1 Imbabale', nomnomnomom hituwen itugun'u ta adim linglingon an mangat hinan alyo' hi atom. 2 Ta ihamadmun unudon nadan tugun'u ta hiyay nabalol i he''ah nan pi'taguwam. 3 Ta ipa'ingham an aton nimpe nadan tugun'u ta aymu intudo' hi nomnommu. 4 Ibilangmuh ay hi ibbam onu gayyum hanan tugun an mangdat hi anomnoman. 5 Te hiyay mangihwang i he''ah nadan umiluktap an binabai an ay ma''aphod di hapitonda. 6 Wada han naminghan an mun'uh'uhdunga' hinan tawah balemi 7 ya minangmang'uy mumpangilog an linala'in agge nun'anomnoman. Ya wada han ohan mapto' an agge nanomnoman 8 te inipluynah nan nundammuwan di kalata an nihaggon hi balen han babain mi'ilala'i 9 yaden nahdom mo. 10 Ya nahanawwang hidiyen babain ena pundamu yaden mapto' hinan nunlubungna an ona tuwali ninomnom an bumalbali. 11 Ya hidiye bo udot an babai ya aggena innilan bumain ya ma"id ha ono'nongna ya impa'inghanan e munhawwangan. 12 Ta kumpulnan awadan di tatagu ya wahdin munhood hi baliyana. 13 Ta umat hinan inatnah nan mangilog an lala'i an ona dinamu ot pun'idonan hiya ot awalona. Ya ma"id ha baina an namaag ya alyonay, 14 Waday ini'nong'u i Apu Dios hi ad uwanin algo ta inat'u din insapata' hi ato' ta hiya nan wahdiy makan hi balemi. 15 Ta hiya nan immaliya' ta hama'on da'a ya maphod ta inakhupan da'a. 16 Ya inabo'a' nan alo'an hinan mun'aphod di kololnan linen an nalpuh ad Egypt. 17 Ot ha''ada' boh bangbanglu an mira ya alos ya sinamon. 18 Ot ma'a ta umetah balemi ta eta mun'am'amlong an duwa hi ingganah nan mawi"it. 19 Ya alyona boy, Adi'a tumakut i ahawa' ot ma"id an adawwiy immayana. 20 Ya ongal nan pihhun binaluna ta hiya nan adi umali ta ingganah tun umongal nan bulan. 21 Ya nihapitan moh diyen lala'i an gapuh nan ma"aphod an nanapit nan babai. 22 Ot inayunan mi'uyug ta umat hinan baka an ipluynah nan pamaltiyandan hiya. Ya umat boh nan ulha an namaag ya ipluynah nan bitun agahana. 23 Ya nipaddung boh nan hamuti an inipluynah nan tawang te aggena innila an hidiyey atayana. 24 Ot hiya nimpe nan donglona' i da'yun imbabale' ta igongahanyu tun ibaga'. 25 Ta adiyu iyabulut an ihapitan da'yu i ha athidiy ababaina ta wan adiyu iwala' nan maphod an pangatyu. 26 Te gapuh nadan mumpunlayah an binabai ya dakolday linala'in nadadag di nitaguwanda. Ta adi mabilang di linala'in nun'a'ate an gapun dida. 27 Te nan lala'in e humgop hi balen nan athidin babai ya ayna inipluy hinan panton di lubu' ta hidiye nimpey lummuh atayana.