119
Nagasat dagiti awan pakababalawan dagiti wagasna, isuda nga agtultulnog iti linteg ni Yahweh. Nagasat dagiti mangsalsalimetmet kadagiti napudno a bilinna, isuda a mangsapsapul kenkuana iti amin a pusoda. Saanda nga agar-aramid iti saan a nasaya-at; magmagnada kadagiti wagasna. Binilinnakami a mangsalimetmet kadagiti pagannurotam tapno surotenmi a naimbag dagitoy. O, tapno maibangonakto a sititibker iti panangaramid kadagiti alagadem! Ket saanakto a maibabain no panunotek ti maipapan kadagiti amin a bilbilinmo. Agyamanakto kenka nga addaan iti napudno a puso inton masursurok dagiti nalinteg a bilinmo. Tungpalekto dagiti alagadem; saannak a panawan nga agmaymaysa. BETH Kasano a pagtalinaeden ti maysa nga agtutubo a nadalus ti dalanna? Babaen iti panagtulnog iti saom. 10 Iti amin a pusok ket sapsapulenka; Saanmo nga itulok a maiyaw-awanak manipud kadagiti bilbilinmo. 11 Indulinko ti saom ditoy pusok tapno saanak nga agbasol kenka, 12 Madaydayawka, O Yahweh; isurom kaniak dagiti alagadem. 13 Babaen iti ngiwatko inwaragawagko amin dagiti nalinteg a pangngeddeng nga inka impakaammo. 14 Ad-adda nga agrag-oak iti wagas dagiti bilbilinmo iti tulagmo ngem iti amin a kinabaknang. 15 Utobek dagiti pagannurotam ken ipangagko dagiti wagasmo. 16 Agragsakak kadagiti alagadem; Saankonto a malipatan ti saom. GIMEL 17 Paraburam kadi ti adipenmo tapno agbiagak ken matungpalko ti saom. 18 Lukatam dagiti matak tapno makitak dagiti nakakaskasdaaw a banbanag iti lintegmo. 19 Maysaak a ganggannaet iti daga; saanmo nga illemmeng dagiti bilbilinmo manipud kaniak. 20 Naburakda dagiti tarigagayko iti panangkalkalikagom a mangammo kadagiti nalinteg a pangngeddengmo iti amin a tiempo. 21 Babalawem dagiti natangsit, isuda a nailunod, isuda a simmiasi manipud kadagiti bilinmo. 22 Isalakannak manipud iti pannakaibabain ken pannakaumsi, gapu ta nagtulnogak kadagiti bilbilinmo iti tulagmo. 23 Uray pay no pagpanggepandak iti dakes ken padaksendak dagiti mangiturturay, ut-utuben daytoy adipenmo dagiti alagadem. 24 Pakaragsakak dagiti bilbilinmo iti tulagmo, ket isuda dagiti mamagbaga kaniak. DALETH 25 Ti biagko ket nakakapet iti tapok! Ikkannak iti biag babaen iti saom. 26 Imbagak kenka dagiti dalanko, ket sinungbatannak; isurom kaniak dagiti alagadem. 27 Ipakaawatmo kaniak dagiti wagas dagiti pagannurotam, tapno mabalinko nga utuben dagiti nakakaskasdaaw a sursusrom. 28 Nalapunosak iti panagladingit! Papigsaennak babaen iti saom. 29 Iyadayom kaniak ti dalan ti kinamanangallilaw; sipaparabur nga isurom kaniak ti lintegmo. 30 Pinilik ti dalan ti kinapudno; kankanayonko a tinungtungpal ti nalinteg a bilinmo. 31 Kumpetak kadagiti bilbilinmo iti tulagmo; O Yahweh, saanmo koma nga itulok a maibabainak. 32 Agtarayak iti dalan dagiti bilbilinmo, ta padpadakkelem ti pusok a mangaramid iti dayta. HE 33 Isurom kaniak, O Yahweh, ti wagas dagiti alagadem, ket tungpalek dagitoy agingga iti panungpalan. 34 Ikkannak iti pannakaawat, ket tungpalek ti lintegmo; aramidekto daytoy iti amin a pusok. 35 Iwanwannak iti dalan dagiti bilbilinmo, ta pagragsakak ti magna iti daytoy. 36 Iturongmo ti pusok kadagiti bilbilinmo iti tulagmo ken iyadayum manipud iti kinaagum. 