27
Nan Tindalu ya nan Na'uhiganda
1 Hiyatuy nitudo' an mangipapto' hinan tindaluh nan holag Israel, ya numbino'ob'on di na'uhi'uhiganda ti waday mumpumpapto' ay didan umat hinan ap'apun di pamilya, ya waday u'upihyal an mumpapto' hinan hinlibu ya hinggahut ta itamuanda nan ali. Ya duwampulu ta opat di libuh nan linala'ih nan ohan himpampun an ipapto' nan ohan ap'apu. Ya hay ma'at ya un ohay bulan di puntamuan nan ohan himpampun hinan hintawon.
2 Nan nangipapto' hinan nahhun an himpampun hinan hopap di bulan ya hi Jashobeam an hina' Zabdiel, ya duwampulu ta han opat di libudan linala'i.
3 Ya hiya ya nalpuh nan holag Perez, ya hiyay ap'apun an amin nan a'ap'apun nan tindaluh nan himpampun an mahhun an nuntamuh nan hopap di bulan.
4 Ya hay nangipangpanguluh nan miyadwan bulan ya hi Dodai an i'Ahoh, ya hi Mikloth di nehnod hinan haadnan mangipangpangulun didan himpampun. Ya didan himpampun ya duwampulu ta han opat di libudan linala'i.
5 Ya nan miyatlun ap'apun di tindalun nangipangpanguluh nan muntamuh nan miyatlun bulan ya hi Benaiah an hina' Jehoiada an padi. Ya hiyay ap'apun nangipapto' hinan duwampulu ta han opat di libun linala'i ya didan himpampun.
6 Ya hi Benaiah di way abalinanan nundongol di aatnan didan ma'alih Nan Tulumpulu, ya hiyay apudan numpapto' ay dida. Ya han imbaluynan hi Ammizabad di nihukat an nangipapto' ay didan himpampun.
7 Ya nan miyapat an bulan ya hi Asahel an hi agin Joab, ya han imbaluynan hi Zebadiah di nihukat ay hiyan numpapto'. Ya dida an himpampun ya duwampuluda ta han opat di libu.
8 Ya nan miyaleman bulan ya hi Shamhuth an nalpuh nan holag Izra di nangipangpangulu, ya duwampuluda ta han opat di libudan himpampun.
9 Ya nan miyonom an bulan ya hi Ira an hina' Ikkesh an iTekoa di nangipangpangulu, ya duwampuluda ta han opat di libun linala'in himpampun.
10 Ya nan miyapitun bulan ya hi Helez an holag Pelon an nalpud Ephraim di nangipangpangulu, ya duwampuluda ta han opat di linala'in himpampun.
11 Ya nan miyawalun bulan ya hi Sibbekai an nalpuh nan babluy ad Hushath an nalpuh holag Zerah di nangipangpangulu, ya duwampuluda ta han opat di libuh linala'in himpampun.
12 Ya nan miyahiyam an bulan ya hi Abiezer an nalpud Anathoth an holag Benjamin di nangipangpangulu, ya duwampuluda ta han opat di libuh linala'in himpampun.
13 Ya nan miyapulun bulan ya hi Maharai an nalpuh ad Netophath an holag Zerah di nangipangpangulu, ya duwampuluda ta han opat di libun linala'in himpampun.
14 Ya nan miyapulu ta ohan bulan ya hi Benaiah an iPirathon an nalpuh nan holag Ephraim di nangipangpangulu, ya duwampuluda ta han opat di libun linala'in himpampun.
15 Ya nan miyapulu ta duwan bulan ya hi Heldai an iNetophath an nalpuh nan holag Othniel di nangipangpangulu, ya duwampuluda ta han opat di libun linala'in himpampun.
