24
Jisasa Bala Malinga Ika Leane Oko
Matiyu 28:1-10; Maki 16:1-8; Jone 20:1-10
1 Sande angi upa pitane wete wanda utupane yakama ika loto, wele tundupa-pene tupa mandeke pua yata yaini tupa mo mandiyu, Jisasa mali pitane ateane okona peainipia.
2 Poto andeai-kola, Jisasana mali asia lomba tuma peane ana pata andane wete oko minu pendeke layene yaepia.
3 Pendeke layene ya-kola, wanda utupane-mane mali ana anda okonena kolandaka loto, andeai wete, Jisasana umbaini oko mali okonena nayanga andeaini-pia.
4 Naya-kola, balana umbaini oko aninga eyape lo nembo kambua toto, andeai wete, wamba kapoyale akali lapo utupane ateainga mandaka ateapele-pia. Akali okonelapo liyambana tona peapele tupa tii wetete piyoko pene ateapi-kola, wanda utupane-mane akali okonelapo andoto, yuku-mane omeainipia.
5-7 Yuku-mane omoto, wanda utupane yakama anda yuunga lo ateai-kola, akali okonelapo-mane wanda utupane lamawuato, wamba Jisasa bala yakama towa atu Galili disitiki okona ateai-angi, balato yakama languato, matili akali mindimane Akalina Iwanane oko ene pitulu-peya leaipia. Ene pitula-kola, koo piyaini akali minditupa-mane bala ita malamanda okona peyo yuka olopeyai. Peyo yuka olai-kola, bala omalu, ole teponena malinga ika lolopeya lo balato yakama langea oko yakamato nembo tolo-peke lalapa. Wamba balato wuane leane pua teke, andipa bala malinga ika lalu pala. Bala mali okona ya napeya-ko. Anu peakale yakamato akali saka ateya okone wandakali omene yalane mali okona ayia peyaipe leapelepia.
8-10 Enjole okonelapo-mane wuane leapi-kola, Makatala tane wanda Matiya okopi, Jemesa angini Matiya okopi, wanda Jowanapi, wanda waka utupane towa atu epeaini tupapi, utupane pitaka-mane enjole okone-lapona pii leapele tupa ale wato, pii Jisasato wamba leane utupane nembo tolo-peke leainipia. Nembo tolo-peke lalu, wanda utupane-mane Jisasana mali okone tepa alu peke loto, Jisasana mali okona minditaka lee-mane andeaini tupapi, pii ale yaini tupapi, utupane pitaka aposolo akali masia tupapi, Jisasa lo bilipi lene wandakali waka tupapi, utupane pitaka lamai-yainipia.
11 Lamai-yaikola, wandakali utupane-mane pii utupane ale wato, wanda utupane-mane kee ene gulo pii okone leyai nembo toto, pii leaini tupa bilipi naleainipia.
12 Wandakali utupane-mane wuane nembo teaini tekeko, Pita bala ika loto, Jisasana mali okona taimane poto, tombawua loto, andandaka lea wete, Jisasa mali okonena ya napeanga andeapia. Jisasa bala mali peaini-angi, lapa-lapa mindimane bala puta pua ombo yaini okone angu tinga layene mali pango okona yanga andeaipia. Andoto, anu piya yape lo Pita bala nembo kambua tama peke leaipia.
Lapo Akali-mane Jisasa Asininga Andeapele Oko
Maki 16:12-13
13 Ole okone angi teke, Jisasa lo bilipi lene lapo akali Jutusaleme tepa alu, tano aŋako Emeasa lene okona poyale asia peapelepia. Tano okone Jutusaleme mandaka-yale kilomita masiapi mindi poyale asia peapelepia.
14 Tano okonena poyale, akali okonelapo-mane asininga poto, mangene peane tupa temane lo pii lalawa pima peapelepia.
15 Pii lama peapi wete, Jisasa bala akali okonelapo wato minalu, akali okonelapo towa mina mindiki loto, atu peainipia.
16 Atu peaini tekeko, minditaka mindimane akali okone-lapona lene oko mo ombo ya-kola, akali okonelapo-mane Jisasa atu peyama lo anda napene peapelepia.
17 Akali okonelapo-mane pii lalawa pima peapi-kola, Jisasato okonelapo tipa puato, asininga liyambato aki pii mindi lalawa pua lama peyapipe leaipia. Wuane lea-kola, akali okonelapo-mane mini kenda wato, asia puu napene, mee ongane atoto, weno omo ateapele-pia.
18 Atoto, akali okone-lapona mindi gene Kilopasa lene okomane Jisasana pii leane okone yano peyoto, satete ateyama okona mangene kambua wete pipia leaipia. Mangene kambua wete pipia-kola, Jutusaleme yuu okona wandakali ataima tupa pitaka-mane alewa nemboto ateyama-ko. Nimba angu ale naene, opene mindisa atalu epelepe leaipia.
