27
Iphe e-me ndu Táya
1 Tọ dụ iya bụ; Ojejoje abya ekfuru mu sụ mu:
2 “Nwa ndiphe: kwaa ẹkwa ndu Táya.
3 Nggu ekfuru ndu Táya, bu l'ọnu eze ẹnyimu; mbụ ndu, ẹphe lẹ ndu ọnu-ẹnyimu ọdo l'iche iche agba oke nghọ. Ọwaa iphe Ọkaribe-Kakọta-Nụ ekfu. Ọ sụru:
“ ‘Nggụbe Táya;
ị sụru l'ị bụ nwọdu-geru.’
4 Ufu ngu bụ l'eze ẹnyimu.
Ị bụ eze ụgbo-mini, a kụru;
t'o nwe ẹkworo.
5 Ndu kụru ụgbo-mini;
bẹ bụru l'ugvu Seniru
bẹ ẹphe gburu oshi
payịnu gude kụa ya;
bya ejee l'ugvu
Ugvu Lébanọnu je ebua oshi sida
gude gvuaru ngu itso iya.
6 Yọ bụru l'alị Báshanu;
bẹ e je ebuko achị,
e gude pyịshia eku-ụgbo ngu;
bụru oshi sayịpuresu;
bẹ ejeru je ebukotsua
l'ọnu-mini ndu Sáyipurọsu
gude gbaa ọgbodo-alị
ụgbo-mini ngu ono;
bya egude ọdu-enyi meshikota iya.
7 Ẹkwa-ọcha, a kparu;
yọ dụ k'ekfukfu, shi lẹ Íjiputu
b'e gude kwee l'imeli
ụgbo-mini ono,
bụ iphe emeje t'ụgbo-mini agba ọso;
bụru iya bẹ eegudeje ahụbe ngu ama.
Iphe e gude kwekota
l'ụgbo-mini ono tẹ mini ba bahụjeshi iya
bẹ bụ ẹkwa, eke
urukpu-urukpu;
mẹ ọphu eke ododo,
shi l'ikfuli Elisha.
8 Unwoke Sayịdonu;
mẹ unwoke Avadu
bụ ndu shi akpọkotaru
ngu ụgbo; nggụbe Táya.
Unwoke ngu, bụ ndu
ọ-maru-ẹnya-nka
bẹ bụkota ndu angakọtaru ngu ụgbo-mini.
9 Ndu Gébalu, bụ ndu
mewaru nka metee ya emete
b'i dutakotaru t'ẹphe
nọduje l'ụgbo-mini ngu
l'emechishijeru ngu ẹke
ụzo, nọ ẹphe teke ẹphe fuhujeru ụzo.
Iphe bụ ụgbo-mini, nọkota l'eze ẹnyimu;
mẹ ndu angakọta
ụgbo-mini
ono bẹ abyakọta ngu ọzuta aswa.
10 “Unwoke ndu Peshiya; mẹ unwoke ndu Lidíya yẹle unwoke ndu Putu shi bụkotaru ndu sọja ngu. Ẹphe chịkoje iphe ẹphe gude eze nze ọgu; mẹ okpu-igwe, ẹphe kokota l'ime ngu. Ẹphe emeje; nggu adụ ugvu.
11 Unwoke ndu Avadu; mẹ ndu kẹ Helẹku; bụ ẹphe a-nọdu echeru ngu ụpho-mkpuma ngu nche mgburumgburu. Unwoke ndu kẹ Gamadu bụ ndu anọtsujeru ngu l'ụlo-eli. Ẹphe ewojeru iphe ẹphe egudeje eze nze ọgu kokota l'eli ụpho-mkpuma, e gude kpụ-buta mkpụkpu ngu; iphe ono, ẹphe kokotaru l'ụpho-mkpuma ono meru; mma ngu edzua edzudzu.
12 “Ndu Tashishi bẹ nggu l'ẹphe shi azụko aswa; okfu l'i nweru ẹku l'asa iya l'asa iya. Ẹphe shi egudeje mkpọla-ọcha; mgbọro-ígwè; nshị-ashanga; mẹ nshị-ígwè bya ngu ọzuta iphe.
13 Ndu Javanu; mẹ ndu Tubalu; mẹ ndu Mẹ́sheku shi achịjeru ohu; mẹ ngwa-aswa, e gude ope mee bya ngu ọzuta aswa.
14 Unwoke ndu Betu-Togarama shi akpụjeru ịnya, eegude eje ozi; mẹ ịnya-ọgu; mẹ ịnya-mulu bya ngu ọzuta aswa.
15 Unwoke ndu Ródu bẹ nggu l'ẹphe shi zụkoje aswa. Igweligwe ndu butsua l'iku eze ẹnyimu shi bụkotaru ndu ọnya aswa ngu. Ẹphe egudeje ọdu-enyi; mẹ oshi eboni kfụa ụgwo aswa iphe ẹphe zụru ngu.
16 Ndu Áramu bẹ shi azụje ngu aswa; kẹ l'iphe iimeshi emeshi bẹ ha igweligwe. Ẹphe shi egudeje mkpuma tọkwasu; mẹ ẹkwa, eke uswuswe; mẹ ẹkwa, a dzụru dengashia ya edengashi; mẹ ẹkwa ọcha; mẹ mkpuma koralu; mẹ mkpuma rubi bya ngu ọzuta aswa.
17 Ndu Júda; mẹ ndu alị Ízurẹlu shi abyajẹkwa ngu phụ ọgbata nghọ. Ẹphe shi egudeje witu, shi lẹ Minitu; mẹ igberi; mẹ manụ-ẹngu; mẹ manụ bamụ bya ngu ọzuta iphe i meshiru.
