7
1 Ya intuluy Job an himmapit an inalinay,
“Undan adi tuwali naligat di nitaguan di tagu?
Munholholtap tuwaliy tagun umat hinan baal an naligat di nitaguana,
2 ya umat hinan himbut an pohpohdona ahan an milidum,
ya umat goh hinan bumo'la an un hay bino'lanay hodhodona.
3 Ya umat goh ay ha"in ti naluh di do'ol hi bulan ya mi'id di hulbin tun nitagua',
ya amahdomahdom ya un hay lungdayay nawadan ha"in.
4 Ya wa ay ta molo'a' hinan mahdom ya unna' patu'alon hinan nolo'a'
ti adukkoy di labi,
ya adi umali enlo"u,
at unna' bumanallibalin ta engganah mawa'ah.
5 Ya tun odol'u ya nalipuh hi gulid,
ya nabigihan ya nun'abhi nan poghah tun up'up'u,
ya numpangabuhu' di nona.
6 Ya ten munnaud di alpahan di algaw'u
ya un nan apuhan di hinulid an nitalunay hinan tantan an pangugut.
7 Nomnomom ni', O Dios, an heten nitagua' ya un umat hinan mumpenghan an yahhiyah,
ya ten nalpah an mi'id mahkay di amlong'u ti magadyuh di pogpog tun nitagua'.
8 At nan mamannig ay ha"in hi ad ugwan ya adia' mahkay tigon,
at gulat ta anapona' mu mi'id di ah'upanda.
9 Nan bunut an miho'nap ya un na'amtang ya na'ubah,
ya umat hinay tagun matoy ya nilubu' ti mami'id.
10 Ya adi ahan mumbangbangngad hi abungna,
at la'tot ya inaliwan nan nanginnilan hiya.
11 At hiyanan adi mabalin hi unna' dindinong
ti mahapul an ibaag'un he"ay aat tun nunheglan holholtapo'
an hiyah ne dumalat hi punlilia'.
12 Anaad ta iya'aduga' ay He"a?
Unna' dan umat hinan atata'ot an animal hinan baybay an mahapul miyadug?
13 Ya alyo' di molo'a' ta mun'eblaya',
ya ta way aton nan holholtapo' an malengleng,
14 mu gunna' ipata'ot ay He"a an dumalat nan gunmu ipa'enap ay ha"in.
Do'ol kangan di impattigmun ha"in an atata'ot!
15 At on'onaynah unna' mumbet'ol ta matoya'
ya un nan atagua' an munholholtap!
16 Pahiwo' di umat hitun pi'taguan ti ten himmigaa',
at adia' bagbagan ti mi'id di hulbin damdamay pi'tagua'!
17 Anaad udot ta un ami tagu ya anggay,
ya nomnomon da'mi ta halimunan da'mi?
18 Ti gunmu hamadon an tigon hi abigabigat hinan ahelhehelhelong,
ya gunmu goh tapngan.
19 Maphod nin hi unna' adi tigon ay He"a an ta"on hi un na'amtang
ta way ato' an mun'eblay!
20 Gulat ta numbahola' ya undan way inat'un He"an mun'ad'adug hi tagu?
Anaad ta ha"in di popot'om hi punholtapom?
Undan ha"in di umidat hi aligatam?
21 Undan adi ahan mabalin an aliwam di bahol'u?
Ti hi awniat milubu'a',
at anapona' ay He"a,
mu mi'ida' mahkay.”