Nan Mumpapto' hinan Hinohhan Himpangapun Holag Israel
16 Hiyatuy nun'apilin u'upihyal hi mangipapto' hinan holag Israel:
Hay napilih nan holag Reuben ya hi Eliezer an hina' Zikri,
ya hay ap'apun mangipapto' hinan holag Simeon ya hi Shephatiah an hina' Maakah,
17 ya hay napilih nan holag Levi ya hi Hashabiah an hina' Kemuel,
ya hay napilih nan holag Aaron ya hi Zadok,
18 ya hay napilih nan holag Judah ya hi Elihu an hi agin David,
ya hay napilih nan holag Issachar ya hi Omri an hina' Michael,
19 ya hay napilih nan holag Zebulun ya hi Ishmaiah an hina' Obadiah,
ya hay napilih nan holag Naphtali ya hi Jerimoth an hina' Azriel,
20 ya hay napilih nan holag Ephraim ya hi Hoshea an hina' Azaziah,
ya hay napilih nan godwan holag Manasseh ya hi Joel an hina' Pedaiah,
21 ya hay napilih nan godwan holag Manasseh ad Gilead ya hi Iddo an hina' Zechariah,
ya hay napilih nan holag Benjamin ya hi Jaasiel an nalpuh nan holag Abner,
22 ya hay napilih nan holag Dan ya hi Azarel an imbaluy Jeroham.
Hiyanay napilin mangipapto' hinan ahimpahimpampun an holag Israel.
23 Nan Alin hi David ya agguyna ni'yuyap nan muntawon hi duwampulu unu nan nakudang hi duwampulu ti hi Apo Dios ya intulagna an hay uyap nan holag Israel ya nidugah an do'olda an umatdah nan bittuan ad daya.
24 Ya hi Joab an hina' Zeruiah ya ente"anan uyapon nan tatagun linala'i, mu agguyna lempah an inuyap ti minoltan Apo Dios nan holag Israel an dumalat henen nun'uyapanda. At hiyaat un agguy nagtud nan uyap di tatagu, at agguy nitudo' nan udumnan tataguh nan liblun nitud'an nan tataguh din numpapto'an nan Alin hi David.
Nan Napilin Manalimun hinan Gina'un nan Ali
25 Hiyatuy napilin manalimun hinan gina'un di alin nitudo' di ngadanda:
Hi Azmaveth an hina' Adiel di manalimun hinan numbino'ob'on an puntalepnan hi gina'uh nan kuwaltun wah nan palasyu,
ya hi Jonathan an hina' Uzziah di manalimun hinan numbino'ob'on an puntalepnan an wah nan nibataan hi babluy ya an amin nan nun'ibataan an puntalepnan hinan babluy ya nan pun'adugan,
26 ya hi Ezri an hina' Kelub di manalimun hinan muntamuh payaw,
27 ya hi Shimei an iRamath di manalimun hinan itamman di greyp,
ya hi Zabdi an nalpud Shiph di manalimun hinan italepnan di bayah,
28 ya hi Ba'al-Hanan an iGeder di manalimun hinan ayiw an olibo ya nan ayiw an sicamor an fig di bunganah nan nundotal an wah nan puun di dudunduntug hi appit di alimuhan di algaw,
ya hi Joash di manalimun hinan puntalepnan hinan mantikan malpuh nan olibo,
29 ya hi Shitrai an iSharon di manalimun hinan bakah ad Sharon,
ya hi Shaphat an hina' Adlai di manalimun hinan bakan wah nan nundotal,
30 ya hi Obil an holag Ishmael di manalimun hinan kamilu,
ya hi Jehdeiah an iMeronoth di manalimun hinan dongki,
31 ya hi Jaziz an nalpuh nan holag Hagar di manalimun hinan kalnilu ya nan gandeng.
An amin hana ya diday u'upihyal an manalimun hinan a'animal ya nan gina'un nan Alin hi David.
Nan Bumadang an Mangituduh Maphod hi Aton David
32 Ya hi Jonathan an hi ulitaon David di ohan nala'eng an muntuduh nan maphod hi ma'at, ya wada goh di abalinanan muntudo' hinan na'na'at. Ya hi Jehiel an hina' Hakmoni di manalimun hinan pun'adalan nan imbabaluy di ali.
33 Ya hi Ahithophel di bumadang an mangituduh maphod hi aton nan ali. Ya hi Hushai an i'Ark di ligwana, ya hiyay mamagbagah nan ali.
34 Ya unat goh natoy hi Ahithophel ya hay nihukat hinan haadna ya da Jehoiada an hina' Benaiah ay Abiathar. Ya hi Joab di ap'apun manalimun hi mummandal hinan tindalun nan ali.