1-2 No ẃaray bidinen mo, i‐enam mod tawen sha. No nankedakay, karam iseg‐ang nga pasiya, no diket singpet moy tebal son si‐kara, ja inges to ngoy moka panrispito so nen amam. Sota ira bedoleki, ibidang mo ey singa a‐akim ira. Jet sota ira nankeba‐kol, ibidang mo ey singa inam, jet kasta met sota ira memeshikit, ikeshim ey singa orishiyan mo ira, ja enshi komay ngaaw wa pangkep mo son si‐kara.

3 Sota ira bibiin nankebalo ja enshin polos i ontolong son si‐kara, mesepol la metodongan ira. 4 Nem sota biin ebalo ja ẃaray anak to, ono apo to, sotan iray nebeng ja ontolong son si‐kato koma, ta pamilja to met. Mesepol la sobalitan sha koma sota inpaba‐deg sha son si‐kara. Sajay i piyan nen Apo Shiyos ja toka aporbali. No sajay i pesing sha, shaka pan‐ipa‐sas ey kostoy pamatira son Cristo. 5 Sota biin ebalo ja enshin polos i ontolong son si‐kato, si‐kato komay todongan jo, ta si Apo Shiyos i toka panshindi et si‐katoy toka panshewsheẃati ni dinedabi tan inakew ja mengi‐kan ni kasapolan to. 6 Nem sota biin ebalo ja sota daddadsak i toka nemnemnema bengat, enshiy silbi to. Angken ẃara pay laeng ja emanbibiyag, singa naybilang nga etey. 7 Sota inkowan ko la, si‐katoy ibilin mo, say angken sipa, enshiy sha bedawen so nonta ira emati. 8 Sota toon eg to sintilen i partido to, agdalo sota eman‐iyan shi baley to, eg to inonod sota toro pangkep ni pamati son Cristo, jet ekarkaron ngaaw sotan na ogadi nem say ogadi ni enshiy pamati to son Apo Shiyos jen too.

9 Sota ira bibiin nankebalo ja enem ma poloy tawen sha, tan esolok, si‐kara bengat i i‐eshom mo shima dista‐an ni ebalon mesepol la metodongan ni olay ingkatod ketey sha, nem mesepol la sota pinsak bengat ja eki‐sawa. 10 Nem mesepol mowan na sota enshiy ngaaw wa ogadi to ja kebedawa ni eshom, tan sota inajowanan toy anak to ja inpaba‐deg, sota amta ton menintil ni bisita to, sota kaontolong pay so nonta ira kait ton emati, sota amta ton mengajowan ni maligdigat, tan sota kaontolong shi emin na mapteng nga obda. 11 Nem sota ira marikit ja nankebalo, angken eg mo i‐eshom nin ira nodta dista‐an ni nankebalon mesepol la metodongan ni olay ingkatod ketey sha, ta baka et ey mengebak sota nemnem shen meki‐sawa mowan ira. Jet medingding mala sota inpankari sha ja pansilbi so nen Cristo. 12 Nakol ni sajay et ngo mowan i kebedawan sha, no sajay i dag‐en sha, ta eg sha ma itoloy sota kari sha ja mansilbi ira son Cristo. 13 Tan sakey pay, baka mesiẃat ira ni aka‐akad sha bengat shi kebalebaley et manbedin ira ni esarot. Tan menomang pay ira ni kait sha; pekibiyangan sha pay i aliẃen obdara, tan baka iba‐ngat shay notnot ni aliẃen kosto. 14 Isonga say kowan ko, sota ira bibiin nankebalo ja memeshikit pay laeng, mapteng no meki‐sawa mowan ira, say manpamilja ira et say ontongaw ira ja ẃara may baley shen bantayan sha. Sajay i piyan ko, say enshiy en bedawen ira nonta enshiy pamati to son si‐katejon emati. 15 Sajay i kowan ko, ta ẃara iray eshom ma nankebalo ja ngaaw i dingkara. Say inonod sha, sota aramid nen Satanas ja ngaaw. 16 Sota ira bibiin emati ja ẃaray partido shen ebalo, si‐karay ontolong son si‐kara, say sota inedos ira nonta emati, maytodong so nonta eshom ma nankebalo ja enshin polos i kaontolong son si‐kara.

17 Iyay mowan i ikowan ko pangkep nonta pangolo ni emati. Sota ira pangolo ja mapteng i shaka pengiredan, agdalo sota ira eman‐obden pasiya ni shaka pantosho tan shaka pengikowan ni maypangkep so nen Jesucristo, mesepol la ma‐shoman i sowilshora. 18 Ta ẃaray naysolat nonta bayag da, ja kowan to ey, “Sota nowang ja emengidik ni pagey, karejo bosalen, no diket itodok jon mengan.” Tan ẃara pay i kowan to ey, “Say man‐obda, mesepol la mesowilsho‐an.”

19 No ẃaray toon kowan to ey ẃaray pangolo ni emati, ja nanbasol, karam nin patpati‐en, no sakey bengat i engikowan. Mesepol la showa, ono tedo i onpaneknek so, asan moka pati‐a. 20 No ẃaray pangolo ja ngaaw i toka dagdag‐a, togon mo shi sango‐an ni karakdan say mebidin, jet say ẃaray tekotan ngo ni eshom, ja eg sha onoran sotan na ngaaw wa aramid. 21 Jet si‐kam Timoteo, sajay i bilin ko son si‐kam et nemnem mo ni olay ey shakitoka pan‐os‐osshongi nen Apo Shiyos, tan si Jesucristo, tan angken pay sota ira anghil ja pinidi nen Apo Shiyos. Isonga say kowan ko, sajay ya bilin, si‐katoy onoren mo, jet enshi komay mo en paboran, no diket pan‐i‐inges moy pesing mo ni toon inpangolo‐an mo. 22 Kareka man‐a‐agag ja menotok ni mengipangolo ira nonta emati, ta baka manbesol sotan na too; nakol ni mayda‐kam ka nonta ngaaw wa dingka to. Nemnem mo nin asan moka dag‐a say eshalos ka ni olay.

23 Aliẃen shanom ni olay i ishenon mon inomen, no diket panginom ka ni ootik ka adak nem singka‐shom, say eg mema‐ma sota sigod ja sakit ni ekes mo, tan sota eshom pay ya sakit mo.

24 Sota ira eshom ma too, edawag i basol sha et inam‐ay i kekowis sha. Nem sota basol ni eshom, aliẃen edawag, nem ma‐amta‐an ngo eshan. 25 Kasta met i mapteng nga aramid. Waray ma‐amta‐an shagos, nem ẃaray eshom ja eg nin ma‐amta‐an niman. Nem no ma‐onod alin timpo, si Apo Shiyos, ipa‐amta to ey sotan ngo eshan i mapteng nga aramid.