19 Wuane lea-kola, Jisasato akali okonelapo tipa puato, mangene aki mindi pipiape leaipia. Wuane lea-kola, akali okonelapo-mane balana pii okone yano peyoto, wandakali pitakana wenongapi, Gotena wenongapi, Nasatesa tane Jisasa bala potopesa akali enene wete mindi atoto, metekolo piape tai-lene tupa piki puato, Gotena pii taimane lamaiki peane leaipia.
20-21 Balato Gotena piape okonelapo piki pua atea-kola, bala potopesa akali epolopeya layene okone epo atoto, nanima Isatale tane tupa moyo ateya nembo tema. Wuane tekeko, pitisa akali kawane tupapi, nanimana akali kawane tupapi, utupane-mane bala kosimi loto, gapomane okomane bala peyo ome leakale lo maipiai-kola, ami yanda yene tupamane bala ita malamanda okona peyo yuka apiai-ko. Bala mali pitane ateya-kola, andipa ole tepone guleya.
22-23 Andipa upa pitane wetete nanima yame wanda minditupa-mane Jisasana mali okona poto andalai-kola, balana umbaini oko mali okonena ya napiya yala. Ya napiya-kola, wanda utupane-mane peke loto, nanima languato, nanimato Jisasana mali okona poto andalama-kola, enjole lapo atalapi yala lalai. Enjole okonelapo-mane Jisasa bala saka ateya lalapi loto, wanda utupane-mane nanima langiyai-kola, nanimato pii utupane pitaka ale wato, moko andane lalama.
24 Moko loto, nanima yame minditupa-mane Jisasana mali andolo palai-kola, pitaka taka wanda utupane-mane lalai tupa enene lalai ya lo andalai yala tekeko, akali utupane-mane Jisasa bala angini anda napiyai yala leapelepia.
25-26 Wuane leapi-kola, Jisasato akali okonelapo tipa puato, Kataisa balato tandaka andane wamba ini nalu, matili bala gene andane miape-pene oko liyambato nembo nateyapipe. Wamba potopesa akali tupamane loto, Kataisato kenda-pene kambua awua atalu, matili bala omalu, ika loto, ati kenga polopeya leainipia. Anu peakale liyamba akali mini napalene gulo atoto, potopesa akali tupamane pii leaini utupane pitaka kapoyale bilipi naleyapipe leaipia.
27 Wuane lalu, Jisasato pii wamba Mosesapi, potopesa akali waka tupapi, utupane-mane bala ando pepa peleaini tupa pitakana tene tupa lo pana wato, akali okonelapo lamai-yaepia.
28 Jisasato akali okonelapo pii mana lamaima poto, Emeasa tano okona mandaka yale pulu, yuu waka mindisa poyale peaipia.
29 Poyale pea-kola, akali okonelapo-mane Jisasa lamawuato, ole loyale, nai baa andaka peya-ko. Nalipa towa palimakalenga, nimba puu napene, kondaa leapelepia. Wuane leapi-kola, Jisasa bala akali okonelapo towa palimakale lalu, andaka poto, peteaini-pia.
30 Andaka pituto, matili akali okonelapo towa tomo noyale, Jisasato betesa mindi moto, Gote wayu pele lo pote lalu, betesa okone konde loto, akali okonelapo neakale maiyapia.
31 Jisasato betesa maya wete, akali okone-lapona lene tii pea-kola, akali okonelapo-mane bala Jisasa ya lo andeapele-pia. Andeapi-kola, akali okone-lapona wenonga okone angi teke Jisasa bala kapoyale latako peaipia.
32 Latako pea-kola, akali okonelapo liyambato pii lalawa puato, wamba nanima asini epalama-angi, balato Gotena pii pepa pelene eya minditupana tene tupa nalipa langiya okomane nalipana yamapane mina ika laya ala okoni leapelepia.
33 Wuane lalu, okone angi teke liyamba ika lalu, Jutusaleme peke loto, Jisasana disaipolo alesa akali tupapi, wandakali waka minditupapi, utupane pitaka amunguli pua ateainga andeapili-pia.
34 Andeai-kola, wandakali amunguli pua peteaini tupamane akali okonelapo lamawuato, enene wete, bala malinga ika lala-kola, Saimoneto andala yala leainipia.
35 Wuane leai-kola, akali okonelapo-mane wandakali utupane lamawuato, nalipa Emeasa yuu okona poyale palapa-kola, asininga Jisasato pii minditupa nalipa langiyu, balato betesa konde loto, nalipa giyu piya-kola, nalipato bala Jisasa ya lo andalapa leapelepia.
