13
Hay nianamutan nan Kahon Apu Dios an inilpu dad Kiriat Jearim
1 Hinummangan David am-in nadan aap-apun di tindalunan ap-apun di hinlibu ya hinggatut
2 ot ahina ipainilan am-in hanadah ibbadan holag Israel an kananay “Deket tobalon yu ya pinhod APU DIOS an Dios taku ya umitud-ak takuh mangipainilan am-in hanadah ibba takun holag Israel takon nadan papadi ya nadan udum an holag Libay ta maamung takun am-in hitu.
3 Te ad uwani moy tiempon etaku pamangngadan nah Kahon Apu Dios an niwalong handih numpatulan Saul.”
4 Pininhod nadan holag Israel hidiye ot tobalon da.
5 Ot amungon David am-in nadan ibbanan holag Israel mipalpu nadah numboble nah poppog di Egypt ingganad Lebo Hamat ta eda alan nan Kahon Apu Dios ad Kiriat Jearim ta ie dad Jerusalem.
6 Indani ot umeh David ad Baalah an ongal an bobled Judah an Kiriat Jearim di ohan ngadanan ibbana nadan tatagun e mangala nah Kahon nan Dios an AP-APU an inumbun nah numbattanan nadan pinaot an ing-ingon di anghel.
7 Eda imbudal hidiyen Kahon Apu Dios an niha-ad hi balen Abinadab ot ilugan dah ka-apyan kuliton an ingguyud nadan bakan ingguyud da Ussah ke Ahio.
8 Nitun-ud da David ya am-in nadan ibbada. Mahaldot di kanta da ya manmannayo dah pundayaw dan Apu Dios. Ya munggitala da, mun-ayyuding da ya pun-ipagango da nadan tamburin, cymbal ya nadan tangguyub.
9 Mu handih dimmatong da nah pun-ilikan Kidon ya nikudli nadan bakan nangiguyud nah nitakkayan nan Kahon Apu Dios ot ipudon Ussah diyen Kahon,
10 ya bimmoh-ol hi APU DIOS ot pinghana di ya pinate nah Ussah te impudonah diyen Kahon. Athidiy naat an nateh Ussah hi hinangngab Apu Dios.
11 Hidiyey gapunan nginadanan dah diyen boble hi “Peres Ussah” ot hidiyey ngadana ingganad uwani. Hi David ya bimmobboh-ol te pinaten APU DIOS hi Ussah.
12 Indani ya tumakut moh David ke Apu Dios an kananay “Nganne nin moy atok an mangianamut nah Kahon Apu Dios?”
13 Ugge mo in-anamut David hidiyen Kahon Apu Dios ad Jerusalem ot ihingngi day dinalan da ot ena iha-ad nan Kahon hi balen Obed Edom an iGat.
14 Niha-ha-ad nan Kahon hidih tulum bulan ot ongal di bendisyon APU DIOS ke Obed Edom, nan pamilyana ya am-in nadan wadan hiya.