28
Hay Nipa'innilah Ma'at hinan Alid Tyre
1 Inalin goh Apo Dios ay ha"in di,
2 “Ezekiel, alyom ni' hinan alid Tyre tun ibaga' an alyom di,
Nidugah anuy pumpahiyaam
an hay punnomnommu ya dios'a hinad Tyre.
Mu hay makulug ya un'a tagu ya anggay.
3 Ya undan hay punnomnommu ya nala'la'eng'a ya un din nun'ap'apun hi Daniel?
Ya undan inilam an amin di logom?
4 Manu ti dumalat di la'engmu ya immadangyan'a
ti do'ol di balitu'mu ya silvermu.
5 Ya gapu nongkay ta na'alla'eng'an mungkumildu ya immadangyan'a,
at hiyanan nen mumpahiya'a.”
6 Mu alyon nan na'abbagbagtun Dios di,
“Gapu anu ta hay punnomnommu ya nipaddung di la'engmuh dios
7 at hiyanan ipa'alinay mun'abungot an tatagun mangubat ay da'yu.
At pumpatoy da'yu,
ya numpa"idan amin di inadangyanmu ya an amin nan mun'aphod an impiyammam.
8 At pumpatoy ay da'yu,
ya nun'ogah da'yuh nan baybay ta hidiy ilubu'anyu.
9 Ya henen umaliandan mamatoy ay he"a ya mi'id mahkay di alyoman dios'a
ti un'a tuwali tagun holtapom di atondan he"a.
10 Ya umat'ah agguy nakugit an malpuh udum an babluy an mamatoy ay he"a.
Ha"in an na'abbagbagtun Dios di nanapit ete.”
Hay Nipaddungan nan Alid Tyre ay Satanas
(Isa. 14:12-15)
11 Ya inalin goh Apo Dios ay ha"in di,
12 “Ezekiel, agam ta ibaagmu nan ma'at hinan alid Tyre. An alyom di,
Hidin hopapna ya ma"aphod di pangod'odolmu ya alala'im,
ya na'alla'eng'an ali.
13 Ya wadan he"an amin di logom,
at paddungnay nunhitu'ah nan galden Apo Dios ad Eden.
Ya wadan amin ay he"a nan numbino'ob'on an nun'abalul an batu
an umat hi ma'alih ruby, ya topaz, ya emerald,
ya chrysolite, ya onyx, ya jasper,
ya sapphire, ya turquoise, ya beryl.
An amin hatu ya nidadaanda tuwali ta middum hi balitu'
an umat hinan wah hengheng unu buung ya wan mitungaw'a.
14 Ya pento' da'a ta he"ay ohan anghel an ma'alih cherub
an mangiyadug hinan paddungnay ne'nong an lugal ay Ha"in an Dios
an awadan di do'ol an nun'abalul an batu ta humili.
15 Ya nete"ah din a'ung'ungngam ya maphod di pangatmu,
mu palpaliwan ya pimmuhiy pangatmu.
16 Ya gapu ta dimmo'ol di luma'uh nan do'ol an ila'um ya un hi'itangan bimmungot'a
ya nappuhi mahkay di pangatmu.
At hiyanan luludan da'an pakakon hinan lugal an nidawat ay Ha"in,
at he"an anghel an mun'adug ay Ha"in ya mapakak'ah
dih nan awadan di umela'elat an nun'abalul an batu.
17 Ya dumalat nongkay hinan amaphodmu ya la'engmu at nundongol di aatmu,
ya numpahiya'a.
At hiyanan paddungnay intapal'u he"a ta panigtigan da'ah nan alih udum hi babluy.
18 Ti dumalat nan do'ol an baholmu ya kinulukmu ya pinuhim nan pundayawanyu.
At hiyanan ipa'ali' han apuy ta mapuulan ayu,
ya mapuulan an amin nan wah nan numbabluyanyu.
At titiggon nan tatagun dumapul nan babluyyu.
19 At nan tataguh udum an babluy ya manoh'adah nan atata'ot an ma'at ay da'yu,
at hiyah ne apogpogan di aatyun iTyre.”
Hay Nipa'innilah Ma'at ad Sidon
(Isa. 23:1-18)
20 Inalin goh Apo Dios ay ha"in di,
21 “Ezekiel, ibaagmu ni' goh nan ma'at ad Sidon.
22 Alyom ay dida an
Ha"in an na'abbagbagtun Dios ya mi'buhula' ay dida.
At hitun pummoltaa' ay dida ya innilaon di tatagu an me'gonana' an Dios,
at hiyah ne dumalat ya Ha"in mahkay di dayawonda.
23 Ya ipa'ali' di atata'ot an dogoh,
at iyatoyda.
Ya ipiyali' di buhulda ta pumpatoyda dida ta madadala nan kalatada.
At hiyah ne panginnilaandan amin an Ha"in di immannung an Dios.
24 At ma'at ay hene ya ipogpog mahkay nan tatagun ay hubit an heneggon nan holag Israel an mamalpaligat ay da'yu. Ya hiyah ne panginnilaanyun Ha"in di na'abbagbagtun Dios.”
25 Ya inalin goh nan na'abbagbagtun Dios di, “Hitun pangamunga' ay da'yun tatagu' an holag Israel an ilpu' da'yuh nan babluy an nangipa'aya' ay da'yu ya pangintitigan di tataguh nan abablubabluy an Ha"in ya anggay di me'gonan an Dios. At mumbangngad ayuh din babluy an indat'u tuwalih din baal'un ommodyun hi Jacob.
26 At malenggop ayu mahkay an mumpangipaphod hi a'abungyu, ya munhabal ayu mahkay hinan lutayu. Ya hitun pummoltaa' hinan heneggonyun namalpaligat ay da'yu, ya hiyah ne punnomnomanyu mahkay ay Ha"in an Dios.”