15
Yämagurani 15:1-11
Moses täŋo oretoret kap
1 Täŋpäkaŋ Moseskät Isrel ämawebe äbottä Yawe iniŋoret kap ŋode teŋkuŋ;
Wisikinik! Yawe uwä ämikken intäjukuninik itkuko unita kap teŋ imina! Unitä Isip nanik täŋo komi ämakät unitäŋo hos gwägu gänaŋ yäpmäŋ äreyäŋpewän äpmoŋkuŋ.
2 Yawe uwä näkŋo kehäromina. Uwä iwan keri terak nanik nämagutkuk. Unita juku piŋpäŋ oretoret täŋpäŋ kap tek täyat.
Bureni, uwä nana täŋo Anutuni, ba näkŋo Anutuna unita iniŋ oretpäŋ wäpi yäpmäŋ akuwa!
3 Yawe uwä äma komi. Wäpi uwä Yawe.
4 Uwä Fero täŋo komi ämaniyekät karis uterak ämik täŋtäŋ kuŋatkuŋo u bok gwägu gänaŋ yäpmäŋ äreyäŋpewän äpmoŋkuŋ. Täŋkentäkiye tägatäga u imaka, ume naŋpäŋ kumbuŋ.
5 Kumäŋpäŋ mobä ude, baninik umu äpmoŋpäkaŋ gwägutä uwäk täŋpäŋ itkuk.
6 Bureni Yawe, ketka bure käda kehäromi nikektä iwan däpmäŋ imäriri käna inide kubä täŋkuk.
7 Gäkä äma iwan täŋ gamiŋkuŋo u kehäromika pähap yäwoŋäreŋpäŋ yeŋtäŋpi kuŋkuŋ.
Iwankayewä tepäraŋ ijiŋ paot täkaŋ ude gäkŋo kokwawak kädäp mebet udewanitä ijiŋ paotpäŋ abunigän peŋkuk.
8 Täŋpäŋ gäk kokwawakka täŋo woŋ taŋi pähap piäŋ iwariri gwägu tokŋeŋ yäpmäŋ äroŋpäŋ yewa ude kukŋi kukŋi äro kehärom taŋpäŋ itkuk.
9 Täŋpäkaŋ iwankayetä siwani yäŋkaŋ ŋode yäŋkuŋ; Yäwat kireŋkä yärepmitpäŋ api däpne yäk. Däpmäŋpäŋ unitäŋo tuŋumi yäpmäŋ daniŋpäŋ nininta yäpmäŋitna täpuri kubä nämo api irek yäk. Wisikinik! Päip wädäŋpäŋ madäŋ jukut-jukut täŋitna api paotneŋ yäk.
10 Ude yäŋkuŋo upäŋkaŋ Yawe gäkä piäŋ yäwariri gwägu gänaŋ äpmoŋ morewäkaŋ gwägutä kudup uwäk täŋkuk. Däpmäŋiri ain kujat ude gwägu gänaŋ kudup baninik umu äpmoŋkuŋ.
11 Unita Yawe, anutu jopi bämopiken gäk udewani kubä nämoinik itak. Gäk kudupi ärowaniinik. Gäkŋo peŋyäŋekka uwä inipärik kubä. Kudän kudupi täk täyan uwä kubätä udegän täga tänaŋi nämo!