Micah
Ya meippanggep nunyan libluh nan Micah
Hi Micah ey hakey ni prophet ni kamengippeamtan kae-helan Apu Dios idan tutu-u niyadda aap-apud Israel niyad Judah. Ya Samaria hu capital ni Israel ni nunman ey ya Jerusalem hu capital ni Judah. Impeamtan Micah ni hi-gada e kastiguen Apu Dios ida tep lawah daka pehpehding.
Daka daydayawa hu beken ni makulug ni dios idan beken ni Hebrew ni nekibebley ni hi-gada niya eleg da u-unnuda hi Apu Dios e hi-gatun ebuh hu makulug ni Dios. Dakel pay hu edum ni lawah ni impenahding da. Eleg u-unnuden idan aap-apu da hu Tugun Apu Dios niya pinhed dan ellan hu hipan wadan edum da, e daka panhina-ul niya daka pampinilliw hu daka pehding ni mengelladdan nunman. Hedin beken mewan ey daka tattakkuta winu daka petteya hu kan kukuwah ni hipan pinhed dan ellan. (2:1-2 et ya 3:9-11) Yadda mewan hu kekeddangyan ey eleg da hehmeka niya eleg da baddangidda nangkewetwet ni nekibebley ni hi-gada e nemahhig kumedek hu daka pehding ni hi-gada. (2:9, 3:2-3 et ya 6:10-12)
Gapuh idan nunyan liwat idan tutu-ud Israel niyad Judah ey impeamtan Apu Dios e kastiguen tudda, nem kapyatun eleg pinhed idan tutu-ud Israel ni mengu-unnud. Et bahbahen ida law ni sindalun Assyria hu bebley da niya inla da hu dakel ni hi-gada et pambalin daddan balud di Assyria. (721-722 B.C.) Entanni et ehelan Micah ida hu tutu-ud Judah et peamta tun hi-gada e hedin eleg da issiked ni mengippahding ni lawah, man mekastigudda dama.
Intuttuddun Micah idan tutu-u e ya namnamah dan ebuh ey mambangngad idan menaydayaw nan Apu Dios niya mandinnel idad hemek tu. (4:1–5:15 et yad 7:18-19) Huyyan hemek tu ey neipeamtad planuh tun mengihwang idan tutu-u tun helag Israel niyaddan emin hu tutu-u eyad puyek. Impeamtan Micah e huyyan planuh ey peamnulli etan ni mengihwang ni inhel Apu Dios ni peelli tu. (5:2-5)
Ya neitudek eyad libluh:
1. Ya kekastiguan idallin helag Israel ey ya keihwangan da. (chapters 1–2)
2. Ya nengipeamtaan nan Micah ni nanliwatan idan aap-apud Israel, nem impeamta tu e wada namnamah dan emin ni helag Israel. (chapters 3–5)
3. Ya nengipeamtaan Apu Dios ni nanliwatan idan helag nan Israel ni ya pengapputan alin nan-ap-apuan tu. (chapters 6–7)
1
1 Yan eman ni nampatulan di Jotham, hi Ahas et hi Hesekiah di Judah ey impeamtan Apu Dios nan Micah e iMoreshet hu meippahding alid bebley di Samaria niyad Jerusalem.
2 Et kan Micah idan tutu-u ey “Hi-gayun katuutuu eyad puyek, dengel yu eya e-helek ni hi-gayu: Hi Apu Dios, e Eta-gey ni peteg, e immen di Tempol tud kabunyan ey kantuy nambahul kayun emin.
3 Hi Apu Dios ey melpullid tuka panha-adi et melehbeng e mandellan di ta-pew idan duntug ma-lat umlin mengastigun hi-gayu.
4 Mangkelennat idalli duntug ni pandellanan tu e henidda kendel ni linenat ni apuy ey um-ayuh iddallid nangkedeklan. Heniddalli elwang ni man-a-ayyuh di duntug.
5 Meippahding idallin emin huyya tep kangenghayaddan iIsrael niyadda iJudah hi Apu Dios niya nanliwat idan hi-gatu. Impappangnguluddan tutu-ud Samaria hu edum dan iIsrael ni nanliwat nan Apu Dios. Ya dama nengipappangnguluddan iJudah ni nanliwat ey yadda tutu-ud Jerusalem.”
