16
1 Nan ma'angang an iMoab an lumayaw an umuy ad Sela an neheggon hinan mapulun
ya impiyaliday do'ol an uyaw an kalniluh ipa'dawdah nan alih tud Judah.
2 Ya nan binabai ay atog an iMoab an bumad'ang hinan wangwang hi ad Arnon ya ma'aladyawdan
umatdah nan na'abul an hamutih nan buyada.
3 Ya danen iMoab an nangiyalih kalnilud Jerusalem ya inalidan da'min iJudah di,
“Ituduyu ni' di atonmih maphod!
Ya hom'on da'mi ni' ahan
ta mabalin ay ni' ya umali amin milidum hitun babluyyu
ti nidugah ahan di potang an namamah nan mapuyaw.
4 Ya abulutonyu ni' ahan ta ibaliw da'mih nan pumatoy
an buhul an nidugah di bungotda!”
Ti awniat mapogpog nan mamuhul ay da'mi,
at duminong nan punligatanmi ti ma'ubahdah tun luta.
5 At mun'ali mahkay nan holag David an dumalat di pamhodnah nan tatagu.
Hiya ya nahamad di pangatna,
ya nepto' di atonan mangipanuh hi tatagu.
6 Ya inalin din tatagud Judah di,
“Dengngolmin nidugah di pumpahpahiyaanyun iMoab ya ngohoyyu,
mu ad ugwan ya mi'id di hulbin nan pumpahpahiyaanyu.
7 At hiyanan kilaanyuy napa"ian di babluyyu.
Ya miyal'allay lumungdayaanyuh unyu nomnomon din
mun'apolhat an tanudyud Kir Hareseth.
8 Ya nan nun'itanom hinan punhabalan ad Heshbon ya mun'a'lengda.
Ya umat goh hinan nitanom an greyp hi ad Sibmah
an alpuwan din mun'aphod an miyammah bayah
an gun mamutong hinan a'ap'apuh nan abablubabluy.
Ti hay natamman hi greyp ya engganad Jazer ta numpa'uy hinan mapulun
ya hinan Natoy an Baybay an manaphapeng ya adudu"oy.
9 Mu awniat pa"ion di buhul nan natamman hi greyp.
At ta"on hi un ha"in ya kumilaa'
ti adyu'a ahan nan greyp hi ad Sibmah, ya ad Jazer, ya ad Heshbon, ya ad Elealeh.
Ti mami'id mahkay di mapugah an bungbungaan
ya nan udum an mangipa'amlong hinan tatagu.
10 At mapogpog nan nidugah an pun'amlongan nan tataguh unda mumpugah hi greyp.
Ti mi'id mahkay din madngol an mungkanta,
ya ahi'i'ingal hinan gunda pumpogohan ni' hi greyp
ti pinogpog'u din gunda pun'am'amlongan.
11 At hiyanan kumilaa' ya munlungdayaa' hinan na'at hi ad Moab
an namamad Kir Hareseth.
12 At nan iMoab ya ta"on hi unda gun umuy hinan gunda pundayawan
hinan do'ol an dayawondah nan awadan di pun'onnganda
ya unda hay mumbolay ya anggay.
Ti nan dayawonda ya mid abalinandan mangibaliw ay dida.”
13 Ya nahhun tuwalin ina'allin Apo Dios daten ma'at hinan iMoab.
14 Mu ad ugwan ya alyonay, “Mala'uh mahkay di tuluy tawon ya mami'id an amin nan inadangyan di iMoab. Ya tuttuluy ma'angang hinan tataguh di, mu mahmo'dan mi'id di abalinanda.”