19
Egvu-aphụ, a gụru nụ
ndu ishi ndu Ízurẹlu
1 Gụaru ndu ishi ndu Ízurẹlu egvu-aphụ;
2 sụ ẹphe:
“Lẹ nne unu shikwa bụru
nne agụ l'ẹke oke agụ ndu ọdo nọ.
Ọ shi azẹje l'ẹke ụnwu agụ
dọru l'ehe ụnwu iya.
3 O hefutaru ụnwu iya nanụ;
yọ bya abụru agụ, nweru agburu-ẹhu.
Yọ bya amụa ẹge aalakashịje
anụ teke e gburu iya;
bya afọ-gbushilahaa madzụ.
4 Iphe bụ mbakeshi anụa akọ ẹhu iya;
bya emee ya;
yọ dalahụru ẹphe l'iduma.
Ẹphe abya egude nko kofuta iya;
kpụru lashia Íjiputu.
5 Teke nne agụ phụru lẹ
ya lewaru ẹnya iya;
to nwedu ishi;
yọ bya eduta nwa iya ọdo; hee; hefuta;
yọ bya abụru agụ ike.
6 Yo bya etsoru agụ ibe iya l'ejephe;
kẹle nta b'ọ kanwụwaru ẹhu.
Yọ bya amụkwaphu ẹge
aalakashịje anụ teke e gburu iya;
bya afọ-gbushilahaa madzụ.
7 Yo nwutsushia ẹke bụ agbarike ẹphe;
bya emee mkpụkpu ẹphe;
yọ daburu ochobo.
Ekiri, oode emeru egvu ye alị ono;
mẹ ndu bu iya nụ l'ẹhu.
8 Tọ dụ iya bụ;
iphe bụ mbakeshi abya enyia;
kwabẹru iya;
mbụ ndu shigbaa ẹke,
dụgbaa iche l'ẹke ono mgburumgburu.
Ẹphe abya eworu ọnya shiberu iya.
Ya ndono; yọ bya adaaru ẹphe l'iduma.
9 Ẹphe abya egude ịkokoro
kpụfuta iya ye lẹ mkpuchi;
pajeru eze ndu Bábyilọnu.
Ẹphe abya enwuru iya ye lẹ mkpọro.
Ya ndono; ekiri ono,
oodeje ono ta dụhe onye
anụjekwadu iya nụ
l'eli ugvu, nọtsua lẹ Ízurẹlu.
10 Nne ngu dụlephu l'ọ bụ
oshi vayịnu, nọ lẹ mgbabu ngu.
A dzaru iya l'iku mini;
yọ mịa wọkfuru awọkfuru;
ẹkali iya jaru deru gẹyingu;
kẹle mini nọkota l'ẹke ono;
11 Ẹkali iya shihukotaru ike;
shihubeta iya;
k'ọphu ee-gude iya pyịta mgbọro-eze.
O vuru; kakọta oshi ọdo,
nọ l'ẹke ono l'eli;
ẹkali iya ajakashịkota ajakashi.
12 Obenu l'a bya egude
ẹhu-eghughu fefu iya; tọgbo.
Phẹrephere, shi l'ụzo ẹnyanwu-ahata
abya kpọo ya gwengu.
A bya anyịshikota iya akpụru.
Ẹkali iya ono, shihukotaru ike ono
abya akpọshihukota nkụ,
Ọku abya adzụfu ẹphe.
13 A bya eworu iya je adzaa l'echi-ẹgu nta;
l'ẹke kpọhuru nkụ; mbụ lẹ kpọkpokirikpo alị.
14 Ọku agbanwuhu l'ẹkali iya lanụ;
dzụa akpụru iya.
Ọphu o nwehedu ẹkali,
shihuru ike, nọkwadu iya nụ,
dụ mma k'ogude pyịta mgbọro eze.”
Ọwaa bụ egvu-aphụ, a-nọgude nụ.