24
Umere ndu ẹjo madzụ
1 “?Bụ ngụnu meru iphe,
Ọkaribe-Kakọta-Ike
te eyejedu mbọku,
oo-kpe ikpe.
?Bụ ngụnu meru iphe,
ndu maru iya nụ
anọduje ele ẹnya mbọku ono;
yọ bụru kẹ mmanu.
2 Ékpè, e gude kpaa ókè-alị;
bẹ madzụ afọfuje fọribe;
l'ezikoje atụru ndiphe; wata echeche.
3 Nwa-nwogbe; bẹ ẹphe
achịfuje nkakfụ-ịgara iya;
naa nwanyi, maa tụfuru
oke-eswi iya l'itumo.
4 Ndu ụkpa; bẹ ẹphe te
ekwejedu t'ẹphe swee l'ụzo.
Ẹphe emeje ẹphe t'ẹphe
je edomishia onwẹphe.
5 Ọ bụ ẹge
nkakfụ-ịgara-ọswa
etsojeru echi-ẹgu aghaphe;
bụ ẹge ndu ụkpa anọduje aghaphe;
l'achọ iphe, ẹphe e-ri.
6 Nri ẹphe bụ iphe,
ẹphe kpataru l'akpaa;
mbụ l'ẹgu ndu ẹjo iya ono.
7 O -bee l'ẹnyashi;
ẹphe agbashịaru ọtu; zẹru;
kẹ l'ẹphe te nwedu uwe,
ẹphe e-ye;
ẹphe te enwe ọphu ẹphe
e-ye gude gbochita oyi.
8 Igwe -wata ọchi mini;
mini, shi l'ugvu ono anma ẹphe.
Yọ bụru lẹ mgbaku eze mkpuma;
bẹ ẹphe ejeje je eswii;
kẹ l'ẹphe te nwedu ụlo.
9 Nwata, nna iya tọru nwogbe;
bẹ aanatajẹ nne iya teke ọongu ẹra;
woru iya ye l'itumo.
10 Ẹphe agbajẹru ọtu
tsoru l'aghaphe;
okfu l'ẹphe te nwedu uwe.
Ẹphe evuje akpe,
e gbutaru l'okfu;
ẹgu l'eme ẹphe.
11 Ẹphe anọduje l'ome manụ olivu;
l'akụ mẹe vayịnu;
ẹkpiri l'akpọ ẹphe nkụ; ẹphe te ede iya ire.
12 Ude, ndu anwụhu anwụhu atsụ;
bẹ ngashịru mkpụkpu.
Ẹge ono;
bẹ ndu e mekaru iphe
echikwaphu mkpu;
l'achọ onye e-yeru ẹphe ẹka;
ọphu Nchileke 'eyedu ọnu
l'araku, ẹphe araku iya.
13 O nweru ndu ọphu jịkaru iphoro ono.
Ẹphe ta madu ụzo iya;
ẹphe te shi ibyiya ọphu ooshi.
14 Ọobuje; ọchi gbalẹphu;
mgbugbu-madzụ awata
ogbushi ndu ụkpa;
mẹ ndu ẹ-ta dụdu ẹge ọ haru ẹphe.
O -rua l'ẹnyashi;
yọ ghọo onye iphura.
15 Iphe onye eri ogori
anọduje ele ẹnya iya bụ tẹ nchi jihu;
k'ọphu ẹ-tọ dụdu onye a-phụ iya nụ!
Yo woru iphe phuchia ifu.
16 Ọ bụ l'ẹnyashi;
bẹ ndu iphura ejeje je etsukaa ụlo.
O -be l'eswe;
ẹphe aguchia onwẹphe ụzo;
kẹ l'iphoro dụ ẹphe ashị.
17 Ẹphe l'ẹphe ha; bẹ bụ
ọchi, gbaru dụdudu
bụ nchi-abọhu nk'ẹphe.
Yọ bụru iphe oye-egvu ono,
anọje l'ọchi ono;
bẹ ẹphe l'ẹphe anọduje eshi ọ̀nyà.
18 Obenu l'ẹphe bụ
ụphu tukoru l'eli mini.
Oke-alị ẹphe b'a tụwaru ọnu;
k'ọphu bụ l'ẹ tọ dụdu
onye agba ọkpa l'ẹke
ẹphe kọru okfu.
19 Ọ bụ ẹge ono,
okpomọku;
mẹ ẹjo mkpọ-anwụ
emeje tẹ aka-mini ngazehu ono;
bụ ẹge ili anọduje alụko ndu ẹjo madzụ.
20 Aazahajẹ ẹphe jeye lẹ
nne, paru ẹpho-ime ẹphe.
Aagbakwoshije ẹphe l'ọ bụ
oshi; ẹhonwu egude ẹphe gbaa ajị.
21 Ụnwanyi, ẹ-ta atsụdu ime;
mẹ ndu ọphu ẹ-te nwedu nwa;
bẹ ẹphe egudeje akpa nri.
Ndu ọphu nji ẹphe ẹ-ta
nọhedu bẹ ẹphe ta aphụjeduru imiko.
22 Obenu lẹ Nchileke
egudeje ike iya lọ-phua
ndu nweru ike alọ-phu.
Ọoduje l'ẹphe vudowa;
obenu l'ẹphe ta amajẹdu ishi ndzụ ẹphe.
23 Nchileke ahajẹ ẹphe
t'ẹphe tụsaru ẹhu.
Obenu l'ẹnya iya
anọjekwaphu l'iphe,
ẹphe eme tekenteke.
24 Ndu ẹjo madzụ abajẹ gburugburu;
laa gburugburu.
Aarụje ẹphe ọru-ẹwu;
ẹphe anwụshihu;
l'ọ bụ akpe, e gburu egbugbu.
25 Ọ -bụru l'iphe mu ekfu
ta bụdu oswi-okfu;
nggu ekoshinu mu ẹge e shiru t'ọ bụ iya.”