EPESASA
Poloto Epesasa Tane Tupana Pepa Peyo Pee Leane Oko
1
Namba Polo. Gote bala tane-mane namba Jisasa Kataisana aposolo akali atola nembo tea-kola, namba balana aposolo akali ateyo. Epesasa tane wandakali yakama Gotena wandakali atoto, Jisasa Kataisa kuai lo wato minu atalaini. Nambato yakamana pepa oko peyo epe leyo.* Nanimana Ayiane Gote-la, Akali Andane Jisasa Kataisa-lamane yakama ondowa moyoto, yakamana yamapane mo tambo laya yakale lo pote leyo. Goteto piape Kataisato peane tupa nembo toto, nanimana tandini moyoyale, ati kenga tawe minditaka epene tupa pitaka nanima geane okonena, nanimato nanimana Akali Andane Jisasa Kataisana Ayiane Gote okona gene oko laiyu lamakale.*
4-5 Wamba Goteto yuu ati-la yakale nalene atoto, nanima towa epelewa yamapane yoto, nembo-tene epene mindi meaipia. Moto, balana wenonga nanimanga koo tene mindi nayene, balana yame epene tika-pene wete atalapale nembo teaipia. Wuane nembo toto, piape Jisasa Kataisato pula okomane Goteto nanima balana andopane yame gulape-pene lata yaepia.* Balana Iwanane yamapane yene okomane nanima moyoyale piape peane mambele, Goteto nanima wayumane wete ondowa moyoto, mangene utupane pitaka peane nembo toto, nanimato balana gene oko laiyu lape-pene.
7-10 Okone angi teke, Goteto nembo-tene epene waka mindi moto, matili gii mindi epola-angi, Kataisa bala minditaka yuu okona yalane tupapi, minditaka ati kenga yalane tupapi, utupane pitakana akali kawane atoto, utupane ando ateakale nembo teaipia. Kataisato wuane peakale lo Goteto nembo teane okone wamba too pitane ateane tekeko, matili Goteto balana nembo-tene epene okone nanimanga andawa leane. Nembo-tene epene okonepi, mana epene tupapi, utupane pitaka Gote balanga ya-kola, balato nanima ondowa moyoto, Kataisana tundupa okomane nanima kambo molo-peke loto, mana koo nanimato minalamane tupa apeaipia.*
11-12 Goteto minditaka mindi pukale nembo talane tupa enene piyane. Kataisato nanima moyalane lo bilipi leyama Juta yame wandakali nanimato Gote balanga tai lenepi, tii-penepi, utupane pitaka yene nembo toto, balana gene oko laiyu lo atalapale nembo toto, Goteto nanima wamba ini bulupane balana yame atalapale lata yaepia.*
13 Wandakali mindimane yakama languato, Kataisato wandakali yame waka tupapi molo-peke lalane lea-kola, yakamato pii enene okone ale wato, Kataisa lo bilipi leai. Yakamato bala lo bilipi leai-kola, Goteto balana Oli Sipitisa oko yakama gukale lo potomisa pii leane oko nembo toto, balana Oli Sipitisa oko yakama gea okoni. 14 Nanima pitaka-mane balana tai lenepi, tii-penepi, utupane pitaka nembo toto, balana gene oko laiyu lalapale loto, balato nanima molo-peke leaipia. Balato wuane peane okonena, nanima balana yame ateyama-kola, Goteto minditaka epene kambua tupa matili nanima gukale loto, balana Oli Sipitisa oko wamba ini bulupane nanima geane.*
Epesasa Tane Tupamane Mana Meakale Lo Poloto Pote Leane Oko
15 Goteto wuane peane okonena, yakamato Akali Andane Jisasa lo bilipi loto, Gotena wandakali pitaka towa epelewa yamapane yo ateyai lene oko nambato ale ewa. 16 Nambato pii okone ale wato, ole dindi lo yakama nembo toto, Gote wayu pele lo pote lalawane.
17-18 Anu peakale nambato wuane piyawanepe. Tai-lene andane wete okopi, tii-pene wete okopi, okonelapo nanimana Akali Andane Jisasa Kataisa okona Ayiane Gote balanga yene. Balato ati kenga tawe minditaka epene kambua longo paluni gulo balana wandakali nanima gukale leaipia. Yakamato minditaka epene utupane matili mia-makale nembo toto, maliyo atalapale nembo toto, Goteto yakama balana yame atalapale loto, ee lo meaipia. Balato wuane peane oko yakamato nembo talapale loto, Oli Sipitisa okomane yakamana nembo-tene okone tii piya wato, Gotena pii layene tupana tene tupa yakamanga mo panawa ateya. Oli Sipitisa okomane wuane peya-kola, yakamato mana kambua moto, Gotena mana tupa wayumane nembo talapale loto, nambato pote lo atalawane.*
19 Dee, nanimato Gote lo bilipi leyama-kola, balana tai-lene andane wete okomane nanimanga piape tailo wete piyane. Yakamato okone nembo talapale loto, nambato ole dindi lo pote lalawane teke.* 20 Wamba Gotena tai-lene okonemane Kataisa malinga ika laya alu, ati kenga balana kii tikasa peteakale leaipia.*
21 Wuane lalu, Goteto minditaka eya tupa pitaka Kataisana pangosa yakale leaipia. Balato wuane lea-kola, sipitisa tai-lene ateyai tupapi, yuu okona akali andane ateyai tupapi, gapomane ateyai tupapi, minditaka tai wete eya tupapi, dee minditaka gene andane yene andipa eya tupapi, matili yolopeya tupapi, utupane pitaka Kataisana pangosa ateyai.
22 Utupane pitaka Kataisana pangosa ateyai-kola, Goteto balana sosa oko moyoyale, Kataisa bala minditaka eya tupa pitakana kawane ateakale leaipia.* 23 Kataisa bala minditaka eya tupa pitakana kawane atoto, utupane pitakanga tumbi latane atalane. Sosa oko balana umbaini ateyama-kola, balato nanimanga tumbi latane atalane.*
* 1:1 Ap 18:19-21; 19:1 * 1:3 Ep 2:5-7 * 1:4-5 Jo 1:12; 15:16 * 1:7-10 Ep 2:5-7; Kol 1:12-16,18-20; Lom 16:25-26 * 1:11-12 Lom 8:28-30 * 1:14 2Ko 1:21-22 * 1:17-18 Kol 1:9-11 * 1:19 Kol 1:9-11 * 1:20 Sam 110:1; 2Ko 13:1-4; Kol 2:8-12; 1:15-16 * 1:22 Sam 8:6 * 1:23 Ep 4:10,15-16; Lom 12:3-5; Kol 1:18-20