45
Hay Namto'an Apo Dios ay Cyrus
1 Hi Apo Dios ya pento'nah Cyrus hi mun'ali,
at hiyay iyabulutnah mangabak hinan alih abablubabluy ta mapogpog di pun'alianda.
Ti pun'ibughulday pantaw di allup nan babluy ta adi mahkay mitangob.
Ya hay inalin Apo Dios ay Cyrus ya inalinay,
2 “Mahhuna' ta idadaan'uy pange'wam
an paddungnay pundotalo' nan aduntuduntug
ya numpa"i nan gumo' ya gambang an pantaw nan babluy.
3 Ya idat'un he"a nan inadangyan an nun'abalul
an impo"oydah nan munhehellong ta adi ma'innila
ta panginnilaam an Ha"in an Dios an dayawon nan holag Israel di nangayag ay he"a ya nanginnilah aatmu.
4 Manu ay he"ay inayaga' ya ta badangam nan baal'un holag Israel an pento"uh tatagu'.
Ongol di a'al'alyam hinan inat'u an ta"on hi unna' agguy inilan he"a.
5 Ha"in hi Apo Dios,
ya mi'id di udum hi Dios ti Ha"in ya anggay.
Ya idat'uy nidugah an abalinam an ta"on hi unna' agguy inilan he"a.
6 Ya manu ay umat hinay inat'u ya ta panginnilaan an amin nan tatagun
mete"ah appit hi buhu'an di algaw hi engganah alimuhan di algaw
an mi'id di udum hi Dios hi un bo'on Ha"in ya anggay.
7 Ti Ha"in di nunlumuh mapatal ya nan helong,
ya Ha"in di mangidat hi awagahan ya umat goh hinan punligatan.
At an amin hatu ya Ha"in an Dios di alpuwanda.
8 Ya Ha"in goh di mangidat hi ipaphodanyu ta nahamad di pangatyu
an umat hi udan an ipa'ali' ta tummol di nitanom.
At Ha"in an Dios di mangat ay dane.
9 Mahmo' nan tagun mi'hongngel hinan nunlumun hiya!
Ti undan mabalin ta nan uklit an banga ya alyonah nan manuwin ay hiyay,
Idinongmuat an manuwin ay ha"in ti nihallay pangatmu an mi'id di ko'od'u.
10 Ya undan way ungah mangalih nan ommodnay,
Anaad ta umat hituy inatyun nangamma ay ha"in?”
11 Hi Apo Dios an me'gonan an nahamad di niyatanan ditu'un holag Israel
ya nunlumuh an amin an wada ya inalinay,
“Undan waday biyangyun munlilih nan mahapul an ato' hinan imbabaluy'u?
Ya adi mabalin an ituduyuy ato'!
12 Ha"in di nunlumuh tun luta ya an amin hinan tatagun numbabluy hitu,
ya umat goh an Ha"in di nunlumud abuniyan ya nan adi mabilang an bittuan ad daya,
ya na'na'unnuddah nan imandal'un dida.
13 Ya Ha"in goh di namto' ay Cyrus ta atona nan pohdo' an ma'at,
ya Ha"in di mangitudtudun hiyah an amin an atona.
At ipaphodna nan nun'apa"in babluy'ud Jerusalem,
ya impa'anamutna nan tatagu' an inyuy di buhul hi udum an babluy.
Mu adi malagbuan an mangat ay dane.
Ha"in an nidugah di abalinanan Dios di nanapit ete.”
14 Ya inalin goh Apo Dios ay ditu'un iJudah di,
“Nan inadangyan nan i'Egypt ya iCush ya midat ay da'yu,
ya nan nun'atata'nang an iSabea ya mumbalindah baalyu.
At mangun'unuddan da'yu an mabangkilinganda,
ya munluungdah hinagangyu ta ipattigday pumpa'ampaandan alyonday,
Immannung an wadah Apo Dios ay da'yu,
ya mi'id di udum hi Dios hi un bo'on Hiya ya anggay!”
15 Hiya an Dios an mangibaliw ay ditu'un holag Israel an tataguna
ya umipanoh'ay pangatna.
16 At an amin nan tatagun gun mangiyammah bulul hi dayawonda
ya mipa'ampada ta mabainanda.
17 Mu ditu'un holag Israel ya immannung an ibaliw ditu'un Apo Dios
ta adi tu'u mabainan hi mid pogpogna.
18 Ti hi Apo Dios an nunlumud abuniyan ya ta"on hi un tun luta ta waday panuhna
ta mabalin an punhituwan di tatagu ya inalinay,
“Ha"in ya anggay di Dios an mi'id di udum.
19 Ya adi naligat di panginnilaanyuh nan pohdo' hi atonyun holag Israel
ti inhapit'uh nan nalakan ma'awatanyu.
Ya agguy'u inalin da'yuy adi' iyabulut,
at hiyanan mabalin an mi'yunnudan ayun Ha"in hi unyu pohdon.
Ha"in an Dios ya makulug di ipa'innila'.
20 At da'yun inyuy di buhul hinan abablubabluy ya ma'amung ayu ta humalyaon da'yu.
Ti undan adi manangpah nan tagun mangitata'in hinan bulul an ayiw di niyamma
ta diday pumpabadanganyu
an ta"on hi unda adi abalinan an mangibaliw ay da'yu?
21 Ma'amung ayu nongkay ta punhahapitanyu,
ya imbaagyuh un way ibadang nan pundayawanyuh nan dayawon di udum an babluy.
Un mah udot waday udum an madayaw hi nangipa'innilah din penghana ay daten ma'ma'at hi ad ugwan?
Mi'id ti Ha"in an hi Apo Dios ya anggay!
Ya mi'id tuwaliy udum hi mangibaliw ay da'yun tatagu'
ti Ha"in ya anggay di makulug di pangatna.
22 At hiyanan an amin ayun tataguh nan abablubabluy hitun luta
ya Ha"in di pange'kodanyuh mamaliw ay da'yu.
Ti mi'id di udum hi Dios an Ha"in ya anggay.
23 Ya immannung hanan inali' an adi mibahhaw.
Ya awniat munhippin amin di tatagu ta dayawona',
ya alyonday Ha"in ya anggay di unudonda.
At immannung an hiyah ne ma'at.”
24 At hitun a'atana ya awniat alyon di tataguy,
“Hi Apo Dios ya anggay di alpuwan nan nahamad an punnomnom ya bi'ah!”
Mu an aminda nan bumobohhol ay Hiya ya mabainanda
25 ti inalinay,
“Ha"in an Dios ya ibilang'u da'yun holag Israel hi maphod,
at Ha"in di dayawonyu.”