9
Hay Nambalan Job ay Bildad
1 Ya tembal Job an inalinay,
2 “Inila' an immannung nan inalim,
mu hay aton mah di tagun mihamad di aatnah pannig Apo Dios?
3 Ya mi'id goh ah ohah way abalinanan mi'tutut ay Hiya,
ya mi'id di ohah pambalnah nan linibun imbagana.
4 Hi Apo Dios ya inilanan amin di logom,
ya nidugah di abalinana,
ya mid ah namohol ay Hiyah adi mamolta.
5 Hi Apo Dios ya abalinanan mangipahlig hinan aduntuduntug,
ya pa"ionah un bumungot.
6 Hiya ya ipa'alyogna tun luta
ta mumpange'ehang nan nipognadana.
7 Ya abalinanan mandalon nan algaw ta adi pumtang,
ya haniana nan abittubittuan ta adida dumilag.
8 Ya unna inohhaan an name'lag hi ad daya,
ya anggay Hiyah dimmalan hinan tu'yap di dalluyun hinan baybay.
9 Limmunan amin di abittubittuan an ma'alih Bear, ya Orion, ya Pleiades,
ya nan udum goh ta inhinana didah did daya.
10 Ditu'u ya adi tu'u pa"innilah nan nidugah an gunna aton hinan logom,
ya mi'id pogpog nan umipanoh'an gunna aton.
11 Ya ta"on hi un maluh hi Apo Dios hinan wada' mu adi' tigon Hiya,
ya ta"on hi un meheggon ay ha"in ya adi' elan.
12 Gulat ta idatnay atoy hinan ohan tagu ya mi'id ah mangipadinong ay Hiya,
ya mi'id goh ah ohah tagun mangitulid an mangalin Hiyay,
Anaad ta umat hinay atom?
13 Hi Apo Dios ya adi ahan ma'al'alu' hi un bumungot.
Hiya ya pa"ionan amin di mi'buhul ay Hiya
an ta"on nan ma'abbi'ah an mi'hanggan Hiya
an umat hinan atata'ot an animal an wah nan baybay.
14 Hay ato' mah an mambal ay Hiya,
ya hay pambal'un Hiya?
15 Ya ta"on hi unna' agguy numbahol ay Hiya mu mi'id di inila' hi pambal'un Hiya,
at hay ato' ya un'u iyal'alu' ta ehmo'ana' ay Hiyan na'abbagbagtun Huwis.
16 Mu ta"on hi unna iyabulut an humapita'
mu adi' kulugon hi unna abuluton di hapito'.
17 Ya ipa'alinay puo' ta way mama"in ha"in,
ya inudmana tun holholtapo' an ta"on un mi'id di dimmalat.
18 Ya nunnaud an mahonhonod di ipa'alinan ligat ay ha"in
an adina ahan battanan.
19 Ya gulat ta usalo' di bi'ah'u ya adi ahan mipaddung hinan bi'ahna ti Hiya ya nidugah an ma'abbi'ah,
ya gulat ta idiklamu' mu mi'id ahan ah mabalin hi umihtiguh pangabak ay Hiyah nan mihumalya.
20 Ya ta"on hi un mi'id di bahol'u mu hay aat nan panapit'u ya ay ihunay unna' numbahol,
at an amin nan panapit'u ya hiyay mangipa'annung hi mihumalyan ha"in.
21 Ha"in ya agguya' numbahol,
mu ta"on ya paddungnay mi'id hulbinan ha"in nan nitagua'.
22 An amin tu'u ya numpapaddung di aat tu'u,
at hiyaat un'u alyon di,
Nan mi'id di baholna ya nan numbahol ya numpapaddung ti ubahon ditu'un amin hi udum di algaw.
23 Ma'akikkih Apo Dios hi un himbumagga
ya natoy nan mi'id di baholnan tagu.
24 Indat Apo Dios nan abablubabluy hitun lutah nan nappuhiy pangatdan tatagu,
ya lini'dupanay matan an amin nan huhuwis.
Ya gulat ta bo'on hi Apo Dios di nangat at hay nangat mah?
25 Nan algaw an gutud ten amatagu' ya ag'agan maluh ya un nan mi'tagtag,
at hiyanan maluh ya mi'id di pohpohodna.
26 Ya umat goh hinan pupul an mabi'ah an umuy,
ya nan agila an un himbumagga ya nayaynop,
ya hene'matna nan tigonan onona.
At mi'id ah ohah way abalinanan mi'hanggan Hiya ta abakona.
27 Ya gulat ta alyo' di,
Adia' munlili, ya linglingo' nan holholtapo',
at hukata' nan punlungdayaa' ta umemeha'!
28 Mu heten holholtapo' ya hiyay mangipata'ot ay ha"in
ti inila' an hi Apo Dios ya adia' ibilang hi mi'id baholna.
29 Ina'allin Apo Dios an nabaholana',
at mi'id hulbinah un'u alyon di agguya'.
30 Ta"on hi unna' mun'amoh ta hobono' di odol'u
ya inihu'a' di ngamay'uh nan ma'abbi'ah an hobon
mu adia' damdama pa"aan hi bahol'u.
31 Hi Apo Dios ya itapala' hinan bitun ma"agub ta ilamut'uy lugit
an ta"on nan lubung'u ya iyabaina'.
32 Maphod un umat hi taguh Apo Dios,
at mabalin an tabolo' nan alyona.
Ya mabalin an iyuymih nan huwis nan diklamumi ta way aton nan lilimin mipanuh.
33 Mu mi'id ah ohah way abalinanan mangipanuh
ay da'min duwah nan lilimi!
34 Ya maphod goh un waday ohah way abalinanan mamogpog ay Apo Dios
hinan gunna pummoltaan ay ha"in ya ta adia' ta'tan.
35 At mabalin an humapita',
ya adia' mahkay tuma'ot ay Hiya.
Mu ad ugwan ya adi mabalin an humapita'.”