8
1 Onha nin ot ta hinagita ta ohay hi inata ya ta'on nin on idon'uh pu'olmu hinan kumpulnan pundammuwanta ya ma"id ha mangalih adi maphod hidiyen inat'u.
2 Ya mabalin an iyanamut da'ah balemi hi awadan ina an nangitudtudun ha''on hinadan maphod an pangat.
Ya mabalin nin ot an ipa'inuman da'ah nan maphod an ma'inum an danum di pomegranet.
3 Ya mabalin bon iping'uh nan iniggid an ta'lem ya inyawalmun ha"on nan winawwanmu.
4 Ot da'yun binabaih tun ad Jerusalem ya hanat adi ayu umaptun mi'gayyum.
Nadan Binabai
5 Nganne anuh diye dayyan babai an nalpuh nan na'appudut an agge naboblayan an ip'ippingnah pu'ol nan gayyumna.
Babai
Hay nanapaa' i he"a ya inggibo'mu hidin nalo'am hidih nan way nangiyayyaman inam i he"a hidih nan way pu"un nan kayiw an mansanas.
6 Ot hanat ma"id ha udum hi babaih omnawam.
Ta umata' i ha giniling an mihuhu'lub hi ta'lem ya umat hinan lubu'an an munnanannong di natehdi.
Te hanan duwan numpohhodan ya ma"id ha mabalin an mangihi"an i didan duwa.
Te nan pamhod ya imbikbikahna mu nan malanglanggiyab an apuy.
7 Ya ta'on on nan dimmakol an liting hinan wangwang ya adina abalinan an iyanud hidiyen pamhod.
Ya adi mabalin an magattang di pamhod an ta'on on atnay kinadangyan nan tagu.
Linala"i
8 Waday hi ibbamin ung'ungngan babai.
On nganne nin di atonmi hi'on waha umalih naminhod i hiya?
9 Onha ipaddung hidiyen hi ibbami hi binattun alad ya wa nin an usalonmiy silber ta iphodmih uhhunay mun'aphod an natagen bale.
Ya onha bo ha ipaddung hi panto ot wa nin an alkusanmi hi maphod an kayiw an sedar ta pungkalobmin diyen panto.
Babai
10 Nipaddunga' ni' hi binattun alad mu ad uwani ya nipaddung nan palagpag'u hi nun'atagen bale.
Ta hiya nan wa'et tigtiggona' hinan lala'in popohdo' ya nunhiglay amlongna.
11 Wada han puntanoman Solomon hi greyp hi ad Baal-Hamon an impa'abangnah tinatagu ta an naminda ya mangdatdah hinlilibuy (1,000) pihhun silber hinan punggattangandah nadan intanomda.
12 Ta hi Solomon ya ukod i hiyah nan hinlibun (1,000) pihhuna ya atbohdin ukod nadan puntamuwona hinan hindudway gahut (200) an bingayda.
Ya atbohdin ha''on an ukoda' hi pangdata' hinan garden'u.
Lala'i
13 He''an babain popohdo', innila' an wahtu'a ituwen garden.
Ot daan mo ta humapit'a te pinhod'un donglon di hapitmu ya ta'on on tudan nun'ibba' ya popohdonda damdaman donglon di hapitmu.
Babai
14 Ot agam ta butikom an patom hi pamtik di ohan hiyah nahikon an ulha.
Ta mundammutahdih nan billid an natanoman hi nun'abanglun nitanom.