27
Hay Abaliwan nan Holag Israel
1 Henen a'atana ya moltaon mahkay Apo Dios nan ay ulog an Leviathan hinan baybay,
at mi'id mahkay di aton nen munleppotan an ay ulog an mamalbalin ditu'un tatagu.
2 Ya alyon Apo Dios di,
“Umamlong ayu mahkay ta ikankantayuy pinumhodanyu
an umat hinan natanoman hi greyp an mamunga.
3 Ti Ha"in an Dios di manalimun hinan inatanom'un greyp ta gun'u hibugan,
ya iyadug'uh abigabigat ta mi'id di mama"i.
4 Ti adia' mahkay bumugot.
Mu wadada ay di puma"i an buhul an paddungnay pagat ya gulun
ya gubato' dida ta engganah un'u puulan dida ta ma'ubahda!
5 Mu wa ay ta pohdon nan buhul an baliwa' dida
ya mahapul an mi'pohhodandah mahhun ay Ha"in,
at adi' ubahon dida.
6 Ya udum hi algaw ya nan tatagu' an holag Jacob an hi Israel di ohah ngadana
ya mipaddungdah nan ayiw an nihamad an limmamut,
at do'ol di bungana,
at la'tot ya nihinap hi abablubabluy hitun lutay bungana.”
7 Ya inali' an hi Isaiah di,
“Manu ay umat hinay ma'at
ti hi Apo Dios ya moltaon ditu'un tataguna,
mu adi umat hinan nidugah an atonan mummoltah nan buhul tu'u.
8 At pumpakak ditu'un ten numbabluyan tu'u ta iyuy ditu'uh nan buhul tu'uh udum an babluy.
At paddungnay un ditu'u itayap hi puo' an malpuh appit hi buhu'an di algaw.
9 Mu gahin hi un tu'u du'gon di gun tu'u pumbaholan ya unna aliwan di bahol tu'u.
At pumpa"i ya nunggimu'nan amin nan batun pun'onngan hi incense
an gun tu'u pangidawatan hinan bulul di udum an tatagu
ta engganah un mumbalin hi hupu',
ya ta"on un nan inyamma tu'un pundayawan ay Asherah.
10 Ti minganuyda nan nun'a'allup an babluy tu'u an umatdah nan mapulun.
At hidiy umayan nan babaka,
ya nun'alatda nan hapang di a'ayiw,
11 at mun'ahpa'da,
ya wa ay ta mun'alanguda ya pinateng nan binabai ta itunguda.
Umat hituy ma'at ay ditu'u ti din'ug tu'uh Apo Dios,
at umat tu'uh nan mi'id di nomnomna.
Ya Hiyan Dios an nunlumun ditu'u ya adi ditu'u hom'on.
12 Mu udum hi algaw ya ohha'ohhaon ditu'un amungon an holag Israel an mete"ah nan Wangwang an Euphrates ta engganah pogpog di ad Egypt.
13 Ya henen a'atana ya ma"adngol nan ipagangoh tu'un talampet an pangayag tu'uh nan i'ibba tu'un mun'a'utaw hi ad Assyria ya ad Egypt. At mumpumbangngadda ta middumdan ditu'un mundayaw ay Apo Dios eden pento'nan duntug ad Jerusalem.”