6
Nadan binabai
1 He''an apgohan an babai, on danay nangipluyan nan lala'in popohdom ta ta'omman ya binoddangan da'an e manama' i hiya?
Babai
2 Ay umman wahtu eh'a teeh tun awada'.
Te ha"on nan mi'alig hi gardena an nitanoman di dakol an pabanglu.
Ta teen ma"amlong an mangmangngalah tudan habhabung.
3 Nunhiglay naminhod'uh tun lala'in popohdo' ya atbohdiy naminhodnan ha"on.
Ta tee nimpen nunhiglay amlongnan mangmangngalah ha'ha'lung hitun awada'.
Lala'i
4 He"an babain popohdo', immannung an apgohan'a an umat'ah nan mapmaphod an bobleh ad Tirsah ya nan bobleh ad Jerusalem.
Ya umat'ah nadan tindalun numbabandela an mano"oltan manigo hi'onda mawanat.
5 Ta gapuh amaphodmu ya hay punli'na' ya aya' ma'umah hi'ona' totokkolon i he"a.
Ya mapmaphod nan miyad'addib an ibu'mu an umatdah nadan nabulog an gulding an mundayyuh nan billid hi ad Gilead.
6 Ya atbohdin ma'apullaw nimpe nayya nan bobam an umat hi pinulaw di kalnero an hiyah na'amoh.
Ya agge'a napanguwan ta an namin nadan bobam ya waday palisda.
7 Ya mapmaphod nimpe di tamelmu te ta'on on nahu'yungan ya umat i ha natommang an pomegranet di tigona.
8 Ta ta'on on wadada ha nanom (60) hi ahawan di ohan patul ya waha nawaluh (80) mibilang hi ahawana ya dakkodakkol di gayyumnan mumpangpangngilog an binabai
9 ya ma"id i dida ha nipaddung i he"an babain popohdo'.
Te hay a'apgohmu ya umat hinan mapmaphod an palluma.
Ta hiya nan he"ay pa'appohpohdon inam.
Ta hiya nan tinigon'en nadan mumpangpangngilog an binabai on alyonday umipa'amlong di ababaim.
Ta ta'on on hanadan ahawan di patul ya nadan mibilang hi ahawana ya alyonday immannung peman an apgohan di ababaim.
Nadan binabai
10 Nganne nin tayyah tuwen apgohan an babai an umat hinan mumbinang an bittuwon hinan muntalanu.
Ya umat boh nan mapmaphod an patal nan bulan onu nan humilin potang.
Ya umat boh nadan numbabandelan titindalu an punhintiggan di tatagu hi'onda mawanat.
Lala'i
11 Dimmayyuwa' hinan nundotal an nitanoman di almon ot e' tigon hi'on himmangoda ya hi'on himmaping nadan greyp ya hi'on himmabung nadan pomegranet.
12 Ya alinah on pamaag ya nunhiglay amlong'u ta hay punli'na' ya ha"on di akadkadangyanan.
Nadan binabai
13 He''an apgohan an babain i Sulam ya daan mot mibangngad'ahtu ta wan pa'tiggonmiy panayom.
Babai
Tanganu onyu pohdon an tigon di panayo' an i Sulam?