31
1 “Mu kpebuhawaru iya l'ime obu mu
lẹ mu ta byadụ bya ele nwamgbọko ẹnya;
2 kẹle Nchileke, bu
Ọkaribe-Kakọta-Ike
ahụ̀je onye eme ẹge ono àhụ̀hù.
3 ?Tọ bụdu kpurupyata;
bẹ Nchileke doberu ndu ẹjo madzụ;
ụmuruku abụru kẹ ndu eme ẹji.
4 ?O nweru iphe, mu eme,
Nchileke ta amadụ.
T'o nweru ẹke, mu yeru
ọkpa, ẹ tọ madụ.
5 Ọ -bụru lẹ mu jejewaru
je eye ẹka l'iphe,
ẹ ta bụdu ire-lanụ;
ọ dụdu bụru lẹ mu
jejewaru je eye ọkpa l'ẹjo-ire;
6 tẹ Nchileke l'onwiya
gudewaru ọkpobe iphe,
oogudeje atụ iphe;
tụa mu.
Yọ phụ l'ẹ to nwedu ẹke mu yesweru ẹka.
7 Ọ -bụru lẹ mu ngejewaru
Nchileke ẹka l'ishi; shiswee ụzo;
ọ dụdu bụru lẹ mu
kwejewaru t'e nwuru
mu ye l'ome ẹjo iphe;
m'ọ bụ lẹ mu yejewaru ẹka l'iphe, dụ ẹji;
8 ọo ya bụ; t'ọ bụkwaru
ndu ọdo e-ri iphe mu kpataru l'okfu mu;
ndu ọphu mu kọru
akọko, nọkwadu l'alị
abụru efeshi bẹ ee-feshi iya.
9 Ọ -bụru l'o nweru nwanyi,
kpọjewaru mu mgbẹnya;
ọ -bụru lẹ mu jejewaru je
egeporu l'ọnu ụzo nyee nwoke ibe mu;
10 ọo ya bụ; tẹ nyee mu
bụkwaru onye e-mekochaa
ejeru nwoke ọdo ozi;
l'a-laru iya l'ụlo.
11 Kẹ l'ọo iphe, dụ ẹge ono
bụ iphe, bụ; mu -mee ya;
yọ bụru mu iphe-iphere;
bụru iphe ee-kpee mu ikpe iya.
12 Ọ bụ egbe iphe ono
abụjeru Abádọnu; mbụ ọku
alị-maa dzụ-gbua mu;
mbụ dzụa dzụa iphe,
mu kpataru l'okfu mu.
13 Ọ -bụru l'o -nweru ndu ozi mu;
onye ọphu byajẹru nụ
bya asụ mu l'o nweru
ẹke mu meru iya ẹji;
mu te eyeru iya ọnu ẹge, gbaru nụ;
14 ?bụ ngụnu bẹ mu
e-kfuru Nchileke teke
ọo-gbakushi mu iya?
?Bụ ngụnu; bẹ mu e-kfu
m'a sụ tẹ mu bya akọo iphe meru nụ.
15 ?Tọ bụdu Nchileke,
motaru mbẹdua ye
nne mu l'ẹpho;
bẹ motakwaruphu
ẹphebedua ye nne ẹphe l'ẹpho.
?Tọ bụdu onye lanụ ono
tụko ayi kpụa l'ẹpho nne ayi?
16 Ọ -bụru l'onye ụkpa
rọjeru mu iphe;
mu ta nụ iya ẹya;
ọ dụdu bụru lẹ mu
mejewaru nwanyi,
nji iya ẹ ta nọhedu;
ẹnya-mini eshia ya ẹnya;
17 ọ dụdu bụru lẹ mu
rijeru nri nkịnyi;
zahaa nwa-nwogbe;
18 obenu lẹ keshinu ọphu
mu bụ nwata;
bẹ mu shilephu heta
ụnwu ogbe ẹge nna eheje ụnwu iya.
Ọ kwaphu ẹge ono;
bẹ mu shi keshinu ọphu
a mụru mu l'ehe
ụnwanyi, nji ẹphe ẹ-ta nọhedu.
19 Ọ -bụru lẹ mu phụjeru
onye ẹ-ta mahẹdu ẹge
oo-me onwiya l'ẹke ọ gba ọtu;
ọ dụdu bụru onye ẹ-ta
dụdu ẹge ọ haru iya,
ẹ-te nwedu iphe oye l'ẹhu;
20 mu ta chẹ iya
iphe oye l'ẹhu;
shi ẹge ono mee t'o gude
obu iya tua mu ẹpha
lẹ mu gude ẹji atụru mu
meta ukpo gude gbochita ya oyi.
