22
Ọnu k'ẹto, Elifazu eyeru Jobu
1 Tọ dụ iya bụ; Elifazu, bụ onye Témanu abya eyee ọnu; sụ:
2 “?O nweru mkpa,
madzụ agaru Nchileke tọo;
Jeyekpo l'onye maru iphe;
?ọ garu Nchileke mkpa ngụnu.
3 ?O nweru uru,
Ọkaribe-Kakọta-Ike erita
kẹ l'ị bụ onye doberu ẹka ndoo?
?Bụ ngụnu bẹ oo-rita
kẹ l'ị bụ onye, ụta ẹ-ta dụduru?
4 ?Bụ kẹ l'ị bụ onye,
atsụje iya egvu b'o
gude abaru ngu mba.
?Bụ iya b'o gude l'eku
ngu ikpe iya tọo.
5 Ẹ tọ bụkwa iya!
Ẹjo iphe ngu haakwa nshinu;
bụwaru 'agụta agụta.
6 I yebutaru ndu ụkpa;
ẹphe eyeshia uwe,
ẹphe yeru l'ẹhu;
gude yeru ngu l'itumo
ụgwo, ẹphe ji ngu.
7 Onye ike gvụru;
b'ẹ ti chebedu mini.
Onye ẹgu agụ;
b'ị jịkaru l'ẹ tị nụdu nri;
8 ọle ị bụkwa eze madzụ, nweru alị;
buru l'alị ono; bya abụru
onye aakwabẹ ugvu.
9 Ụnwanyi, maa tụfuru;
b'ị gbabẹru ẹka; chịfu;
mee ndu a tọru ogbe;
ike agvụ ẹphe.
10 Ọ bụ iphe ono kparu
iphe, a gbaru ọnya
swiphee ngu mgburumgburu.
Iphe ọtu-l'ụkfu abya azụ ngu gbirimu.
11 Ọ bụ iphe ono kparu
iphe mgboko gbakọtaru ngu ọchi;
tọ dụhedu iphe, ịiphujekwadu.
Utso abya ekpua ngu.
12 Nchileke nọ
l'ephekerephe imigwe;
nọdu l'ẹke ono
l'aphụkota mkpọ-kpodo
ndu ọphu ha nshinu,
nọdu oreke-imeli.
13 Ị -nọdu; nggu asụ:
Nchileke; ?ọ maru ngụnu.
?O shighe l'ẹke ono,
urukpu domiru iya ono l'ekpe ikpe tọo?
14 Mbụ l'oke urukpu
tsọpyaberu iya;
k'ọphu bụ l'ẹ t'ọo
phụjedu ayi teke oojephe
lẹ mkpakụ igwe yẹe alị.
15 ?Bụ ẹjo ụzo ono,
ndu ẹjo madzụ tsohawaru ono
b'i me t'i tsoo tọo.
16 Ndu ono b'a
kpokwofuru akpokwofu;
ẹphe alaa teke ẹ-ta gbadu ẹphe.
Ukporo-mini abya
ekpoo ẹphe l'ọ́gbaragba.
17 Ẹphe asụ Nchileke:
‘T'o gbeshi l'ẹke ono!
?Bụ ngụnu bẹ
Ọkaribe-Kakọta-Ike
a-dụ ike mee ẹphe?’
18 Obenu lẹ Nchileke
vulekwarua iphe,
dụ mma vujishia ụlo ẹphe.
Ọ bụ lẹ mu te
etsojekwanu l'idzu ndu ẹjo madzụ.
19 Ndu doberu ẹka ndoo abụje;
ẹphe -phụa iyi, eyi ndu ẹjo madzụ;
ẹhu atsọlahaa ẹphe ẹna.
Ndu ọphu iswi dụ mma
anọduje achị ẹphe ọchi; sụ:
20 ‘Ndu ọhogu ayi bẹ
aa-kabẹ mewa;
ẹphe abụru kpurupyata.
Ẹku ẹphe l'ọ ha bẹ ọku dzụakwaru.’
21 Woru onwongu ye
Nchileke l'ẹka;
k'ọphu ẹhu a-dụ ngu agu;
ẹku abụru nke ngu.
22 Ngabeje nchị l'okfu, shi iya l'ọnu;
nggu ahaa okfu iya ono
t'ọ nọdu ngu l'ọriri.
23 L'ị -laphutawa azụ lakfuta
Ọkaribe-Kakọta-Ike;
bẹ oo-dobephu ngu azụ l'ọnodu ngu.
Ọ -bụru l'i tụkoru
ẹjo iphe, nọ lẹ nke ngu woshia;
24 bya eworu
mkpọla-ododo ngu l'ọ ha lia l'ẹja;
woru mkpọla-ododo Ofi
ngu je achịru ye l'ọgba
t'ọ bụru mkpuma, nọ lẹ mini;
25 bẹ Ọkaribe-Kakọta-Ike
a-bụru mkpọla-ododo ngu;
bya abụru ẹgiri
mkpọla-ọcha, i nweru.
26 Ọ bụ teke ono;
bẹ Ọkaribe-Kakọta-Ike
a-gụlahaa ngu agụgu;
nggu apalilaha ifu apali l'ẹke Nchileke nọ.
27 Teke ono bẹ ii-kfujeru
nụ Nchileke;
yọ ngaaru ngu nchị.
Nggụbedua e-meeru iya
iphe, i kweru iya ụkwa iya.
28 Iphe, bụ iphe, ị tuberu
k'ememe; e mee ya ẹge ị tụberu iya.
Ụzo abya agụhaaru ngu;
29 kẹle Nchileke ewozitaje
onye apali onwiya eli;
palia onye wozitaru onwiya alị.
30 Nchileke adzọje ndu iswi dụ mma.
Ọo-nafụta ngu;
m'ọ -bụru l'ẹ tọ dụdu
iphe, i gude ẹka ngu kpata.”