14
1 “Iphe, bụ madzụ,
nwanyi mụru;
bẹ ndzụ iya dụ-a tsọ-kengu.
Ọ bụluphu iphe-ẹhuka bụ
iphe, jiru iya nụ.
2 Ọojashije ẹgwegwa l'ọ bụ igu oshi;
nwụkwaaphu kpaa teke ono teke ono.
Yọ bụru ẹge nwonyonyo
ẹ ta akpọjedu ụkfu bụ ẹge
ẹ tọ dụdu ẹge ọono-beje.
3 ?Bụ egbe onye ono;
bẹ ii-woru ẹnya rụbe.
?Bụ egbe onye ono;
bẹ ịi-kpụta bya iya okpe ikpe l'ifu ngu.
4 ?Bụ onye a-dụ-ghe ike shi
l'iphe ẹ ta dụebedu mma
wofuta iphe, dụebe mma.
Ẹ to nwekwa.
5 Keshinu ọphu a gụwaru ẹge
madzụ a-nọ-bebe ọgu doberu iya;
tụ-buwaru iya ọnwa ole,
ọo-nọ lẹ mgboko-a;
bya ekoshiwa iya ẹge ẹ tọo nọghatadu;
6 wofunu ẹnya l'ẹke madzụ nọ;
haa ya t'ọ tụsaru ẹhu;
jeye teke oo-jeghee oke-ozi iya
l'ọ bụ onye e buru ozi.
7 Oshi, gvuru l'alị nwekwaru
iphe, oole ẹnya iya;
mbụ l'e -gbutsua ya;
yo futa ọdo l'ukfu iya.
Ono, o futaru ono anyaa.
8 Ọ bụ oswi-okfu l'ọ́gbaragba iya a-kashịhu;
ukfu iya anọdu l'alị nwụhu;
9 obenu l'ọ -nụlephu nshishi mini;
yọ dzụta ọdo;
bya erua iru ọphungu l'ọ bụ
iphe, a kụru akụku.
10 Obenu lẹ madzụ -nwụhuwa; e lia ya.
Ọ -tụ-buwa ume;
bẹ nk'iya gvụwaru.
11 Ọ bụ ẹge mini atahụje l'ẹnyimu;
alị akpọshihu nkụ;
12 bụ ẹge madzụ azẹje;
too gbeshihe ọdo.
Ẹ too tehuhedu ọdo;
ọphu o nwedu ẹge e meru iya;
o gbe etetakwadu.
13 Ọ dụ mu t'a sụ l'ii-wotale
mu phụ je edomia l'ime ili;
kpuchia mu iphe l'ẹke ono
jeye teke ẹhu-eghughu ngu a-dazita.
Ọ dụ mu t'a sụ l'i tuburu
l'ọo ẹge aa-nọ-bebe ndọ;
tẹmanu nggu anyata mu.
14 Madzụ -nwụhutsua;
?ọo-nọdu ndzụ ọdo tọo.
L'iphe, bụ oge
iphe-ẹhuka-a, mu nọ-a;
bẹ mu e-eche jeye teke
aa-tọfuta mu.
15 Teke ono bụ: i -kua mu oku;
mu aza ngu.
Teke ono bẹ mubẹ
onye ono, i gude ẹka ngu
kee ono a-dụlahaa ngu mma l'ẹnya.
16 Teke ono; bẹ ịi-wata ọgu ije mu ọgu;
nggu elebuhu ẹnya l'iphe, dụ ẹji, mu meru;
17 nggu eworu iya kechia ekechi;
ruru iphe kpube iya.
18 Obenu l'ọ bụ ẹge
ugvu anọduje eribashihu; l'avọkposhihu;
mbụ ẹge eenwufuje mkpuma
l'ẹke ọokporu;
19 mbụ ẹge ono, mini
ekwobashije mkpuma;
mbụ ẹge ono, ukporo-mini evuje ẹja ono
bụ ẹge iimebyishije iphe,
madzụ ele ẹnya iya.
20 Ịikapyabeje madzụ ẹkuku;
kẹ onye ọphu agvụ.
Iimeje tẹ ifu iya gbanwee; yọ bụru iya alala.
21 Ọ -bụru l'aakwabẹ
ụnwu iya ugvu;
b'ẹ t'ọ mahẹdu.
Ọ -bụru l'akpụ ẹphe ifu l'alị;
b'ẹ t'ọ phụhedu iya.
22 Iphe, eru iya l'ẹhu bụ iphe,
ahụ iya ọku l'ẹhu nk'iya.
Yọ bụru aphụ k'onwiya;
bẹ ọogu nkịnyi iya.”