3
Hay atatakhun hana mapili an mumpfalin hi pangulu
1 Tayya han napfalor an tudtuchu, an hini gway pamhod na an mumpfalin hi pangulun chi namati ja pfuher hitay hi i na piꞌtamuwan.
2 Hotti hini mapili an mangpangulu ja mahapor an ma-id apahigwana. Un ohay ahagwana, na-umlong chi nomnom na, ja manomnom, malihpito, mangiliyonay takhu, ja anila na an muntudtuchu.
3 Achi khun mapfutong ja achi mabmapfungot ta un ma-uloy an achi ak-akidchi hon neꞌhohongnger, ja pfu-un hay pelaꞌ chi mun-o-onan ay ni nomnom na.
4 Ja mahapor an anila na an mangepaptoꞌ hi pamilya na, ja tikhana an nalihpito ja naꞌna-unnud hana empfapfalay na ay hija.
5 Ti nu ma-id anila na an mangepaptoꞌ hi pamilya na, hot om-omod an ma-id anila na an mangepaptoꞌ hay hana namati ay Apo Jos.
6 Achi mapfalin an mehaad hini paꞌ-ihuꞌpap an namati, ti khenemhon ja numpa-akhaja ja chumalat hi i pundusaan Apo Jos ay hija an amat ay ni enat na ay Satanas.
7 Hini pangulu ja mahapor an gway lihpiton chi tatakhu ay hija, anong un hana agkhuy namati. Ti napukhit ayya hini ugali na hot pahigwon chi tatakhu ja hitay hini aton Satanas an mangapfak ay hija.
Hay atatakhun hana mapili an tomolong hana pangpangulun chi namati
8 Amat khu heto hini mehaad an tomolong hana pangpangulu. An mahapor an gway lihpiton chi tatakhu ay hija ja achi cha munlahlah. Ja achi khun mapfutong ja pfu-un hay pelaꞌ chi mun-o-onan ay ni nomnom na.
9 Mahapor an khokhotana hini umannung an tudtuchu an impa-innilan Apo Jos an nagwachaan hi maphod an konsensia.
10 Hay amatana ja matopngan pay hi mahhun hana ugali na. Ja nu matikhaw an ma-id mapahiw ay ni piꞌtakhuwana ja mapfalin an mehaad ta tomolong hana pangpangulu.
11 Ja mahapor an hana ah-ahagwaan cha ja gway lihpiton chi tatakhu ay chicha, ja achi cha munhapit hi apaꞌ-iyan chi ibpfa cha hi takhu, na-umlong cha ja mapagtarkan cha.
12 Hay mehaad an tomolong, ja un ohay ahagwa na ja anila na an mangpaptoꞌ ay ni pamilya na ja hana uchumna an nidchum an neꞌheto ay chicha.
13 Ti nu ep-ephod cha an tomolong hot lihpituwon chi tatakhu chicha, hot pfumi-ah cha an muntihtikhu ay ni omaꞌ-atan ni pammati cha khapo hi neꞌ-oh-ohhaan cha ay Hesu Kristo.
Impa-innilan Apo Jos ad ugwani hini omaꞌ-atan Kristo
14-15 Alom ja achi mapfajag hot umaliyaꞌ hina. Muti unchani ja mataktakaꞌ hotti tayya an intulaꞌ u an amin hay hato ta annilaom hini atom an mangpaptoꞌ ay ni pamiryan Apo Jos an hija hana namati an iglesian tay mamattakhu an Jos. Ti chita-o an namati chin nangpulangan Apo Jos ay tay umannung an tudtuchu ta mepmephod an mituchu ja achi ta-o ehahalla.
16 Achi mehaot an hini pinati ta-o an omaꞌ-atan Kristo Hesus ja munnaud an napfalor. Agkhuy impa-innilan Apo Jos chin hopapna muti ay chita-o ad ugwani an timpo chi nangpa-innilaana.
Ti immali hi Kristo an numpfalin hi takhu.
Impa-innilan ni Espiritu Santo an magpong hija.
Ja tinnig hana angher,
Nekasaba hini nitakhuwana hi apfuglapfuglay,
Ja hana tatakhu heto lota ja pinati cha.
Ja timmalakhuy ad langit ta mipapfagpfagto.