☰ Isaiah 18
18
Ya pengastiguan Apu Dios idan iKus
1 Nanna-ud ni mebahbah kayun tutu-un nambebley di Kus di gilig idan wangwang e kamedngel hu bingig ni kamantayyatayyab ni dudun. 2 Yadda impaeli yun nanlugan di bangkan nekapyad katlubbung ey daka iddalan di Wangwang e Nile et lumaw idad edum ni bebley.
Ey hi-gayun impaeli dan kamehahwisik ni an menghel ni kaippaad idan tutu-ud kebebbebley, anemut kayud bebley yun ginedwan wawangwang, hi-gayun etata-gey ni tutu-u e mangkalinah belat yu niya hin-appil ehel yu niya katekkusiddan tutu-ud kebebbebley. Huyya yu ehel di bebley yu. *
3 Emin kayun nambebley di puyek, dengel yu huyya. Hedin neita-gey hu bandelah di duntug ey ang-ang yu. Niya dengel yu hedin simmenul hu tangguyup! 4 Kan Apu Dios ni hi-gak ey “Hi-gak ey nakka man-uh-uhdung e nakka ang-ang-anga hu planuh idan buhul idan iJudah, nem nak ni kapemegga i-ineng, henin kakeweddain delnun hileng ni ahiani. Em nakka man-uh-uhdung henin aggew ni emaggew.”
5 Huyya inhel Apu Dios ni meippangep idan buhul tayu, tep eleg da ni ilepun umgubat e ida kamamplanuh e ida kamei-ellig di grapes ni kamangkelu-um, nem umkukumna idalli ey hegpaten idan Apu Dios henin kapenegpasin pangan grapes ni eleg umlameh. † 6 Mangkeiwwehhit idalli annel ni sindalu yud payew et pangkanen idallin sisit ingganah mepappeg hu ugew. Hanniman ida dama animal di muyung e wada kennen da ingganah mepappeg hu ketel.
7 Nem medettengan ali aggew ni pampengi-lian idan etata-gey ni tutu-un malinah belat dan i-appit dan Apu Dios e Kabaelan tun emin. ‡ Humman idan tutu-un hin-appil ehel da ey nambebley idad ginenedwaddan wangwang. Katattakkusiddan emin ni tutu-u tep naka-let ida niya makabbunget ida. Pan-i-ali dalli iddawat dan Apu Dios e Kabaelan tun emin di Duntug e Zion e kapenaydayawin hi-gatu.
* 18:2 18:2 [1-2] Humman idan impaeliddan bimmebley di Kus ey immaliddad Judah et ehelen daddan aap-apudman hu planuh ni patul dan mei-dum ida sindalun iJudah idan sindalu tu et makigubat idaddan buhul dan iAssyria. Nem hi Isaiah ey inamta tu e beken ni kayyaggud hu da pengebbulutan nunman, et ya kumaddan pehding da ey mandinnel idan Apu Dios ni mengihwang ni hi-gada. Et ehelen tuddan nunman ni tutu-u e um-anemut idad bebley da. Yan nunman ni ennamutan da ey inebig tu nin hi-gada huyyan meippahding alin edum ni aggew. † 18:5 18:5 Huyyaddan buhul idan iJudah ni bahbahen Apu Dios ey humman ida sindalun Assyria. ‡ 18:7 18:7 Huyyaddan tutu-un nambebley di Kus e memaddang et idan iJudah ni mekiggubbat ni buhul dan iAssyria, ey daydayawen dalli hi Apu Dios e Dios idan helag Israel ni edum ni aggew.
☰