37 Ilisim dagiti matak iti panangmingming kadagiti awan serserbina a banbanag; paregtaennak kadagiti wagasmo. 38 Ipatungpalmo iti adipenmo ti inkarim nga inaramiden kadagiti agdaydayaw kenka. 39 Ikkatem ti pagbutbutngak a pakaibabainan, ta nasayaat dagiti nalinteg a pangngeddengmo. 40 Adtoy, kalkalikagumak dagiti pagannurotam; pagtalinaedennak a sibibiag babaen iti nalinteg a panangwayawayam. VAV. 41 O Yahweh, ipaaymo kaniak ti saan nga agbalbaliw nga ayatmo— ti panangisalakanmo, sigun iti karim, 42 Ket addanto isungbatko iti manglalais kaniak, ta agtalekak iti saom. 43 Saanmo nga ikkaten ti sao ti kinapudno iti ngiwatko, gapu ta inurayko dagiti nalinteg a bilbilinmo. 44 Agtultuloyto a tungpalek ti lintegmo, iti agnanayon nga awan patinggana. 45 Magnaak a sitatalged, ta sinapulko dagiti pamagbagam. 46 Saritaek dagiti napudno a bilinmo iti sangoanan dagiti ar-ari ket saanak a mabain. 47 Pakaragsakak dagiti bilbilinmo, nga ay-ayatek unay. 48 Itag-ayko dagiti imak kadagiti bilbilinmo, nga ay-ayatek; Utubek dagiti alagadem. ZAYIN. 49 Laglagipem ti karim iti adipenmo gapu ta inikkannak iti namnama. 50 Daytoy ti liwliwak iti pannakaparigatko: a pinagtalinaednak a sibibiag ti karim. 51 Inuyawdak dagiti natangsit, ngem saanak a timmallikod iti lintegmo. 52 Napanunotko ti maipanggep kadagiti nalinteg a pangngeddengmo manipud idi un-unana a tiempo, O Yahweh, ket maliwliwaak. 53 Simged ti pungtotko gapu kadagiti nadangkes a manglaklaksid iti lintegmo. 54 Dagiti alagadem ti nagbalin a kankantak iti balay a pagnanaedak a saan nga agpaut. 55 Panpanunotek ti maipanggep iti naganmo bayat iti rabii, O Yahweh, ken tungtungpalek ti lintegmo. 56 Daytoy ti kanayon nga inar-aramidko gapu ta tinungpalko dagiti pagannurotam. HETH. 57 Ni Yahweh iti bingayko; inkeddengko nga aramidek dagiti sasaom. 58 Sipapasnekko a dawdawaten ti paraburmo iti amin a pusok; maasika kaniak, kas inkarim iti saom. 59 Inutobko dagiti wagasko ket inturongko dagiti sakak kadagiti bilbilinmo iti tulagmo. 60 Agdardarasak ket saanko nga itantan a tungpalen dagiti bilbilinmo. 61 Siniluandak dagiti tali dagiti nadangkes; saanko a nalipatan ti lintegmo. 62 Iti tengnga ti rabii bumangonak nga agyaman kenka gapu kadagiti nalinteg a pangngeddengmo. 63 Kaduadak dagiti amin a mangdaydayaw kenka, kadagiti amin nga agtungtungpal kadagiti pagannurotam. 64 Ti daga, O Yahweh, ket napnoan iti kinapudnom iti katulagam; isurom kaniak dagiti alagadem. TETH. 65 Nangaramidka kadagiti nasayaat iti adipenmo, O Yahweh, babaen iti saom. 66 Isurom kaniak ti umno a pannakaammo ken pannakaawat, gapu ta namatiak kadagiti bilbilinmo. 67 Naiyaw-awanak idi sakbay a naparigatak, ngem ita tungtungpalek ti saom. 68 Nagimbagka, ket sika ti mangar-aramid iti naimbag; isurom kaniak dagiti alagadem. 69 Pinulagidandak dagiti napalangguad kadagiti inuulbod, ngem tungtungpalek dagiti pagannurotam iti amin a pusok. 70 Timmangken dagiti pusoda, ngem pagragsakak iti lintegmo. 71 Pagsayaatak a nagsagabaak tapno masursurok dagiti alagadem. 72 Napatpateg kaniak ti pamagbaga nga agtaud iti ngiwatmo ngem kadagiti rinibribu a pidaso iti balitok ken pirak. YOD. 73 Inaramid ken binukelnak dagiti imam; ikkannak iti pannakaawat tapno masursurok dagiti bilbilinmo. 