18
Ọnu k'ẹbo, Bilidadu eye
1 Tọ dụ iya bụ; Bilidadu kẹ Shuha abya ekfuru yeru Jobu; sụ iya:
2 “?Bụ teke ole; bẹ ii-kfu ẹge-a kfubebe.
T'egomunggo rua ngu alị;
t'ayi e-ye ọnu l'iphe-a.
3 ?Nanụ ẹge ọ dụ;
bẹ iile ayi l'ayi bụ eswi.
?Nanụ ẹge ọ dụ;
bẹ iile ayi l'ayi bụ ndu eswe.
4 Nggụbe onye iphe ghutaru eghughu;
nggu eworu onwongu labushia alabushi;
?bụ t'a haaru ngu mgboko
nwẹnkinyi ngu tọo.
Tọo ?t'e je afọshia mkpuma l'ẹke ọonotsua tọo.
5 Urọku ndu eme ẹjo iphe;
bẹ aa-phụ-nyi;
6 Ụlo iya a-bụru ọchi;
urọku iya, nọnyabe iya nụ anyịhu ọku.
7 Ọkpa ono, o shi adzọje
girimu-girimu ono;
bẹ ee-me;
yọ dụ iya tsụgo-tsụgo.
Yọ bụru idzu, ọ chịru
e-nwutsu iya.
8 O jeru je eye ọkpa l'ụgbu,
e domiru l'ụzo; yọ nma iya.
9 Ọnya nmaru iya l'ichirukfu;
izekwe atụ-pyabe iya.
10 E libewaru iya ọnya l'alị;
kpọberu iya ọnya l'ụzo,
o shije.
11 Ọonoduje atsụ egvu l'iphe,
bụ ẹke, o shi.
12 Ẹgu mewaru iya; ike ta dụhe iya.
Ụmuruku nọwa kwabẹru iya teke ọo-da.
13 Iphe-ememe swawaru iya akpọ l'ẹhu;
anwụhu a-vụ iya avụvu.
14 Aa-kpụta iya kpụfu l'ụlo iya
ẹke ọkpa ruru iya alị;
kpụru iya je edobe l'ẹke,
ọo-nọdu nwụa ẹjo ọnwu.
15 Iphe, bụ iphe, nọ l'ụlo iya;
bẹ ẹka kụfuru iya;
e woru ọku nshị-egbe
kpukposhi l'ụlo iya.
16 Ọo-nwụ kpaa jeye l'ọ́gbaragba iya;
kpọo nkụ jeye l'ẹkali iya.
17 Aa-zaha iya lẹ mgboko;
ẹpha iya ephuhu l'alị iya.
18 Aa-chịfu iya l'ẹke iphoro nọ;
chịru ye l'ẹkpuru-ọchi;
yọ chịhu lẹ mgboko.
19 Ẹ to dobedu akọ;
to nwe nwa, ọ mụtaru.
Ẹgbara a-kfụ l'ufu iya.
20 Ọnodu iya teru ndu
ẹnyanwu-arịba ụkfu;
nyịa ndu shi l'ụzo
ẹnyanwu-ahata ishi ẹdzu.
21 Iyee! Ọ bụ ẹge ono;
bẹ ọoduje l'ufu ẹjo madzụ;
bụkwaruphu ẹge ono;
bẹ ọoduje l'ufu onye ẹ-ta madu Nchileke.”