18 Ndu Damásukọsu gudekwaphu l'i meshiru iphe igweligwe; mbụ kẹ l'i nweru ẹku ntụmatu gude mẹe, shi lẹ Hẹlubonu; mẹ ẹji atụru, shi lẹ Zaharu bya ngu ọzuta aswa.
19 Ndu Wedanu; mẹ ndu Javanu, shi lẹ Uzalu bẹ zụtsukwaru ngu phụ aswa. Ẹphe gude akpụrakpu ígwè yẹle kashiya; mẹ kalamọsu, bụkota iphe eegudeje eme manụ ajịji t'o shi kwẹkwekwe bya ngu ọzuta aswa.
20 Ndu Dedanu shi egudeje ukpo, eegudeje nọdu l'eli ịnya bya ngu ọzuta aswa.
21 Ndu Arébiya; mẹ iphe bụ ndu achị ndu Kéda bẹ bụkota ndu shi azụje ngu aswa. Ẹphe achịjeru atụru; mẹ ebyila yẹle eghu bya ngu ọzuta aswa.
22 Ndu Sheba; mẹ ndu Réma bẹ shi azụjekwa ngu phụ aswa. Ẹphe gude ọkpobe manụ; mkpuma, vugbaa oke aswa; mẹ mkpọla-ododo bya ngu ọgba-nweta ngwa-aswa.
23 Ndu Háranu; mẹ ndu Kane; mẹ ndu Ídẹnu yẹle ndu agbatsụa ikike nghọ, shi lẹ Sheba; mẹ ndu agbatsụkwaphu ikike nghọ, shi lẹ mkpụkpu Ashọ; mẹ lẹ mkpụkpu Kilimadu bẹ zụkotakwaru ngu phụ aswa.
24 Ẹphe ejejekwaphu aswa ẹphe ọzuta ẹ́kwà, amatsụa iphe dụ biribiri; mẹ uwe, eke urukpu-urukpu; mẹ l'ẹ́kwà, a dzụru dengashia ya edengashi; mẹ njịgbanji ukpo, vọngashiru avọngashi, aatọgboje l'ọgbodo-ụlo, a gwọru agwọgwo; kegudetsua ya l'ishishi ukpo ono jịngujingu.
25 Ụgbo-mini Tashishi bụ unubẹ ndu Táya bẹ ẹphe evujeru iphe.
“Nggụbe Táya dụlephu l'ọ bụ
ụgbo-mini, e dojiru iphe edoji;
yọ nọdu l'echi eze ẹnyimu.
26 Ndu akpọ ngu l'ụgbo ngu
kpọtawaru ngu je
edegeru l'echi eze ẹnyimu.
Obenu lẹ phẹrephere,
shi ụzo ẹnyanwu-ahata;
byaru bya azụkashia ngu l'echi eze ẹnyimu.
27 Ẹku ngu; iphe i gude agba nghọ;
ngwa-aswa ngu;
ndu angaru ngu
ụgbo-mini; ndu etso
ụgbo-mini ngu;
ndu emekwajeru ngu iya;
ndibe ngu, agba ikike-nghọ;
ndu sọja ngu l'ẹphe ha;
mẹ l'iphe bụ ndu nọ
l'ụgbo-mini ono;
bẹ mini rikotaru mbọku, ụgbo ngu kpuru;
l'echi eze ẹnyimu.
28 Mkpu, ndu angaru ngu ụgbo-mini echi;
e-me tẹ mgbogidi
eze ẹnyimu nmahụ jijiji
29 Iphe bụ ndu akpọ ụgbo
nwuhakotaru ụgbo ẹphe.
Ndu anga ụgbo-mini;
mẹ ndu etso ụgbo-mini ono;
jeru je anmagatsụaru l'iku eze ẹnyimu.
30 Ẹphe ara ẹkwa ngu ntụmatu;
l'ara iphe dụ biribiri.
Ẹphe e-kpota ntụ kpukposhi onwẹphe l'ishi;
bya agwọ-swikota onwẹphe lẹ ntụ.
31 Ẹphe akpụru ngu ishi ngu;
yeeru ngu uwe-aphụ.
Ẹphe a-ra ẹkwa ngu;
l'agụ aphụ ngu;
mbụ l'agụwaa ịshirishi.
32 L'ẹge ẹphe ara ẹkwa;
l'agụ aphụ ngu;
bẹ ẹphe agụ egvu-aphụ ọwaa; sụ:
‘?Bụ mkpụkpu ole;
bẹ bụjekpooru kpurupyata l'echi eze ẹnyimu
ẹge ọwaa, mkpụkpu Táya bụ iya-a?’
33 Teke e shi evuje ngwa-aswa
ngu l'eshi eze ẹnyimu;
b'o ruberu iphe, bụ mbakeshi ẹka.
Eze ẹku ngu, dụ egvu;
mẹ ngwa-aswa ngu;
bẹ ndu eze lẹ mgboko gude bụru ụbabanyi.
34 Obenu lẹ nta-a;
bẹ mini riwaru ngu l'eze ẹnyimu.
Ngwa-aswa ngu ono yẹle
ndu ejejeru ngu ozi;
bẹ mini rikotaru nggu l'ẹphe.
35 “Ndu, bu l'iku eze ẹnyimu l'ẹphe ha bẹ biribiri iya gudekotaru. Ndu eze, achịtsua ẹphe anmahụkota ruuruu. Ẹphe akpọtsua beru l'ẹke égvù riru ẹphe ẹhu.
36 Ndu ikike nghọ l'iphe, bụ mbakeshi b'ọ dụru biribiri ẹge i meru ekpolahu ngu iphe mmanu; to nwehe ẹge e kfu iya ọdo.”