10
Nchileke yẹle nte
1 Unu nụkwaa iphe Ojejoje ekfu anụ unubẹ ndu ọnu-ụlo Ízurẹlu.
2 Ọwaa iphe Ojejoje ekfu:
“Unu ba amụkwa iphe ndu ọhodo eme.
Ọphu tẹ iphe-ọhubama,
emeshi l'akpamigwe be eyekwa unu egvu;
A makwaru-a l'egbe iphe
ono eyekwaa ndu ọhodo ono egvu;
3 kẹ l'ome-l'alị ndu ono bụ 'ọ-ga-lẹ-mkpa.
Ẹphe egbutaje oshi l'ọswa;
ndu eme nka abya egude
ayọo ẹphe pyịa ya.
4 Ẹphe abya egude
mkpọla-ọcha mẹ
kẹ ododo gude mee ya nka.
Ẹphe abya egude ọngu
yẹle nturu kpọbe iya
t'ẹ b'ọ mịnga amịnga.
5 Nte ẹphe ono dụ l'ọ bụ
nwanggiri-utobo,
e keberu lẹ mgbo ugbongu;
mbụ l'ẹ too kfudu okfu.
Yọ bụru apapa bẹ aapajẹ iya;
kẹ l'ẹ too jedu ije.
Unu ba tsụjekwa iya egvu;
kẹ l'ẹ too nwekwa iphe oomeje;
ọphu ọ dụkwa iphe dụ mma, oomeje.”
6 Ẹ tọ dụkwa onye dụ l'ọ bụ nggụbe Ojejoje.
Ị paru ẹka; ẹpha ngu aha nshinu.
7 ?Bụ onye bụ onye ono,
ẹ-ta atsụdu ngu egvu;
nggụbe eze, achị ọhamoha ono?
Ono bụkwa iphe ruberu ngu nụ.
L'iphe bụ ndu mmamiphe,
nọkota l'ọhamoha; mẹ iphe bụ
alị-eze ẹphe l'ọ ha; b'ẹ ta
dụkwa onye dụ l'ọ bụ nggu.
8 Ẹphe bụkota ndu ẹ-te enwedu
egomunggo; bya abụru ndu eswe.
Iphe ezi ẹphe iphe bụ
ntẹkpe, a pyịru l'oshi,
ẹ-te nwedu mkpa ọoga.
9 Ọ bụ mkpọla-ọcha, e tsuru l'ọngu;
b'e jeru Tashishi wota iya gude bya;
yẹle mkpọla-ododo,
e jeru je ewota lẹ Ufazu,
bụtsua iphe ndu eme nka
ẹphe lẹ ndu akpụ ụzu kpụru.
Nte ono b'a chịtaru uwe,
eke urukpu-urukpu;
wota ọphu eke uswuswe
uswuswe woru yee.
Iphe ono abụkotaru iphe
ndu maru ome nka meru dobe.
10 Obenu lẹ Ojejoje bụ iya bụ ọkpobe Nchileke.
Ọ bụ iya bụ Nchileke, nọ ndzụ;
bụru iya bụ Eze, a-nọ nụ gbururu jeyewaru.
Teke ẹhu eghu iya eghughu;
bẹ eliphe kpamukpamu anmahụje jijiji;
ọphu ndu ọhodo ta adụdu ike ọta nshi;
nata oke ẹhu-eghughu iya.
11 Ọwaa iphe ii-kfuru ẹphe ndọ-ọ: Nte, ẹ-ta bụdu l'ọo ẹphe meru igwe; t'ọ bụ ẹphe meru eliphe-a bẹ e-mekochakwa laa l'iyi lẹ mgboko-a; lakwaaphu l'iyi l'imigwe.
12 Ọo Nchileke bẹ gude ike ẹka iya mee eliphe.
Yọ bụru iya gude
mmamiphe iya tụa ọkpa mgboko-a;
bụru iya gude
iphe-odo-ẹnya iya gbasaa akpamigwe.
13 Ọobuje; o -dee edede l'igwe;
mini, nọ l'igwe araa ọra.
Oomeje t'urukpu shi l'ẹke
mgboko jeberu wata alụfuta.
Ọotuje egbe-igwe teke mini achị;
bya abụru l'ọba iya;
bẹ ooshije ezi phẹrephere.
14 Egomunggo nashịhuru onyemonye;
ọphu 'onwedu onye kwaru ẹnya.
Iphe bụ ndu akpụ ụzu
mkpọla-ododo l'ẹphe ha
bẹ iphere ọgvu iya gudekwaru.
Ntẹkpe, ẹphe pyịri atụko bụru ụgho;
kẹ l'ẹ-to nwedu ọphu atụ ume l'onwiya.
15 Iphe ono ta adụdu uru,
ọ baru; ọ bụ iphe e gude agba mgbọnu.
O -rua l'oge ikpe iya;
bẹ ntẹkpe ono a-la l'iyi.
16 Obenu l'onye ono,
bụ òkè-iphe eri Jékọpu ono;
bẹ ta bụdu ẹge ono b'ọ dụ;
kẹ l'ọo ya bụ onye meru
iphemiphe ọbule dobe;
metsua bya emee ndu Ízurẹlu;
mbụ ọkpa-ikfu ono,
bụ òkè-iphe iya ono.
Onye ono bẹ ