20
Ya pengapputan ni Assyria ni Egypt et ya Kus
1 Hedin hi Sargon e patul ni Assyria ey immandal tu etan ni ap-apun sindalu tu et gubaten da Asdod e et-eteng ni bebley di Pilistia et sakupen da.
2 Yan nunman hu nanghelan Apu Dios ni hi-gak e hi Isaiah e u-ungngan Amos e e-kalen ku patut ku niya balwasik ni langgusih et nak mandaladalan. Inu-unnud ku humman ni inhel tu et ipahding kun tellun toon.
3 Yan nunman ni nansakupan ni Assyria ni Asdod ey kan Apu Dios ey “Hi Isaiah e bega-en ku ey an nandaladalan ni tellun toon e endi balwasi tu niya endi patut tu. Humman immatun ni mekapkapyallid Egypt niyad Kus.
4 Ellan idallin patul ni Assyria ida iEgypt niyadda iKus et pambalin tuddan balud, anin idan u-ungnga, yadda nangkea-amma niyadda nangkei-inna. Eleg idalli mampettut niya endilli balwasida et meang-ang ali sipeda ma-lat kebabba-ingan ni Egypt.
5 Umhulun ali humman ni meippahding, ey medismayah idalli niya umtakut ida kamengiddinnel ni tutu-ud Kus et yadda etan kamengippahhiyan Egypt et meendilli namnamah da.
6 Yan nunman alin aggew, ey kan idallin nunman ni nambebley di gilig ni baybay di Pilistia ey ‘Ang-ang tayu kedi neipahding idan tutu-un tayu kapandinnelin umbaddang ni mengihwang ni hi-gatsun pehding ni patul ni Assyria! Hipa makkaw law inna-nu tayun meihwang?’ ”