14
1 No ẃara son si‐kayo i toon ekapoy i pamati to ta eg etod‐an ni kosto, awat jo sotan na too. Karekayo mekisongbat son si‐kato, no diket ipeteg jo sota ẃared nemnem to.
2 Say sakey ya nan‐i‐inapilan ni nemnem ni too, sajay. Kowan ni eshom ey palobos i pengan ni angken nganto. Nem ẃara ngoy eshom, ja eg etod‐an ni kosto, ja say ẃared nemnem sha, sota natnateng bengat i mebedin na kenen sha.
3 Nem sota toon mebedin na kenen toy angken nganto, aliẃen to koma bedawen sota nagshengan i toka kena. Jet kasta met sota sakey, eg to koma bedawen sota emengan ni angken nganto. Tep inges to ngon ineẃat nen Apo Shiyos met laeng sotan na too.
4 No eg nay‐inges i nemnem ni eshom son si‐kam, eg mo koma bedawen, tep aliẃen si‐kam i apo to, no diket si Cristo. Eg mo koma ikowan ey kosto ono aliẃen kostoy nemnem ni sakey ya baga‐en ja aliẃen si‐kam i apo to. Tep sota apo to bengat i mebedin na mengikowan no kosto ono aliẃen kostoy dingka ni sakey ya baga‐en to. Jet sota maka‐apo son Cristo, eg ira bedawen nen Cristo, tep toka ira pekedsang ni olay.
5-6 Jet say sakey pay, sota eshom ma too, ẃaray akew wa shaka ngidina; nem ẃara ngoy eshom ma too ja say ẃared nemnem sha, kowan sha ey emin na akew, nan‐i‐inges. No manngidin man ono enshi, iso met laeng, ta sota toon ẃaray akew ja toka ngidina, sota kayshedjawan nen Apo Jesus i ẃared nemnem to. Jet sota toon eg manngidin, ja emengan ni angken nganto, iso met laeng ja kayshedjawan kono nen Apo Jesus i ẃared nemnem to, ta eman‐iyaman met laeng son Apo Shiyos nonta toka kena. Jet sajay ngoy nemnem nonta eg mengan ni angken nganto. Nan‐inges iren showa ja mapteng, nem say kowan ko son si‐kayon emin, nemnem jo nin no ngarantoy koston pesing jo, no manngidin kayo ono enshi.
7 Say nemnemen tayo koma, sota piyan nen Apo Shiyos, ta no metey kito, ono ẃara kitod biyag, si Apo Shiyos ngoreshan i makakokowa son si‐katejo, aliẃen si‐katejon shorog.
8 Niman na ẃara kitod biyag, mansilbi kito so nen Apo Jesus, jet no metey kito, iso met laeng ja maytodoy i tayoka pansilbi. Isonga angken niman na ẃara kitod biyag ono metey kito, si Apo Jesus met laeng i makatoo son si‐katejo.
9 Sajay i kabol la eteyan nen Cristo, tan nanbiyagan to mowan, say si‐katoy Apo ira nonta ẃara pay laeng shi biyag, tan sota ira nanketey da.
10 Jet emin kito, onsango kito so nen Apo Shiyos shima tinongawan to, jet amta‐en tayo ma sota nanbanagan ni dingdingka tayo nonta ẃara kitod biyag. Isonga eg jo koma bedawen no ngantoy asen jon apil la ẃared nemnem ni eshom, tep agi jo met laeng sotan shi pamati; baybay‐iyo.
11 Sota isango tayo son Apo Shiyos ali, si‐katoy kaytoshongan nonta esel nen Apo Shiyos ja naysolat nonta bayag da ja kowan to ey, “Sigoradon ẃara‐ak shi biyag, jet emin na too, sigorado ngon mantedimokod ira son si‐kak, jet ikowan shay shayaw sha son si‐kak met laeng.” Kowan nen Apo Shiyos.
12 Isonga emin kito, no ngantoy dingka tayo, songbatan tayo di so nen Apo Shiyos.
13 Jet niman ma, ibi‐jag tayo sota tayoka pemedaw ni eshom. Mesepol la nemnemen tayo shorog i tayoka dagdag‐a say aliẃen si‐katejoy kabol la kepoyan ni pamati ni eshom.
14 Amtak ey mapteng nga emin i angken nganto; enshiy mesepol la en ngidinen. Jet naka pati‐a ey sajay ngoy kowan nen Apo Jesus. Nem ẃara iray eshom ma too ja say ẃared nemnem sha, kowan sha ey ẃara konoy singa ensekig jet shaka ngidinen kenen ono dag‐en. Jet siya, sota toon sajay i ẃared nemnem to, kosto sotan na panngidin to.
15 Nem no sota agim shi pamati ket esakitan i nemnem to kabol nonta kinan mon toka ngidina, singa moka pan‐ipa‐sas ey enshiy semek mo so nontan na agim shi pamati. Isonga no sota mekan i kabol la kesheshalan nonta pamati ni agim, karam kenen. Nemnem mo ey say sakey ya kabol la eteyan nen Cristo ket sota kaysedakan nontan na too.
16 Isonga say kowan ko, angken na ẃaray kanebengan mon mandeka ni sakey ya banag, pantanshaan ka, ta baka ngaaw i pengesas ni eshom.
17 Ta say epateg koma ja nemnemen tayo niman na nayda‐kam kitod pantoshayan nen Apo Shiyos, sota mapteng nga ogadi, sota talna, tan sota imdeng ja medepod Ispirito Santo nen Apo Shiyos; eg kito koma mansosongbat pangkep nonta emengidin ja eg mekan ono ma‐inom.
18 Jet no sajay i pesing mo, moka pan‐onora sota bilin nen Cristo, jet kosto‐an toka nen Apo Shiyos; tan angken pay sota kait mon too, kosto‐an shaka ngo.
19 Isonga niman ma, say mesepol la menemnem, sota mengi‐kan ni olnos, tan mengi‐kan ni kedsangan ni pamati ni eshom.
20 Kareka memasig ja mengan ni piyan mo, no sotan i meneshal ni pamati ni eshom, ta sota pamatira, obda met laeng nen Apo Shiyos. Angken nganto, mebedin na mekan ja eg bedawen nen Apo Shiyos, nem aliẃen mapteng i pengan ni angken nganto, no si‐katoy kabol la kedismaya‐an ni eshom shi pamati to.
21 Say mapteng nga medeka, sajay. No sota pengan ni apag, ono penginom ni adak, ono pandeka ni kompormi, i kabol la kepoyan ni pamati ni eshom, mesepol la maybi‐jag.
22 Say kowan ko, sota ẃara son si‐kam, si‐kato — no ngidinen mo ono enshi. Ta enshi ngoy naybiyangan ni eshom, no diket si‐kayo ngo bengat nen Apo Shiyos. Say nemnemen mo koma, sajay: sota toon man‐imdeng ni olay, si‐kato sota toon enshiy to bedawen shorog ja toka dagdag‐a.
23 Nem no say sakey ya too ket ẃaray showashowa tod nemnem to no aporbalan nen Apo Shiyos ono enshi, sotan na kowan to ey pengan to ni kompormi, eg to et ngo koma itoloy. Ta no itoloy ton dag‐en, eg kosto‐an nen Apo Shiyos, ta eg to inonod sota amta ton mapteng. Jet emin na dag‐en ni too ja eg maytotop shi toka pemati, basol to sotan.