6 Et humman hu, kan Apu Dios ey “Bahbahek ali Samaria niyadda etan binattun baballey da et mambalin ni mangkeipiggil ni batu. Niya pan-ullinek idalli batud nandeklan di ehpen et mabudihan hu inehnengan ni bebley. Mambalin alin heni leguntan kapantennemin grapes tep endillin hekey mambebley diman.
7 Mangkebuklillin emin hu nebalol ni kinenapya dan dios da niya megihheb alin emin hu hipan neidwat di tempol da. Tep humman idan indawadawat da ey heni sinangdan ni bibi-in daka iggatang annel da, tep inemung dan nandayawan dan beken ni makulug ni dios. Et humman hu, emin etan pihhuh ni inusal dan nenaydayaw idan nunman e dios ey ellan idallin buhul da et ilaw dad bebley da et usalen da daman penaydayawan daddan dios dadman.”
8 Et kan Micah ey “Gapu tep henin nunyalli meippahding ey mannannangngihhak ali niya umlelemyungngak. Eggak ali mampettut niya eleggak mambalwasin an mandaladalan. Mantete-ullak ali e heni-ak immeyew ni ahhu niya mangngugngugnguggak e heni-ak ali akup.
9 Heni nekalliputan ida hu iSamaria e eleg law mabalin ni meeggahan. Anin idan iJudah et anggehemmek ida, tep kamangkedettengi dama kekastiguan da. Niya anggegannuy um-aliddalli buhul da et bahbahen da Jerusalem.
10 Entan tu ehel idan buhul tayun iGath hu keapputan tayu niya entan lelemyung yu. Nem hedin hi-gayuddan tutu-ud Bet Leaprah ey pandulladullag kayud dep-ul ma-lat peang-ang yu lemyung yu.
11 Deh ida tutu-ud Saphir e mambalin idan balud et kapan-illaw idan buhul dad edum ni bebley e eleg ida mampanbalwasi et nemahhig baing da. Eleg ida meukkat hu tutu-ud Saanan ni takut dan buhul da. Nemahhig ali lemyung ni tutu-ud Bet Esel ni keapputan da. Endilli law kabaelan dan memaddang ni hi-gayun iJerusalem.
12 Hi-gayun tutu-un nambebley di Marot ey hehhegeden yulli umbaddang ni hi-gayu ma-lat meihwang kayu, nem endilli um-ali. Tep ittu-dak alin Apu Dios hu dakel ni buhul yu ma-lat mebahbah hu bebley yu, anin idan nambebley di neihnup di Jerusalem!
13 Hi-gayun tutu-ud Lakis ey papuut yun umbesik. Panlugan kayud kalesah yu et manglaw kayu, tep iyyaddalli buhul yu. Hi-gayu nemangulun nambebley di Judah ni nengiu-unnud di kapanliwwasin Israel e daka daydayawa hu dios ni kinapyan tuu. Et deh e impappangngulu yudda tutu-ud Jerusalem ni manliwwat.
14 Hi-gayun aap-apud Judah ey eleg yuddalli law ang-anga hu iMoreshet Gath, tep apputen idallin buhul da et meillaw idallid edum ni bebley. Pilliten dakeyulli daman nunman idan buhul dan um-idwat ni pihhuh ni hi-gada. Mehe-ul idalli papatul ni Israel, tep kanda na-mu nem baddangan idan iAksib ey eleg ali meippahding tep anin alin hi-gada et meapput ida.
15 Niya hi-gayun iMareshah ey anggehemmek kayulli tep peellillin Apu Dios ida buhul yun menggep ni bebley yu. Yaddalli nandingngel ni aap-apud Israel ey ida mantellu etan di leyang di Adullam.
16 Hi-gayu daman iJudah ey pampemukmuk kayu et keang-angan ni nemahhig ni lemyung yu, tep mangkeillaw idalli hu nakappinhed yun u-ungnga yud edum ni bebley.”