom; nem eg jo koma da‐bagan i kinapateg jo kabol nonta kabaalan jon in‐akan nen Apo Shiyos.
4 Jet say kay‐eshigan tayon emati, saja bakdang tayo. Say bakdang, sakey bengat, nem eshakel i parti to, jet eg man‐i‐inges i obda nonta parti ni bakdang.
5 Isonga angken eshakel kito, naykasakey kito son Cristo pangkep ni pamati tayo son si‐kato, jet sankagait kito ma.
6 Isonga say in‐akan nen Apo Shiyos so ni sakey tan sakey son si‐katejo ja itolong shi eshom ma emati, ekalkalasi; jet mesepol la osalen tayon emin. No say in‐akan nen Apo Shiyos ket sota baal mon mengipa‐amta nonta inpa‐amta nen Apo Shiyos son si‐kam, sotan i dag‐en mo, ja may‐enam nodta pamati tayo.
7 Jet no say amtam, ja in‐akan nen Apo Shiyos son si‐kam ket sota ontolong ni makasapol, si‐katoy dag‐en mo. No sota pengitosho i ẃara son si‐kam, pangitoro ka.
8 No say ẃara son si‐kam ket sota mengi‐kan ni kedsangan ni pamati ni eshom, si‐katoy dag‐en mo. Sota ẃaray kabaalan ton mengila‐kam ni eshom, man‐imdeng komen mengila‐kam ni eshom. Jet sota pangolo ni emati, alisto komen mengitoshong ni too to, ja eg to baybay‐an i toka pan‐itod‐i. Jet sota amta ton mengaasi, mansi‐met koma ja mengaasi ni eshom.
9 Jet sota semek jo ni kait jo, mesepol la sota podnon semek. Sota ngaaw, araẃi‐i jo, jet sota mapteng, si‐katoy nemnemnemen jo.
10 Semek joy kait jon emati ja inges toy semek jo so ni mismon agi jo, jet ẃara komay pengiredjaw jon pasiya so ni sakey tan sakey.
11 Kanas jon emin i joka dagdag‐a pangkep ni joka pansilbi son Apo Shiyos; eg kayo koma onsarot.
12 Pan‐imdeng kayo tep ẃaray namnama jo ali son Cristo. Isonga no ẃaray memedigat son si‐kayo, anosiyo. Jet panshawat kayo ni olay son Apo Shiyos.
13 Mesepol la ontolong kayo nodta kait jon ẃaray mesepol to. Tan sintil jon kosto sota eshom ja onmotok shi baley jo.
14 Sota ira memedigat son si‐kayo ali, karejo i‐abigan, no diket ikowan jo et son si‐kara ey, “Sapay koma ta bindisiyonan shakejo nen Apo Shiyos.”
15 Paki‐imdeng kayo so nonta ira man‐imdeng, jet pakidaringit kayo ngo so nonta ira emandeshingit.
16 Pan‐i‐inges jon mapteng i pesing jo so ni sakey tan sakey son si‐kayo. Aliẃen kayo ondastog, no diket pakikadẃa kayo so nonta ira ebaba. Aliẃen jo ipangkep ey si‐kayoy kalaingan.
17 No ẃaray ngaaw wa dingka ni eshom son si‐kayo, aliẃen jo ibales. Say nemnemnemen jo koma ja dag‐en, sota mapteng ja kekosto‐i ni karakdan.
18 No mebedin, dagejoy kabaalan jon mekikadẃa so ni emin na totoo, say enshiy bakal.
19 A‐akik shi pamati, aliẃen jo ibales no ngantoy ngaaw wa dag‐en ni eshom son si‐kayo. Bay‐iyo, ta si Apo Shiyos i maka‐amta ja onshosa son si‐kara. Tep ẃaray naysolat ja esel nen Apo Shiyos nonta bayag da ja kowan to ey, “Si‐kak i maka‐amten mengibedes ja onshosa nonta ngaaw i aramid sha.” Kowan nen Apo Shiyos.
20 Jet say pesing jo, patiyo sota bilin nen Apo Shiyos ja naysolat nonta bayag da, ja kowan to ey, “No sota makakontra son si‐kam ket na‐agang, pakan mo. No na‐kew ni shanom, i‐aknim ni inomen to. Ta no sajay i dag‐en mo, mebebaingan et ondeshang.” Kowan to.
21 Aliẃen jo ibales, ja mandeka ngo ni ngaaw, ta no sajay i pesing jo, singa si‐kayoy inebak ni ngaaw. Isonga sota mapteng ni olay i ipa‐sas jo son si‐kara say maynemneman ira.