12
Ita, dagitoy dagiti ar-ari a pinarmek dagiti lallaki ti Israel. Tinagikua dagiti Israelita dagiti daga iti daya a paset ti Jordan a pagsingisingan ti init, manipud iti tanap iti Karayan Arnon agingga iti Bantay Hermon, ken iti amin a paset iti Araba nga agpadaya. Nagnaed idiay Hesbon ni Sehon nga ari dagiti Amorreo. Nagturay isuna manipud Aroer, nga adda iti igid iti bessang ti Arnon manipud iti tengnga ti tanap, ken iti kaguddua ti Galaad nga agturong iti Karayan Jabok iti beddeng dagiti Ammonita. Nagturay pay ni Sehon iti Araba agingga iti baybay ti Cineret, iti daya, agingga iti baybay iti Araba, (ti Baybay ti Asin) nga agpadaya, amin iti Bet-Jesimot ken agpaabagatan, nga agturong iti sakaanan iti bakras ti Bantay Pisga. Nagnaed idiay Astarot ken idiay Edrei ni Og nga ari iti Basan, maysa kadagiti nabatbati a Refaim. Nagturay isuna iti ti Bantay Hermon, Salca, ken iti isu-amin a Basan, agingga iti beddeng dagiti tattao iti Gesureo ken dagiti Maacateo, ken iti kaguddua ti Galaad, agingga iti beddeng ni Sihon, nga ari iti Hesbon. Pinarmek ida ni Moises nga adipen ni Yahweh, ken dagiti tattao iti Israel, ket inted ni Moises nga adipen ni Yahweh ti daga a kas sanikua dagiti Rubenita, dagiti Gadita, ken iti guddua ti tribu ti Manases. Dagitoy dagiti ari a pinarmek ni Josue ken dagiti tattao ti Israel iti lauden ti Jordan, manipud Baal Gad idiay tanap nga asideg iti Lebano nga agturong iti Bantay Halak nga asideg iti Edom. Nangted ni Josue ti daga kadagiti tribu ti Israel tapno tagikuaenda. Intedna kadakuada ti katurturodan a pagilian, dagiti kapatadan, ti Araba, dagiti sikigan dagiti banbantay, ti let-ang, ken ti Negev—ti daga dagiti Heteo, Amorreo, Cananeo, Ferezeo, Heveo, ken Jebuseo. Dagiti ari a nakairaman ti ari iti Jerico, ti ari iti Ai nga abay iti Betel, 10 ti ari iti Jerusalem, ti ari iti Enaim, 11 ti ari iti Jarmut, ti ari iti Lakis, 12 ti ari iti Eglon, ti ari iti Gezer. 13 ti ari iti Debir, ti ari iti Geder, 14 ti ari iti Horma, ti ari iti Arad, 15 ti ari iti Libna, ti ari iti Adullam, 16 ti ari iti Makkeda, ti ari iti Betel, 17 ti ari iti Tappua, ti ari iti Hefer, 18 ti ari iti Afek, ti ari iti Lasaron, 19 ti ari iti Madon, ti ari iti Hazor, 20 ti ari iti Simron-Meron, ti ari iti Acsaf, 21 ti ari iti Taanac, ti ari iti Megiddo, 22 ti ari iti Kedes, ti ari iti Jocneam idiay Carmel, 23 ti ari iti Dor idiay Nafat Dor, ti ari iti Goyim idiay Gilgal, 24 ti ari iti Tirza. Tallo pulo ket maysa amin ti bilang dagitoy nga ar-ari.