27
1 Jobu ekfuru iphe, ookfu tụgburu; sụ:
2 Eshinu Nchileke nọo
ndzụ ẹge ọono iya-a;
mbụ onye ono, jịkaru
lẹ ya ta ahadụru iya enge ono; mbụ
Ọkaribe-Kakọta-Ike,
bụ iya meru tẹ ndzụ bụru mu agee-wa;
3 mbụ lẹ keshinu ọphu
Nchileke kwekwadurua
tẹ mu atụ ume;
4 bẹ to nwekwa lẹ mu
egude ọnu mu ọwaa kfua ẹjo okfu;
m'ọ bụ gude ire mu gbaa ẹregede.
5 Tẹ njọ gbakwa ẹgbudu.
Jeyekpo l'oge
nka-ezekuna nke mu;
b'ẹ to nwekwa ẹge ọo-dụ
tẹ mu kweta l'iphe,
unu ekfu bẹ unu ekfu l'oruberu iya;
ọphu mu 'ekwetakwa
l'o nweru ẹke o teru mu l'iphe ọwaa.
6 Mu evudokwaphu l'ẹke
mu vudo;
lẹ̀ mu bụ onye
doberu ẹka ndoo;
ọphu obu mu 'anmakwa mu ikpe
jeye ẹge mu a-nọbebe.
7 Iphe mu ekfu abụru t'ọ
dụkwa ndu ọhogu mu
ẹge ọ dụ ndu ẹjo madzụ.
Yọ dụkwaphu ndu nọru mu
l'ẹjo oshi ẹge ọ dụ ndu
ẹ te dobedu ẹka ndoo.
8 Mbụ; ?bụ ngụnu bẹ
onye ẹ-ta madu Nchileke
elekwadu ẹnya iya; teke Nchileke
natatsuaru iya ndzụ iya.
9 Iphe-ẹhuka -byaru egbe
onye ono; Nchileke;
?ọo-ngaru iya nchị.
10 Ọkaribe-Kakọta-Ike;
?ọo-dụje onye ọbu mma l'ẹnya tọo;
?t'o gbe akpọ-kuje
Nchileke tekenteke.
11 Unu gebe tẹ mu koshi
unu ẹge ike habe Nchileke;
mbụ kọjaaru unu ụzo kẹ
Ọkaribe-Kakọta-Ike akọja.
12 Unu phụkotawaru iphe ono l'onwunu.
?Nanụ ẹge ọ dụ;
bẹ unu ekfuhunu okfu,
ẹ te nwedu ishi ẹge-a?
13 Ọwaa bụ obunggo,
Nchileke ebuje ndu ẹjo madzụ;
mbụ òkè, gbaru onye ẹjo obu
l'ẹke Ọkaribe-Kakọta-Ike nọ:
14 Ụnwu iya a-za l'igwe;
obenu l'ẹphe a-lakọta l'ọgu.
Awa iya ta aphụdu iphe oye-l'ọnu.
15 Ndu ọphu wafụru nụ;
bụ mgbọnwu e-gbuge ẹphe;
ọphu unyomu ẹphe,
ẹphe haru l'ụlo-maa
ta aradu ẹkwa ẹphe.
16 E nweruru ike;
yọ kpaa okpoga;
kụa ya l'ikpo;
bya akpọshia uwe kụbe;
yọ kụru ikpo l'ọ bụ ẹja-ụra.
17 Obenu l'uwe bụ ndu
doberu ẹka-ndo e-mekochaa yee ya.
Yọ bụru ndu ẹ te medu
ẹjo iphe e-mekochaa
kee okpoga iya ono.
18 Ụlo, ọ kpụru dobe dụle-ẹ
l'ọ bụ ụgbu mkpakiri;
mbụ l'ọ dụjelephu l'ọ bụ ụlo-nche.
19 Ọozeje azẹe onye nweru iphe.
Ọbu l'ẹ tọo zẹhekwanu iya ọdo.
Ọ -bya amụha ẹnya;
b'ẹ tọ dụhedu iphe ono ọo-phụkwadu.
20 Ọtsu egvu egude iya
l'ọ bụ onye utso labudoru.
Oke phẹrephere abya
apaa ya l'ẹnyashi.
21 Phẹrephere, shi l'ụzo
ẹnyanwu-ahata a-pata iya pamihu;
a phụ-buhu iya.
Ọo-bya l'ufu iya bya apata iya;
gbaa ya mgbukuma.
22 Ẹ to gbe aphụduru iya imiko;
l'ẹke ọ lịkashi t'ọ gbalaaru iya.
23 Teke e megeeru;
phẹrephere ono akụa ẹka; tee ẹswa;
kẹ l'ọ chịwaru onye ono l'ufu iya.