43
Nan Baliw di Holag Israel
1 Mu inalin Apo Dios di,
“Adi ayu tuma'ot an da'yun holag Jacob
ti Ha"in an nunlumun da'yu ya ibaliw'u da'yun pento"uh tatagu'.
2 At ta"on hinan bumad'anganyuh nan maluhung an wangwang
ya wagwadaa' an pi'yibbayu ta adi ayu tuma'ot.
Ya hinan himbumaggan dumalananyuh nan apuy ya adi ayu malahuan.
3 Ti Ha"in an Dios an dayawonyun holag Israel di mangibaliw ay da'yu,
at inganuy'ud Egypt, ya ad Ethiopia, ya ad Seba ta mapogpog di abaalyu.
4 Ti nabalul ayun Ha"in,
ya pa'appohpohdo' da'yu,
at hiyanan mun'a'atoyday udum hinan tatagu ay danen babluy hi pamaliwa' ay da'yu.
5 At hiyanan adi ayu nongkay tuma'ot ti wadaa' an mangipapto' ay da'yu,
at pa'anamuto' da'yu ya nan imbabaluyyu ta taynanyu nan awadanyun babluy
hi appit hi buhu'an di algaw ya appit hi alimuhan di algaw.
6 Ya umat goh hinay ato' ay da'yun miwa'at hi abablubabluy hi appit hi iggid ya agwan
hi un hagangon di buhu'an di algaw,
ya an amin nan tatagu' an miyuy hi adadagwin babluy.
7 At an amindan imbilang'uh tatagu' an limmu'
ya olom ni' ya dayawona'.”
8 Ya inalin goh Apo Dios di,
“Amungonyu nan tatagun waday matada mu paddungnay unda nabulaw,
ya waday ingada mu paddungnay unda napu'it.
9 Ya an amin nan tataguh nan abablubabluy ta ma'amung ayun amin
ta ibaagyuh un ngadan hinan dayawonyuy nangulgud hinan ma'ma'at hi ad ugwan.
Wada mah di mun'ihtigun alyonay,
Nahhun tuwalin impa'innilan nan dayawonmi ay da'mi daten ma'ma'at hi ad ugwan.
10 Mu Ha"in an Dios ya da'yun holag Israel di ihtigu',
ya da'yu goh di pento"uh baal'u ta innilaona' ay da'yu.
Ya Ha"in di unudonyu,
ya ma'awatanyun Ha"in ya anggay di Dios an mi'id di udum.
At nete"ah din hopapnah enggana ya mi'id di udum hi Dios an Ha"in ya anggay.
11 At Ha"in ya anggay nongkay di Dios
an mi'id di udum hi managuh tagu.
12 Ya nahhun tuwalin impa'innila' ay da'yu an ibaliw'u da'yu,
at hiyay ato'.
At ihtiguanyu an mi'id hinan dayawon di udum an tataguy nangat hi umat hitu.
13 Ya minaynayun an Ha"in di Dios hi enggana,
ya mi'id di mabalin hi manangga ay Ha"in.
Ya mi'id di mabalin hi munluman hinan ninomnom'un aton.”
Nan Homo' Apo Dios ya nan Adi Umunudan nan Holag Israel
14 Hi Apo Dios an Baliw tu'u an nahamad di niyatanan ditu'un holag Israel ya inalinay,
“Hay ato' an mangibaliw ay da'yu
ya honogo' di mangubat hinan iBabylon ta pumpa"iday pantaw di allupda,
ya pinilitda didan ilugan hinan pupul an ipahiyada,
at nunnaud di ipa'ampaanda.
15 Ti Ha"in an Dios an Aliyu ya nahamad di niyata'
ay da'yun holag Israel,
ya Ha"in goh di nunlumun da'yu.
16 Ya Ha"in goh din nangiyammah dalan hinan gagwan di Mumbolah an Baybay
ta namaganan hi dinalan nan tatagu' hidin nadnoy.
17 At hidin nitnudda nan mun'abi'ah an tindalud Egypt an numpuntakay hi kabayuy udum
ya kalesay udum ya numpunlonongdah nan baybay,
at nun'atoydan umatdah nan nadop an kingki.
18 Mu danen na'at hidin nadnoy
ya agguy nipaddung hinan ato' hi ad ugwan.
19 At heten ato' ya balbalu
ti iyamma' di dalan hinan mapulun ta dalanonyun tatagu' an umanamut.
Ya lumuwo' di wangwang hidi
20 ta waday inumonyu an pento"un tatagu' hi pange'wanyuh di.
At munyamandan Ha"in nan jakal ya kuup an nan animal hi inalahan hinan danum an inumondah dih nan mapulun.
21 Ti da'yun tatagu ya limmu'
ta da'yuy mangipa'innilah anabagbagtu' hinan abablubabluy.
22 Mu nihimung an adi ayu mumpabadang ay Ha"in
ti hiniganana' ay da'yun holag Israel.
23 Ya agguy ayu nun'onong ay Ha"in hi kalniluh Onong an Moghob,
ya mi'id goh di ene'nongyuh nan udum an me'nong an pundayawyun Ha"in.
Mu agguy'u da'yu pinaligat ti agguya' numbagah e'nongyuh Onong an Ma'an unu incense.
24 Ya agguya' goh inla'uan hinan ma"aphod di hunghung di ahu'nan miyammah incense,
ya agguya' impa'amlong hinan taban di animal hi Onong an Moghob.
Ti un at goh nan pumbaholan di inyal'allayun inat,
at impahigaa' ay danen nun'appuhin ina'inatyu!
25 Mu ta"on hi un umat hina ya aliwa' di numbaholanyu
an adi' mahkay nonomnomon ti umat hina tuwaliy aat'u!
26 At aga ta punhahapitanan tu'u
ta ibaagyuh un immannung an mi'id di baholyu.
27 Din nahhun an ommodyuh din hopapna ya nan a'apuyu ya din'uga'
an agguya' inunud.
28 At hiyanan ipa'aan'u nan papadih nan Timplu ta adia' itamuan,
ya iyabulut'un mapogpog ayun holag Jacob ta mabainan ayuh tun ad Israel.”