74 Maragsakanto dagiti mangdaydayaw kenka inton makitadak gapu ta nakasarakak ti namnama iti saom. 75 Ammok, O Yahweh, a dagiti bilbilinmo ket nalinteg, ken pinarigatannak gapu iti kinapudno, 76 Liwliwaennak koma ti kinapudnom iti tulagmo, kas inkarim iti adipenmo. 77 Kaasiannak tapno agbiagak, ta pakaragsakak ti lintegmo. 78 Maibabain koma dagiti natangsit, gapu ta pinadpadakesdak; ngem utubek dagiti pagannurotam. 79 Agsubli koma kaniak dagiti agdaydayaw kenka, dagiti makaammo kadagiti bilbilinmo iti tulagmo. 80 Agbalin koma ti pusok nga awan mulitna no maipapan kadagiti alagadem tapno saanak a maibabain. KAPH. 81 Aglusdoyak gapu ti panangkalkalikagumko nga ispalennak! Addaanak iti namnama iti saom. 82 Matektekan unay dagiti matak a makita ti karim; kaanonak a liwliwaen? 83 Ta nagbalinak a kasla supot ti arak a maas-asukan; saanko a malipatan dagiti alagadem. 84 Kasano kabayag nga ibturan ti adipenmo daytoy; kaanonto nga ukomem dagiti a mangparparigat kaniak? 85 Nagkali dagiti natangsit kadagiti abut a para kaniak, salsalungasingenda ti lintegmo. 86 Mapagtalkan dagiti amin a bilbilinmo; sibibiddut nga idaddadanesdak dagiti tattao; tulongannak. 87 Dandanida kinittel ti biagko ditoy rabaw iti daga, ngem saanko nga ilaklaksid dagiti pagannurotam. 88 Pagtalinaedennak a sibibiag, kas inkari iti kinapudnom iti katulagam, tapno matungpalko dagiti bilbilinmo iti tulagmo nga inka sinarita. LAMEDH. 89 O Yahweh, mataginayon nga awan patinggana ti saom; ti saom ket sititibker a naisaad sadi langit. 90 Ti kinapudnom ket mataginayon kadagiti amin a henerasion; inaramidmo ti daga, ket nagtalinaed daytoy. 91 Agtultuloy amin a banbanag agingga kadagitoy nga aldaw, kas imbagam kadagiti nalinteg a pangngeddengmo, ta adipenmo dagiti amin a banbanag. 92 No saan a ti lintegmo ti paggappoan ti ragsakko, mabalin a napukawak koman iti pannakaparparigatko. 93 Saankonto a pulos a lipaten dagiti pagannurotam, ta babaen kadagitoy ket pinagtalinaednak a sibibiag. 94 Kukuanak; isalakannak, ta birbirukek dagiti pagannurotam. 95 Agsagsagana dagiti nadangkes a mangdadael kaniak, ngem ikagumaak nga awaten dagiti bilbilinmo iti tulagmo. 96 Nakitak nga adda pagpatinggaanna dagiti amin a banbanag, ngem nalawa dagiti bilbilinmo, awan patinggana. MEM 97 O anian nga ay-ayatek ti lintegmo! Agmalmalem nga ut-utubek daytoy. 98 Pagbalbalinennak a nasirsirib dagiti bilbilinmo ngem dagiti kabusorko, ta kanayon nga adda kaniak dagiti bilbilinmo. 99 Ad-adda ti panakaawatko ngem dagiti amin a manursurok, ta ut-utubek dagiti bilbilinmo iti tulagmo. 100 Ad-adda a maawatak ngem kadagiti natataengan ngem siak; gapu ta tinungpalko dagiti pagannurotam. 101 Inlisik dagiti sakak iti tunggal dakes a dalan tapno maaramidko ti saom. 102 Saanak nga immadayo kadagiti nalinteg a pangngeddengmo, ta binilbilinnak. 103 Anian a nagsam-it dagiti sasaom iti panagramanko, wen, nasamsam-it ngem diro iti ngiwatko! 104 Babaen kadagiti pagannurotam, nakagun-odak iti pannakaammo; ngarud, kagurak amin a palso a wagas. NUN. 105 Ti saom ket silaw dagiti sakak ken lawag ti dalanko. 106 Insapatak, ken pinasingkedak daytoy, a tungpalek dagiti bilbilinmo. 