33
Yadda nangkampuan idan helag Israel eman ni inlian dad Moab ni nalpuan dad Egypt
1 Huyyadda neitudek ni ngadan idan nangkampuan idan helag Israel eman ni nalpuan dad Egypt e di Moses nan Aaron nengipengulun hi-gada.
2 Intudek Moses hu ngadan idan nunman ni nangkampuan da tep humman hu inhel Apu Dios ni pehding tu. Huyyadda dindinlan da e meamtad nangkampuan da.
3 Hini-yan idan helag Israel hu bebley di Rameses di Egypt eman ni meikkahampulut liman aggew ni nemangulun bulan ni newa-waan ni nelabhan ni Anghel Apu Dios. Yan neni-yanan idan helag Israel ni nunman ni bebley ey kaang-ang-angaddan tuudman ida.
4 Yan nunman daman aggew ey daka pan-ikkulung hu pengulwan ni u-ungnga dan pintey Apu Dios. Humman ni impahding Apu Dios hu nengipeang-angan tu e et-eteng kabaelan tu nem yadda dios di Egypt.
5 Hini-yan idan helag Israel hu Rameses et lumaw idad Sukkot et mangkampuddadman.
6 Entanni et lumaw idad Etham di gilig ni eleg mebebleyi et mangkampuddadman.
7 Hini-yan da Etham et ibabbangngad da et ilikweh dad Pi Hahirot e demang ni Baal-Sephon et mangkampuddad Migdol.
8 Hini-yan da Pi Hahirot et man-agwat idad Madlang ni Baybay et lumaw ida etan di eleg mebebleyi. Nandalan idan tellun aggew et dumteng idad Marah et mangkampuddadman.
9 Hini-yan da humman et lumaw idad Elim et mangkampudda mewan diman tep wada hampulut dewwan hebwak niya nepitun palmah diman.
10 Hini-yan da humman et ida mangkampuddad gilig ni Madlang ni Baybay.
11 Hini-yan da humman et lumaw idad Sin e eleg mebebleyi et mangkampuddadman.
12 Entanni ey limmaw idad Dopkah et mangkampuddadman.
13 Hini-yan da Dopkah et ida mangkampud Alus.
14 Entanni ey nampalaw idad Rephidim e endi innumen ni danum et mangkampuddadman.
15 Hini-yan da humman et mampalaw idad Sinai e eleg mebebleyi et mangkampuddadman.
16 Hini-yan da humman et ida mangkampud Kibrot Hattaabah.
17 Entanni ey limmaw idad Haserot et mangkampuddadman.
18 Hini-yan da Haserot et ida mangkampud Ritmah.
19 Hini-yan da humman et mangkampuddad Rimmon Peres.
20 Entanni ey limmaw idad Libnah et mangkampuddadman.
21 Limmaw idad Rissah et mangkampuddadman.
22 Entanni ey nampalaw idad Kehelathah et mangkampuddadman.
23 Hini-yan da humman et mampalaw idad Duntug e Sepher et mangkampuddadman.
24 Hini-yan da humman et ida mangkampud Haradah.
25 Limmaw idad Makhelot et mangkampuddadman.
26 Hini-yan da humman et ida mangkampud Tahat.
27 Hini-yan da Tahat et ida mangkampud Terah.
28 Hini-yan da Terah et ida mangkampud Mitkah.
29 Entanni et lumaw idad Hasmonah et mangkampuddadman.
30 Hini-yan da humman et ida mangkampud Moserot.
31 Nampalaw idad Bene Jaakan et ida mangkampudman.
32 Entanni et lumaw idad Hor Haggidgad et mangkampuddadman.
33 Hini-yan da humman et ida mangkampud Jotbathah.
34 Hini-yan da humman et ida mangkampud Abronah.
35 Entanni et lumaw idad Esion Geber et ida mangkampudman.
36 Nampalaw idad Kades di kad-an ni Sin e eleg mebebleyi et mangkampuddadman.
37 Entanni et mampalaw idad Duntug e Hor di pappeg ni Edom et ida mangkampudman.
38 Yan nunman ni kaweda da etan di hengeg ni duntug ey inhel Apu Dios nan Aaron e mantetyed di ta-pew nunman ni duntug et matey diman. Neipahding huyya eman ni nangginawwa hu siyaggew ni meikka-pat ni pulun toon neipalpun neni-yanan idan helag Israel ni Egypt.
39 Ey yan nunman ni neteyyan Aaron ey hanggatut et dewampulut tellu toon tu.
40 Ey yan nunman hu nangngelan Arad e patul di Kanaan e kamengelidda helag Israel e ida kamangkeihnup di bebley tu.
41 Hini-yan da Duntug e Hor et ida mangkampud Salmonah.
42 Hini-yan da Salmonah et ida mangkampud Punon.
43 Hini-yan da Punon et ida mangkampud Obat.
44 Entanni ey limmaw idad Iye Abarim di pappeg ni Moab et mangkampuddadman.
45 Hini-yan da humman et ida mangkampud Dibon Gad.
46 Hini-yan da humman et ida mangkampud Almon Diblathaim.
47 Entanni et lumaw idad duntug di Abarim e neihnup di Duntug e Nebo et mangkampuddadman.
48 Hini-yan da humman et ida mangkampud nandeklan di Moab e gilig ni Wangwang e Jordan e demang ni Jericho.
49 Nedagdagsi hu kakampu dadman di gilig ni Wangwang e Jordan neipalpud Bet Jeshimot ingganah di Abel Sittim.
50 Immehel hi Apu Dios nan Moses di diman e kantuy
51 “Ehel muddan helag Israel e hedin man-agwat ida eyad Wangwang e Jordan et umlaw idad Kanaan
52 ey mahapul ni degyunen daddan emin hu nambebley diman. Ey mahapul ni bahbahen dan emin hu kinapya dan dios da anin idan baley nunman idan dios da.
53 Pambebleyan dadda humman ni bebley tep indawat kudda humman ni hi-gada.
54 Ya pehding mun mengikka-peng nunman ni puyek ey ibubunut yu. Ya kelakkeb tu ey meippuun di kedakkel idan pengidwatam. Ya melallakkeb ni puyek hu meidwat idan daddakkel bilang da ey beken ni melakkeb hu meidwat idan ekket bilang da. Hedin hipa binunut da, man humman beltanen dan puyek, eleg mabalin ni mehullulan. Hanneya hu ipahding yun helag Israel ni mengikka-peng ni puyek.
55 Nem hedin eleg yudda degyuna hu nambebley diman ey mambalin idallin heni butad mateyu winu heniddalli hebit. Iddawtan dakeyullin panligligatan yudman ni pambebleyan yu.
56 Ey kastiguen dakeyu henin implanuh kun pehding kun hi-gada.”