Jisasato Balana Disaipolo Tupa Piape Pulu Pulupape Leane Oko
Matiyu 28:16-20; Maki 16:14-18; Jone 20:19-23
36 Akali okonelapo-mane pii utupane lamawua ateapi wete, Jisasa bala wandakali utupanena tombenenga epo ateaipia.
37 Epo panawa atea-kola, wandakali peteaini utupane-mane bala andoto, balana tandini epo ateya nembo toto, yuku-mane omeainipia.
38-39 Yuku yai-kola, Jisasato utupane lamawuato, anu peakale yakamato namba tandini angu epeya lo nembo kambua toto, yukuwa ateyaipe. Nambana tandini oko angu ipupia-yale, umbaini kulinipi nambana ateya okopene ata napipia-yaleko. Yakamana kii-mane namba mina andalapa. Namba Jisasa ateyo. Nambana kini kenengapi, nili peyapiai matikini oo eya utupa yakamato andalapa.
40 [Wuane lalu, Jisasato balana kini kenengapi matikini yane tupa wandakali peteaini utupanenga andawa leaipia.]
41 Wandakali peteaini utupane-mane balana kini kenepi nili peleaini matikini yane utupane andoto, epele yaini tekeko, Jisasa bala anu pua ika lalu, nanima peteyamanga epo ateyape lo tatake wato, akali epo ateya oko bala Jisasa ya lo bilipi naleainipia. Utupane-mane Jisasa bala enene wete epo ateya lo bilipi naleai-kola, Jisasato utupane tipa puato, tomo nolane mindi eyape leaipia.
42 Wuane lea-kola, utupane-mane pisa yangene mindi yaini oko bala mo mayainipia.
43 Mayai-kola, balato pisa okone mo nea-kola, utupane-mane andeaini-pia.
44 Andeai-kola, balato wandakali utupane lamawuato, wamba Mosesapi, potopesa akali waka tupapi, utupane-mane namba andayo pii kambua pepa peyo yata yaini leaipia. Akali waka minditupa-manepi pii okonepene teke kambua minditupa buku Sama okona pepa peyo yata yainipia. Wamba namba yakama towa atu atema-angi, namba andayo pii pepa peyo yata yaini utupane pitaka matili nambanga enene gulolo-peya lo nambato yakama langewa-ko. Andipa utupane nambanga enene guleya leaipia.
45 Wuane lalu, utupane-mane Gotena pii pepa pelene eya utupanena tene tupa nembo teakale loto, Jisasato utupane moyaepia.
46 Utupane moyoto, balato utupane lamawuato, Gotena pii pepa pelene eya mindimane loto, Mesaya bala tandaka andane noto, omalu, ole teponena malinga bala ika lape-pene.
47 Malinga ika lola-kola, Jutusaleme ato tewa, akali minditupa-mane Mesaya okona gene oko loto, wandakali yame palu pula tupa pitaka lamawuato, Goteto yakamana mana koo tupa apia-geakalenga, yakama yamapane peke lalapape lape-pene layene eya.
48 Gotena pii layene eya pua, namba omalu, malinga ika lalu, saka ateyo oko yakamato lee-mane andeyai-ko. Yakamato piape okone pua atalapape.
49 Yakamato pii okone wandakali pitaka lamai-yapale nembo toto, wamba nambana ayiane okomane potomisa pii mindi yakama languato, matili nambato Oli Sipitisa oko yakama gukale lea okoni. Nambato Oli Sipitisa okone yakamanga epeakale lolowa-kola, bala ati kenga atala epoto, yakama minu tai laya olopeya-ko. Oli Sipitisa okone yakamanga epeakale loto, yakama Jutusaleme tano okona maliyo atalapape. Oli Sipitisa oko epola-kola, yakamato nambana pii oko wandakali pitaka lamalu pulupape. Jisasato wuane leaipia.
Jisasa Bala Ati Kenga Peane Oko
Maki 16:19-20; Aposolo 1:9-12
50 Matili Jisasato balana disaipolo tupa lamialu, Jutusaleme tepa alu, Betani tano okona mandaka yale peainipia. Yuu okonena atoto, Jisasato balana kini okolapo ya loto, balana disaipolo tupa belesini mindi mayaepia.
51 Belesini mawua atea-kola, Goteto Jisasa bala ati kenga epeakale loto mea-kola, bala ati kenga iyu okona peaipia.
52 Pea-kola, utupane-mane bala lo lotu lalu, epele wete wato, Jutusaleme peke leainipia.
53 Peke lalu, ole dindi lo utupane-mane lotu anda andane okona atoto, Gotena gene oko laiyu lo ateainipia.