107 Maparparigatak unay; pagtalenaedennak a sibibiag, O Yahweh, kas inkarim iti saom. 108 O Yahweh, pangngaasim ta awatem ti situtulok a daton ti ngiwatko, ket isurom kaniak dagiti nalinteg a pangngeddengmo. 109 Kankayon nga adda iti peggad ti biagko, ngem saanko a malipatan ti lintegmo. 110 Nangisagana dagiti nadangkes iti palab-og para kaniak, ngem saanak nga immadayo manipud kadagiti pagannurotam. 111 Tagikuaek dagiti bilbilinmo iti tulagmo kas tawidko iti agnanayon, ta dagitoy dagiti pakaragsakan ti pusok. 112 Nakasagana ti pusok nga agtulnog kadagiti alagadem iti agnanayon inggana iti panungpalan. SAMEKH. 113 Kagurak dagiti agduadua, ngem ay-ayatek ti lintegmo. 114 Sika ti paglemmengak ken kalasagko; Mangnamnamaak iti saom. 115 Umadayokayo kaniak, dakayo nga agar-aramid iti kinadakes, tapno matungpalko dagiti bilbilin ti Diosko. 116 Papigsaennak babaen kadagiti sasaom tapno agbiagak ken saan a mapabainan ti namnamak. 117 Saranayennak, ket natalgedakto; kanayonto nga utubek dagiti alagadem. 118 Ilaksidmo amin dagiti immadayo manipud kadagiti alagadem, ta manangallilaw ken saan a mapagtalkan dagidiay a tattao. 119 Ikkatem amin dagiti nadangkes iti daga a kasla ragas; ayatek ngarud dagiti pagannurotam. 120 Agpigerger ti bagik iti panagbuteng kenka, ket agbutengak kadagiti nalinteg a pangngeddengmo. AYIN. 121 Aramidek no ania ti nalinteg ken umno; saannak a panawan kadagiti mangidadanes kaniak. 122 Patalgedam ti pagimbagan ti adipenmo; saanmo nga itulok nga idadanesdak dagiti natangsit. 123 Mabanbanogen dagiti matak nga agur-uray iti panagisalakanmo ken iti nalinteg a saom. 124 Ipakitam iti adipenmo ti kinapudnom iti tulagmo, ken isurom kaniak dagiti alagadem. 125 Siak ket adipenmo; ikkannak iti pannakaawat tapno maammoak dagiti bilbilinmo iti tulagmo. 126 Panawenen nga agtignay ni Yahweh, ta linabsing dagiti tattao ti lintegmo. 127 Pudno nga ay-ayatek dagiti bilbilinmo a nalablabes ngem balitok, nalablabes ngem puro a balitok. 128 Ngarud, tungpalek a nasayaat dagiti amin a pagannurotam, ket guraek ti tunggal dalan ti kinapalso. PE. 129 Nakakaskasdaaw dagiti paglintegam, isu't gapuna a tungtungpalek ida. 130 Ti panangsukimat kadagiti sasaom ket mangmangted iti lawag; mangmangted daytoy iti pannakaawat kadagiti saan a nakasursuro. 131 Agnganga ken agal-al-alak, ta mailiwak kadagiti bilbilinmo. 132 Talliawennak ken maasika kaniak, a kas kanayon nge ar-aramidem kadagiti mangay-ayat iti naganmo. 133 Iturongmo dagiti addangko babaen iti saom; saanmo nga itulok nga iturayannak iti aniaman a basol. 134 Subbotennak manipud iti panangidadanes dagiti tattao tapno matungpalko dagiti pagannurotam. 135 Agraniag koma ti rupam iti adipenmo, ken isurom kaniak dagiti alagadem. 136 Agarubos dagiti luluak a kasla karayan manipud kadagiti matak gapu ta saan a tungtungpalen dagiti tattao ti lintegmo. TSADHE 137 Nalintegka, O Yahweh, ket awan idumduma dagiti bilbilinmo. 138 Intedmo dagiti bilbilinmo iti tulagmo a sililinteg ken sipupudno. 139 Dinadaelnak ti pungtot gapu ta nalipatan dagiti kabusorko dagiti sasaom. 140 Pudno unay dagiti sasaom, ket ay-ayaten daytoy ti adipenmo. 141 Saanak a napateg ken maum-umsiak, ngem saanko latta a malipatan dagiti pagannurotam. 