14
Hay Ibangngadan nan Holag Israel an Inyuy di Buhul hi Udum an Babluy
1 Hi Apo Dios ya awniat hom'on goh damdama ditu'un holag Israel
an ma'ali goh hi holag Jacob,
at hiyanan ditu'uy tataguna.
At ibangngad ditu'uh nan babluy tu'u tuwali,
ya wadaday tatagun malpuh udum an babluy an umalin middum ay ditu'u.
2 Ya umat hituy ma'at ay ditu'uh awni
ti do'olday babluy hi bumadang ay ditu'u
ta ibangngad ditu'uh tun babluy tu'u.
Ya nan tatagun umalin mi'babluy an linala'i ya binabai
ya mumbalindah baal tu'un holag Israel.
Ya abakon tu'u mahkay din nangipaholholtap ay ditu'u,
at ditu'un holag Israel di mun'ap'apun dida.
3 At pogpogon Apo Dios di abaal tu'un tataguna ta duminong mahkay nan nidugah an gun tu'u punlungdayaan ya punholholtapan an dumalat nan naligat an tamun ipilitdan ipatamun ditu'u.
4 At na'at ay hana ya ditu'u mahkay di maneldelah nan alid Babylon an alyon tu'uy,
“Natoy mahkay nan nun'appuhiy pangatnan ali,
at napogpog mahkay di pangipaholholtapanah tatagu!
5 Ti pinogpog Apo Dios di abalinana
ya nan nun'appuhin pangatna
6 an gapuh bungotna,
ya nidugah di nangipaligligatanah nan tatagun inabakdah gubat.
7 Mu maphod ta ad ugwan ya malenggopda mahkay nan tataguh abablubabluy,
at hiyanan mungkantadah amlongda.
8 Ya ta"on un nan ayiw an bolbol ya nan ayiw an cedar ad Lebanon
ya paddungnay umamlongdah natayan nan alid Babylon
ti mi'id mahkay di munlongoh ay dida.
9 Ya nidadaan nan lubu' hi pangipahigupandah nan alid Babylon.
Ya numpundadaan nan lennawan din nun'atoy
an din mun'abi'ah an numpumpapto' hitun luta an mangapnga ay hiya,
ya ta"on hi un din a'ali ya mumpangata'dogdah nan way inumbunanda.
10 Ya an aminda ya pun'it'u'dan alyonday,
Ad ugwan ya mi'id mahkay di abalinam an umat'an da'mi!
11 Ti ta"on hi un ongol di abalinam an ikankantaan da'ah nan tatagu
ya pun'ipagangohday alpah pundayawdan he"a
mu ad ugwan ya ahigo'go'may di begeh hi olo'am,
ya umat goh hinah nan miyuloh ay he"a.
12 Uya'anah ipa'ampaam ti ta"on hi un'a ni' mipaddung hi talaw ad dayan mamigat
mu paddungnay malpu'ad abuniyan ta magah'ad dolom.
Ya wan he"a din do'ol di pina"inah nan abablubabluy.
13 Ti hay ninomnommu ni' ya alyom di,
Ato' an amin di abalina'
ta la'tot ya ha"in di na'abbagbagtu ya un nan bittuan Apo Dios.
Ta ha"in di mun'ap'apuh nan duntug an a'am'amungan di numbino'ob'on an madayaw.
14 Ya inalim goh di,
Lauha' nan awadan di bunut
ta olom ya mipaddunga' hinan na'abbagbagtun Dios.
15 Mu nen un aat goh nipiyuy hinan lubu' an wad dolom,
16 at nan mannig ay he"ah di ya ihahammad da'an tigon,
ya alyondah nomnomday,
Undan hiyah te din tagun mangipawogwowogwog
hidin a'ali ya tataguh abablubabluy?
17 An numbalinonay abablubabluy hitun lutah mapulun,
ya impawanay umanamutan nan imbaludnan tatagun inilpunah nan babluy an ginubatna.
18 An amin nan a'alih nan abablubabluy
ya mun'aphod di nun'ilubu'anda.
19 Mu he"a ya matoy'an mi'id di mangilubu' ay he"a.
At mitapal di odolmuh nan nalu"ungan hinan mabinatu,
ya nun'agat'unan di odolmuh nan odol nan titindalum an nun'atoy hinan gubat,
at paddungnay inggatigatin da'a.
20 Ya manu ay adi'a milubu' an adi'a umat hinan udum an ali
ti numpa"im nan numbabluyam,
ya numpatoymu nan tatagum.
At hene ta mi'id di ma'angang hinan nun'appuhiy pangatdan holagmu
ta a'aliwan di ngadanmuh enggana.
21 At agayu ta pumpatoyyu nan imbabluy nen ali
ta miballoh nan numbaholan din o'ommodda!
Ta wan mapogpog di pun'ap'apuwandah tun luta
ya nan gunda panakupan goh hi udum an babluy.”
22 Ti hi Apo Dios an nidugah di abalinana ya inalinay,
“Pumpa"i' ad Babylon ta mi'id di ma'angang an ta"on hi un unga.
23 Ya pumpa"i' ad Babylon ta pumbalino' hi abung di kuup
ya un mamalbong ta adi mahkay mababluyan.
At paddungnay higida' ta engganah un ma'aan an amin di wah di.
Ha"in an nidugah di abalinanay nanapit ete.”
Hay Pummoltaan Apo Dios hi ad Assyria
(Zeph. 2:13-15)
24 Hi Apo Dios an nidugah di abalinana ya inalina goh di,
“Umannung an mipa'annung an amin din ninomnom'uh ato'.
25 At nan i'Assyria an wah tun babluy'u ya patayo' dida
an ta"on hi un nan wah nan aduntuduntug eten babluy.
At mapogpog di gunda pangipaligligatan hinan tatagu' an numbalinondah baalda.
26 Umat hituy ninomnom'uh aton hi an amin an babluy hitun luta,
at moltao' nan tataguh abablubabluy.
27 Ya mi'id di mabalin hi mangipadinong ay Ha"in an nidugah di abalinanan Dios
ti Ha"in di ad nomnom hi amoltaan nan tatagu.”
Hay Pummoltaan Apo Dios hinan iPhilistia
(Jer. 47:1-7; Ezek. 25:15-17; Joel 3:4-8; Am. 1:6-8; Zeph. 2:4-7; Zech. 9:5-7)
28 Hidin natayan nan Alin hi Ahaz ya hiyah te nipa'innilan ha"in an hi Isaiah.
29 Inalin Apo Dios di,
“Da'yun iPhilistia ya adi ayu umamlong hi natayan nan ali an nangipaligligat ay da'yu.
Ti nan imbaluynan mihukat ay hiyan mun'ali ya inyal'alana ya un hiya.
Ti gulat ta mipaddung hi amanah ulog
ya hay ipaddungan nan imbaluyna ya nan nidugah di habidungna.
30 Mu nan tatagu' an ta"on ahan hi unda nun'awotwot ya ipapto"u
an umat hi aton di mumpapto' hi kalnilu ta lumenggopda.
Mu da'yun iPhilistia ya ipa'ali' di batel ta mun'a'atoy ayun amin.
31 At ngumugngug ayun iPhilistia ti na'uyday do'ol ahan an titindalun
nalpuh appit hi iggid hi un hagangon di buhu'an di algaw
an numpundadaan an mi'gubat.”
32 At hay pambal tu'uh nan umalin munhanhan an malpud Philistia?
Alyon tu'uy,
“Hi Apo Dios an nangipata'dog hi ad Zion ya Hiyay ihi'uganmin
nun'awotwot ahan an tataguna ta mibaliw ami.”