124
“No saan a ni Yahweh ti kaduatayo,” ibaga koma ti Israel ita, “a no saan a ni Yahweh ti kaduatayo idi dimmarup dagiti tattao kadatayo, malabit nga inalun-ondatayo koman a sibibiag idi nakapungtotda kadatayo. Inyanudnatayo koman ti danum; linipusnatayo koman iti napigsa nga ayus. Ket linimmesnatayo koman ti nadawel a danum.” Madaydayaw ni Yahweh, a saan a nangitulok a marangrangkaytayo babaen kadagiti ngipenda. Nakalibastayo a kas iti billit manipud iti silo dagiti mangnganup; nadadael ti silo, ket nakalibastayo. Aggapu kenni Yahweh ti tulongtayo, isu a nangaramid iti langit ken daga.