142 Agnanayon nga umno ti panangukommo, ken mapagtalkan ti lintegmo. 143 Uray no masarakannak ti rigat ken tuok, pakaragsakak latta dagiti bilbilinmo. 144 Agnanayon a nalinteg dagiti bilbilinmo iti tulagmo; ikkannak iti pannakaawat tapno agbiagak. QOPH. 145 Immawagak iti amin a pusok, “Sungbatannak, O Yahweh, salimetmetak dagiti alagadem. 146 Umawagak kenka; isalakannak, ket tungpalek dagiti bilbilinmo iti tulagmo. 147 Bumangonak sakbay nga aglawag iti agsapa ket dumawatak iti tulong. Mangnamnamaak kadagiti sasaom. 148 Silulukat dagiti matak iti agpatpatnag tapno mabalinko nga utuben ti saom. 149 Denggem ti timekko gapu iti kinapudnom iti tulagmo, pagtalinaedennak a sibibiag, O Yahweh, a kas inkarim kadagiti nalinteg a pangngeddengmo. 150 Umas-asideg dagiti mangparparigat kaniak, ngem adayoda kadagiti lintegmo. 151 Asidegka, O Yahweh, ket mapagtalkan dagiti amin a bilbilinmo. 152 Idi un-unana, naadalko kadagiti bilbilinmo iti tulagmo nga insaadmo dagitoy iti agnanayon. RESH. 153 Kitaem ti pannakaparigatko ket tulongannak, ta saanko a malipatan ti lintegmo. 154 Ikanawanak ken subbotennak; saluadannak, kas inkarim iti saom. 155 Adayo ti pannakaisalakan kadagiti nadangkes, ta saanda nga ay-ayaten dagiti alagadem. 156 Naindaklan ti kinamanangngaasim, O Yahweh; pagtalinaedennak a sibibiag, kas kankanayon nga ar-aramidem. 157 Adu dagiti mangidadanes ken kabusorko, ngem saanko latta a tinallikudan dagiti bilbilinmo iti tulagmo. 158 Kitkitaek dagiti manangallilaw nga addaan rurod gapu ta saanda a tungtungpalen ti saom. 159 Kitaem no kasano ti panagayatko kadagiti pagannurotam; pagtalinaedennak a sibibiag, O Yahweh, kas inkarim iti kinapudnom iti tulagmo. 160 Naan-anay ti kinapudno ti saom; tunggal bilinmo ket agpa-ut iti agnanayon. SHIN 161 Parparigatendak dagiti prinsipe nga awan gapgapuna; agkebba-kebba ti pusok, mabuteng a manglabsing iti saom. 162 Agrag-oak iti saom a kasla maysa a tao a nakasarak iti nawadwad a kinabaknang. 163 Kagurak ken umsiek ti kinapalso, ngem ay-ayatek ti lintegmo. 164 Maminpito iti maysa nga aldaw a daydayawenka gapu kadagiti nalinteg a pangngeddengmo. 165 Naindaklan a kapia ti adda kadakuada; dagiti mangay-ayat iti lintegmo; awan iti makaitibkol kadakuada. 166 Ur-urayek ti panangisalakanmo, O Yahweh, ket agtulnogak kadagiti bilbilinmo. 167 Tungtungpalek dagiti napudno a bilbilinmo, ket ay-ayatek unay dagitoy. 168 Tungtungpalek dagiti pagannurotam ken dagiti npudno a bilbilinmo, ta ammom amin dagiti ar-aramidek. TAV. 169 Denggem ti un-unnoyko a dumawdawat iti tulong, O Yahweh, ikkannak iti pannakaawat iti saom. 170 Dumanon koma ti pakaasik iti sangoanam; tulongannak, a kas inkarim iti saom. 171 Mangibuyat koma iti panagdayaw dagiti bibigko, ta insurom kaniak dagiti alagadem. 172 Agkanta koma ti dilak maipanggep iti saom, ta umno amin dagiti bilbilinmo. 173 Tulongannak koma dagiti imam, ta pinilik dagiti pagannurotam. 174 Kalkalikagumak ti panangispalmo, O Yahweh, ket pakaragsakak ti lintegmo. 175 Mataginayonak koma nga agbiag ken agdayaw kenka, ket tulongannak koma dagiti nalinteg a pangngeddengmo. 176 Naiyaw-awanak a kasla napukaw a karnero; birukem ti adipenmo, ta saanko a nalipatan dagiti bilbilinmo.