2
Hay Nummoltaan Apo Dios ad Jerusalem
1 Hi Apo Dios ya nidugah ahan di namainanah nan tatagud Jerusalem
an dumalat hinan nidugah an bungotna,
at pina"ina nan nundongol ya na'ahhamad an babluy nan holag Israel,
ya ta"on un nan Timplu ya ni'pa"ina goh.
2 Agguyna ahan hemmo' nan tatagud Judah,
at pina"inan amin nan numpunhituwanda,
ya ta"on un nan nihamad di allupna an dumalat nan nidugah an bungotna.
At inyabulutnan mabainandan amin an namamah nan a'ap'apuda.
3 Ya dumalat nongkay hinan nidugah an bungotna ya inubahnay abalinanda an holag Israel,
at agguyna binadangan didah din nangubatan din buhuldan dida
ti umat hinan aton nan apuy di nangatnan namatoy hinan holag Israel.
4 Ya umat hi Apo Dios hinan buhul an enladnay panana,
ya nundadaan goh an mi'patoy an umat hinan ma'abohhol an tagu.
Ya impapatoynah did Jerusalem an amin nan iyamlongdan imbabaluyda,
at impale'nanay nidugah an bungotna an umat hi apuy.
5 Hi Apo Dios ya numbalin nongkay hi ay buhul,
at numpatoyna nan holag Israel.
Ya ta"on un nan nun'ihamad di allupna an a'abung nan a'ap'apu ya numpa"ina goh,
at nidugah di kilada ya lungdayada.
6 Ya ta"on un nan Timplu ya inyabulutna ta pina"in nan buhulda an ay allung hinan payaw,
ya hidih Zion ya pinogpogna nan gun ma'at an behta ya nan ngilin an algaw an tungaw.
Ya dumalat goh nan nidugah an bungotna ya ingnganuyna nan ali ya nan padi.
7 Ti din'ug Apo Dios nan pun'onngandan Hiya,
at mi'id mahkay di me'nong ay Hiya
ti inyabulutna ta numpa"in di buhulda nan dedengna.
At na'amung hidi nan buhuldan mun'am'amlong hi nangabakanda
an ahi'i'ingaldah nan Timplu an ay ihunay un way behta!
8 Mu ninomnom tuwalin Apo Dios an pumpa"i nan allup hinan nunlene'woh ad Jerusalem,
at impa'annungnan nama"i an mi'id di oha ahan hi batuh na'angang.
Inyabulutnay napa"ian nongkay nan allup di babluyda ya nan miyadwan allupda,
at paddungnay kumila nan allup ti mi'id mahkay di hulbida.
9 At nun'atob nan o"ongol an apantapantaw nan allup ad Jerusalem,
ya nun'aputung nan da'igda.
At inlayaw nan buhul nan ali ya nan udum an ap'apudah udum an babluy,
at mi'id mahkay di gun donglon nan tataguh nan Tugun Apo Dios,
ya ta"on nan do'ol an propeta ya mi'id mahkay gun ipattig Apo Dios ay dida.
10 Din mun'a'e'gonan an a'ap'apud Jerusalem ya namaag ya unda inu'umbun an didindinong hinan luta,
ya nun'iloglogday hupu',
ya numpunlubungdah nan nun'apa"in langgut ta pangipattigandah punlungdayaanda.
Ya ta"on un din ungungan binabaid Jerusalem ya numpunluppulupdah nan luta.
11 Ya ha"in ay ya numpangalatunnu' tun mata' hi limmugwalugwaa',
ya maguguluy punnomnoma',
ya namaagan milukuy di odol'uh numanomnoma' an dumalat di nun'atayan nan ni'babluya'.
Ya nan ung'ungungnga ya nan pumpa'ittungaw ya nun'alngatdah nan ado'lan di tagu.
12 Ya numbagadan inadah ononda ya inumonda,
ya nun'a'ulawdan umatdah nan nun'ahugatan hinan gubat,
at nonongan nun'atoydah nan nanaha'lian inadan dida.
13 Mahmo' ahan nan na'angang ad Jerusalem
an mi'id di mabalin hi pangipaddunga' hi ligatda!
Ti nidugah ahan an ta"on un ha"in ya agguy'u inilay ato' an bumadang ay dida
ti paddungnay baybay an adi malukud di aat di napa"ianda.
14 Nan impa'innilan nan propetayu ya adi ahan makulug,
at mid hulbina.
Ti agguy da'yu intuduwan an nuntutuyuh nan numbaholanyu
ta wan agguy ayu nilayaw hinan udum an babluy.
Mu un at goh hay intududa ya nan layah.
15 Ya ad ugwan an napa"id Jerusalem ya pihupihulon nan tatagun maluh,
ya aba'abatlanda, ya inwigiwigday uludan alyonday,
“Undan hiyah te din alyondan ma"aphod an babluy
an awadan di nidugah an pun'am'amlongan di an amin an tataguh tun luta?”
16 At un nonongan pinadngolanda didah nan buhulda an daladalatonda dida an alyonday,
“Pina"imi mahkay nan babluyda!
Ya hiyah te nan algaw an hehennodmih a'atana!”
17 Hi Apo Dios ya inatna nan ninomnomnan aton
ta impa'annungna din inalina tuwalih din nabayag an atona.
At ten mi'id di homo'nah nama"ianad Jerusalem,
at impa'amlongna nan buhuldah din na'abakanda,
ya impabagtuna hanan ma'abohhol ay dida.
18 At hiyanan da'yun iJerusalem ya adiyu idinong an kumila
an mumpahpahmo' hi abigabigat ay Apo Dios!
19 Ya gun ayu bumangon hinan mahdom an ta"on un hinan labi ta munluwalu ayu,
ya mumpahpahmo' ayun Apo Dios ta hom'ona ni' nan imbabaluyyu
an nun'alngat hi hinaangdah nan malgom an awadanda.
20 At numpahpahmo'da mahkay an inaliday,
“Tigom ni', Apo Dios, tun ma'ma'at hitun tatagum!
Ti nidugah ahan an ta"on tun binabai ya ononday imbabaluydan impapto'da!
Ya ta"on un nan papadi ya propeta ya numpatoydah nan Timplu.
21 Ya tigom goh an awalitangday nun'atoy an ung'ungungnga ya nun'ala'ay an pinatoy di buhul,
ya ta"on un nan mumpangilog ya pinatoyda didah matadom!
Ya gapuh nan bungotmu ya impapatoymu didan mi'id di homo'mu!”
22 At inayagam nan buhulmin amin ta na'amungda an ay ihunay way inam'amlang,
mu un at goh hiyay nangipattigam hi bungotmun da'mi,
at nah'u' amin amin an mi'id di inatmin limmayaw.
At do'ol di nun'apatoy ay da'mi
an ta"on un nan imbabaluymin gunmi impapto' ya pinatoy nan buhulmi.