21 Ọ -bụru l'o nweru iphe,
mu halijewaru ẹka mee
onye nna iya ẹ-ta nọhedu;
okfu lẹ mu bụ onye
ọnu eru l'okfu l'ụlo-ikpe;
22 tẹ ẹka kwafụkwa mu;
t'ẹka shikwaa inwo rifu mu erifu;
23 kẹle mu atsụ Nchileke egvu
t'ẹ b'o me mu akadụru.
Ọdu-biribiri iya egudeje mu;
k'ọphu mu ta adụjedu
ike mee egbe iphe ono.
24 Ọ -bụru lẹ mu chịjeru
ụkfu kwẹe l'okpoga;
ọ dụdu bụru lẹ mu
kpọjeru obu ye lẹ mkpọla-ododo;
25 ọ -bụru lẹ mu gudejewa
k'eze iphe, mu nweru
kua onwomu ekuku;
mbụ ẹku, mu gude ẹka mu kpata;
26 ọ -bụru lẹ mu gudejewa
kẹ o-gbu-nwịi-nwịi
ẹnyanwu baaru iya ẹja;
ọ dụdu gude kẹ mma
ọnwa baaru iya ẹja;
27 ọ dụdu bụru lẹ mu
gudejewa obu mu;
m'ọ bu ẹka mu baaru iya ẹja l'edomi;
28 t'a gụkwaaru mu iya l'ẹjo iphe;
gude iya kpee mu ikpe;
kẹ l'iphe ọ bụ;
bụ lẹ mu ta bụhedu onye
egude ire iya ẹka l'ẹke
Nchileke ọphu bu l'imigwe nọ.
29 Ọ -bụru lẹ mu tejewaru ẹswa
kẹ l'onye ọhogu mu eje iphe-ẹhuka;
ọ dụdu bụru lẹ mu
gudejewa k'iphe-ẹhuka,
byaru iya nụ tụa okokooko;
30 mu te gudebukwaa ọnu
sụ t'iphe mee onye ọhogu mu;
l'ụdu kẹ mburọnu.
31 Ndu shi ejeru mu ozi maru
l'ẹ to nwedu onye
byajẹru nke mu,
ẹ te rijidu ẹpho.
32 Ẹ tọ dụbudua onye
shi eshishi, radụjeru lẹ gbororo;
kẹle mu shi eghebeje
ụlo mu ọnu;
tẹ ndu ije bata bya aradu.
33 Mu te mebua iphe,
dụ ẹji; kpamia ya ẹge
ndu ọdo akpamije;
m'ọ bụ woru njọ domia l'ime obu mu.
34 Mu te egudebua ọtsu
egvu iphe ndiphe e-kfu;
teke ẹphe nụru iphe,
mu meru; kpụrube ọnu;
m'ọ bụ je eworu
onwomu domia l'ime ụlo.
35 Ha! Ndẹge mu
nwekwanuru onye
e-ye ọnu l'iphe-a,
mu ekfu-a!
Mu dookwaru edori
ẹhu mu; byia ẹka l'ẹkwo.
Tẹ Ọkaribe-Kakọta-Ike
yewaru mu rụ ọnu.
Onye ono, ebo mu
ibo ono ewota ibo ono,
oobo mu ono dee edede l'ẹkwo dobe;
36 mẹ mu ewojeleru iya phụ
dẹe l'ukuvu;
mbụ kpuru iya l'ọ bụ onye
kpu okpu-eze;
37 mẹ mu eshikwanu ishi lanụ
dooru iya edo ẹhu mu nanu nanụ;
mẹ mu abyalẹphu bya
evudo iya l'ifu l'ọ bụ nwatibe eze.
38 Ọ -bụru l'alị mu
echi mkpu ekpu mu;
mgbawalị, nọ iya nụ l'ara ẹkwa;
39 ọ -bụru lẹ mu jịkaru
lẹ mu ta akfụdu ndu jeru mu ozi ụgwo;
ẹphe agụru aphụ lashia;
40 t'ọ bụkwaru ẹgbara
a-kfụ l'alị ono l'ọzori witu;
ẹswa mmanu efushia ya ọzori balị.”
Ọ gvụ Jobu l'ọnu.