7
Israel imbo 144,000 Goteni enonga mai mongona imbi torumu temanemu
1 Aku ulumu kanopolio altopo kanoru wali mai kombu pundu kitenga ensel kite angilko, maina toromo poporome kite mai kinye nomu kuta kinye unjoma kinye naa topa mepa pupili ningo ambolko ingi tiringi.
2 Aku wali altopo ensel te kanoru, yu ena mundi oromondo Koinjo Molopa Kau Puli Goteni yunge imboma imbi tombalo mele Yunge imbi moromomu mepa orumu. Goteni ensel kite mai kinye nomu kuta kinye teko kenjingei nimbe engemu tirimu enselemando kano enselemuni enge ru nimbelie nimbei,
3 “Maimu kape nomu kutamu kape unjoma kape oi melte teko naa kenjeio! Oi linonga Gotenga kendemande imbo moromelemanga mai mongona lino andopo eno Gotenga imboma kanangei nimbo mako tamili! Pele kombu teko kenjengei!” nimu.
4 Aku wali imbo imbi toringima kambu toringina pileru. Israeleni kalopa ltimu imbomanga 144,000 kau imbi toringi.
5 Judani kalopa ltimu lapumunga 12,000 imbi toko, Rubeneni kalopa ltimu lapumunga 12,000 imbi toko, Gateni kalopa ltimu lapumunga 12,000 imbi toko,
6 Asani kalopa ltimu lapumunga 12,000 imbi toko, Naptalini kalopa ltimu lapumunga 12,000 imbi toko, Manaseni kalopa ltimu lapumunga 12,000 imbi toko,
7 Simeononi kalopa ltimu lapumunga 12,000 imbi toko, Livaini kalopa ltimu lapumunga 12,000 imbi toko, Isakarni kalopa ltimu lapumunga 12,000 imbi toko,
8 Sebulunoni kalopa ltimu lapumunga 12,000 imbi toko, Joseponi kalopa ltimu lapumunga 12,000 imbi toko, Benjamini kalopa ltimu lapumunga 12,000 imbi toringi.
Manga pupu akuma Gotenga imbimu ltingi imboma.
Imbo paa pulumu Gotenga imbi liko ola munduko kapi ningi ungumu
9 Aku ulumu kanopolio, altopo i tepa kanoru. Imbo paa awini, imbo teni paa manda kambu naa tombalo mele, moloringina kanoru. Aku imboma eno kombu lupe lupe imboma, talape lupe lupe imboma, kangi lupe lupe angileli imboma, ungu lupe lupe nili imboma moloringi. Iye nomi king polona yakondo angilko, Sipsip Walomunga kumbe kerena angileringi. Eno wali pakoli kake teli tulema pakoko yawaye gomo ambolkolio,
10 enge ningolio ningei,
“Linonga Gote iye nomi king polona moromo Iyemu yu kinye Sipsip Walomu kinye
eloni lino wendo ltingilimunga mindili naa nombo molopo kondoromolo,” ningi.
11 Iye awili king polomu kinye, iye nomi wayema kinye, mele koinjo mololi mele kite kinye, akuma imunana molangei enselema pali angilko makai tekolio iye awili king polona moromo iyemunga kumbekerendo tamalu peko Gote kapi ningolio
12 ningei,
“Paimbo, aku teringili. Linoni tono kolopo yu kapi nimbo,
yunge enge pa teli ulumu olandopa ltemo nimbo, yu uluma pali lipe manjirimo nimbo,
yu paa tereno nimbo, yunge imbimu paa olandopa molopili nimbo,
yu melema pali nokombalo engemu pepili nimbo,
yu paa enge olandopa peremo nimbolio,
aku uluma pali Gote kinye kau kamukumu pepa kau pupili! Paimbo, aku tepa tepili!” ningi.
Kano imbomanga mindili noringi uluma Goteni akumanga pora tindirimu
13 Aku wali iye nomi 24 kanomanga teni na walipe pilipelie nimbei, “I imbo wale pakoli kake teli tule pakoromelema naimeleya? Kombu tena molkolio oringiya?” nimu.
14 Nani topondopo yundo nimboi, “Nanga awilimu, nuni liko manjirino,” niu. Yuni nimbei, “I imboma enonga opa pulemani mindili tiko umbuni awini tiringi walimanga mindili paa pulumu noringi imboma. Eno enonga wale pakoli tulema Sipsip Walomunga mememuni kulumie toringina kake teremo.
15 Akumunga,
“Eno iye nomi king polona moromo Gotenga kumbekerendo angilko,
yunge ulke tempelena ipu leli tangoli kongono tenderingi.
Iye nomi king polona moromo iyemu
eno kinye kopu tepa molopa eno nokombalo.
16 Walite kape eno altoko engele naa kolko no wali naa kolko, enani naa nomba,
tipe molo melteni enonga kangimu naa nopili molonge.
17 Sipsip Walomu iye nomi king polona tuku tingina moromomu yuni eno nanga sipsipima nimbe
eno tapu tembalomunga eno aku teko manda molko kondonge.
Eno no nangei nimbe koinjo molopa puli no pikopiko nimbe akuromomanga mepa pumbelo.
Goteni eno altoko kola naa teangei nimbe kolama kulu tondopa nimbe limbelo,” nimu.