24
Hay Impa'innilan Balaam
1 Hidin innilan mon Balaam an hay pinhod Apu Dios ya wagahana nadan tinanud Israel ya aggena mo minahmahan hi'on mabalin an idutana dida an umat hinan inatna ni'. Ta namaaggot ihangngutnah nan agge naboblayan.
2 Ya hidin minangmangna nan nun'allungan nadan himpahimpamu'un an tinanud Israel ya niddum i hiya nan Espiritun Apu Dios
3 ta alyonay,
Ha"on an hi Balaam an imbabalen Beor ya immannung tun ibaga'.
4 Hidin nunlu'buba' ya waday dingngol'u an imbagan nan ongal di abalinanan Dios i ha"on.
Ya wada boy impatigonan ha"on an ta'on on aggeya' nalo'.
5 Te impatigonan ha"on nadan mapmaphod an nun'allungan nadan tinanud Jacob an nungngadan boh Israel.
6 Ya hay pummangmang'u i dida ya umatdah nan damunan puntanoman an nihaggon i ha wangwang.
Ya umatda boh nadan mumpabangluh makan an intanom Apu Dios.
Ya umatda boh nadan kayiw an sedar hinan haggon di liting.
7 Ot adida makulangan hi mahapulda te nanongnan madanuman di intanomda.
Ya nan patulda ya ongal di abalinana mu hi Agag te mapemanan di pun'ap'apuwana.
8 Ya hi Apu Dios di nangikak i didah ad Egypt.
Ya ongal di abalinanda an umat hinan bikah di atap an bulug an baka.
Ta an namin nadan tataguh abobboble an mi'buhul i dida ya pundadagda an pumpanada dida ya nunggududay tungalda.
9 Ta umatdah nan layon an nalo"e ya ma"id ha natulid hi e mamangon i hiya.
Ot hanat an namin nadan munwagah i dida ya mawagahanda bo damdama.
Ya nadan mun'idut i dida ya mipabangngad i dida nan idutda.
10 Ya nangimbubbungot hi Balak i Balaam. Ta nanginggagamal hi ta'lenah bungotna ot alyonay, Inayagan da'a ta idutam dadiyen binuhul'u mu onmuot bo winagahan didah numpitlu.
11 Makak'aot ta umanamut'a. Manu te imbaga' an idat'u nan gunggunam mu ma"id te agge inyabulut Apu Dios.
12 Ya alyon Balaam di, Pinadana' attog an imbagah nadan hinnagmu an alyo' di,
13 Ta'on hi alinah alyom an patul di idatmu nan palasyum an napnuh balitu' ya silber ya adi mabalin hi ato' nan pohdo'. Te ammuna nan ibagan Apu Dios hi ibaga'.
14 Ya innayuna bon alyon di, O, mumbangngada' hi boblemih ad uwani mu ta ahiya' ume ya donglom ta ipa'innila' nan aton danaen tinanud Israel hinan tatagum hi udum hi algo.
15 Ot alyon Balaam boy,
Ha"on an hi Balaam an imbabalen Beor ya immannung tun ibaga'
16 te ha"on ya dongdonglo' nan ibagan Apu Dios ya innila' di a'atna an hiya nan na'abbaktu an Dios.
Ya hidin nunlu'buba' ya waday impatigon nan ongal di abalinana i ha"on.
17 Ya hay nipatigon ha"on ya agge ni' na'at.
Mu udum hi algo ya humawwang han ay bittuwon an holag Jacob ta mumpatul hinadan ibbanan tinanud Israel.
Ta dadagon da'yun i Moab an tinanud Set.
18 Mu nadan tinanud Israel ya mawaday ongal an abalinanda ta abakonda nadan binuhuldan i Edom ya sinakupday bobleda.
19 Te hidiyen patul nadan tinanud Israel ya dadagona bon namin nadan numboblehdi.
20 Ya nipatigo bon Balaam di ma'at hinadan tinanud Amalek ot alyonay, Ta'on on ongal di abalinan nadan tinanud Amalek hi ad uwani mu lo'tat ya madadagdah udum hi algo.
21 Ya tinigona boy ma'at hinadan tinanud Ken ot alyonay,
Nadan tinanud Ken ya nun'ahamad nan numboblayanda an umat hinan balen di hamutih nan doplah.
22 Mu lo'tat ya ma"id ha mabati i dida hitun umaliyan nadan i Assyria an mangubat i dida.
23 Ya hay na'udih hi imbagana ya alyonay,
Hi Apu Dios di ud nomnom ituwen ma'at ot undan nin waha mabati?
24 Ta wadaday munlugan hi papol an malpuh ad Cyprus ta eda dadagon hi ad Assyria ya hi ad Babilon.
Mu hay umudi ya ta'on on nadan i Cyprus ya madadagda.
25 Ya hidin indappuh Balaam ot munhi"andan Balak an way ohaon immanamut.