9
Ọnu, Jobu eye
1 Tọ dụ iya bụ; Jobu abya eyee ọnu sụ:
2 “Mu makwarụa l'iphe iikfu bụ oswi-okfu.
Ọbu; ?nanụ ẹge
madzụ mmanu e-me bụru
onye doberu ẹka ndoo
l'ẹke Nchileke nọ.
3 Onye ọ dụ tẹ yẹle Nchileke
tụa ya bẹ ọo-jịkwa
ụnukurunu ajị;
ọphu ọ zaghedu m'ọo nanụ.
4 Nchileke bụ mmamiphe kpụ;
bụru iya bụ agburu-ẹhu kpụ.
?Bụ onye kwefujeru iya ike;
e mekochaa;
yọ dụru iya lẹ mma?
5 Oonwuribeje ugvu; ugvu ta
ama l'o nwuruberu iya.
Oogudeje ẹhu-eghughu;
kpọo ya ishi-akụ.
6 Mgboko bẹ ọonma-woje
anmawo; nmaa itso,
e gude gvube iya yikayika.
7 Ọotujeru ẹnyanwu ekemu;
ẹnyanwu echibuhu;
bụru iya ebuchije
mkpọ-kpodo;
yọ haa echichi.
8 Ọ bụ yẹbedua nwẹnkinyi iya
sụsaru akpamigwe;
bụru iya bụ onye ejeje ije
l'eli akpara-mini,
atụ l'echi eze ẹnyimu.
9 Ọ bụ iya meru mkpọ-kpodo,
bụ Beya; mẹ Oriyọnu;
mẹ Puleyadesu;
mẹwaru oke mkpọ-kpodo,
nọtsua l'ụzo ọhuda.
10 Oomeje iphe, dụ biribiri,
ẹ-te nwedu ẹtu;
mẹ iphe-ọphulenya,
ẹ ta agụtadu agụta.
11 Ọobyaje bya esweta mu;
mu ta aphụ iya.
Yọ byakwa bya eshia iku,
ẹke mu nọ; mu ta ama.
12 Ọ -nata madzụ iphe;
?bụ onye a-sụ iya t'ẹ b'o meshi?
?Bụ onye ha k'ọji iya
iphe oome?
13 Ẹhu -wata oghu Nchileke
eghughu b'ẹ t'o mejekwa agha ẹnya;
k'ọphu bụ lẹ ndu sọja
Réhabu byishiru iya ikpere.
14 ?Nanụ ẹge mu e-shi asa iya okfu?
?Mu nweru ọnu, mu e-gude
tẹ mu l'iya wata ntụtu-ẹgo?
15 Ọ bụ oswi-okfu l'ẹ tọ dụdu
iphe, mu kpataru;
ọle mu te ejekwanu iya ọgba okfu.
Mu a-nọdunuphu arọ
onye ono, bụ onye ikpe mu ono
t'ọ phụaru mu imiko.
16 Mu -kua ya oku; yọ bya;
bẹ mu ta rịkwa l'oo-yeru mu ọnu.
17 Ọ bụ oke phẹrephere;
bẹ oo-gude bya egwee mu rakaraka;
mee t'ọnya, tụkoru mu ẹhu dzuru ka nshinu;
l'ẹ b'ọ dụ iphe, mu kpataru.
18 O gude iphe-ọtsu-l'ẹhu l'atsụpya mu;
to kwe tẹ mu tụfu ume.
19 Ọ -bụru k'ọkpehu;
bụnu yẹbedua bụ ike kpụ.
Ọ -bụru k'ikpe;
?bụ onye e-kukwanu iya ikpe?
20 Ọ -bụru l'ẹ t'ọ dụdu iphe mu
meru bẹ ọnu mu
kpataakwaru kpube mu.
Ọ -bụruru nụ l'iswi dụ mu mma;
bẹ ọnu mu a-nma lẹ mu iya-a.
21 A makwaru-a l'ẹ t'ọ dụdu
iphe, mu kpataru;
ọle mu ta akpahẹdu ishi;
mbụ lẹ ndzụ gbe dụwa mu nụ ashị.
22 Mbụ l'ọ chịko bụru iphe lanụ.
Ọ bụ iya kparu iphe mu sụru:
‘Lẹ Nchileke emebyije ndu
ẹ-ta dụdu iphe, ẹphe meru;
mẹ ndu bụ ndu ikpe nmaru.’
23 Mgbọnwu -gbakwoshilahaa
ndu ẹ-ta dụdu iphe, ẹphe
meru; meji atọfulahaa ẹphe;
bụle-ẹ ọchi; bẹ Nchileke anọduje achị.
24 Mgboko-a -laa ndu
akirishi l'ẹka;
yo kwechishia ndu ikpe ẹnya.
Ọ bụ; ọ -bụdu iya;
?bụhunu onye e-me iya.
25 ?Mu a-nọ-bekwadu ịno-be agha.
Ọ bụ; ?mu gbe ele ẹnya
l'o nweru mbọku,
ẹhu a-tsọ mu nwẹnaa.
26 Ndzụ, mu agba
swacha-swacha l'ọ bụ ụgbo,
maru ọgba ọso.
Oozi phaaphaa l'ọ bụ ivu
abya ọdzuta nwọku.
27 Mu -sụ tẹ mu haa ọgu aphụ;
bẹ ifu a-gbanwe mu;
mu awata ọmu ọnu-ọchi.
28 Obenu l'iphe-ẹhuka, mu eje;
bẹ mu atsụkwadu-a egvu;
kẹle mu maru l'ẹ tịi kwedu
l'ẹ tọ dụdu iphe, mu kpataru.
29 Keshinu ikpe nmawaru mu;
?bụhunu ole bẹ mu
alịkashiru onwomu?
30 Ẹ to nwekwa mẹ mu gude
ncha saa onwomu;
dụ l'ọ bụ eberugo;
bya egude ncha kwọo ẹka;
yọ ma mma;
31 bẹ ịi-patalẹkwa mu-a chee
l'iduma, echi bụruburu;
k'ọphu bụ l'uwe, mu yeru l'ẹhu;
bẹ mu a-dụ ashị.
32 Nchileke ta bụdunu madzụ
ẹge-a, mu bụ-a;
mẹ mu agbakwanua ya
okfu; mẹ mu l'iya
edogbabekwanu iya l'ụlo ikpe.
33 Ọphu ọ dụkwanu
onye ogbo, nọnu,
ge egude ayi ẹka;
gbokahu ayi;
34 mbụ onye a-nafụ Nchileke
ẹchachi ono, ọ nụberu mu l'ẹhu ono;
k'ọphu ọo-ha mu oye egvu.
35 Teke ono; mu ekfukwanua
ẹge ọnu ha mu;
mu ta atsụhe iya egvu.
Obenu l'ẹge ọ dụ nta-a;
bẹ ike ta adụhedu mu k'ekfukfu iya.”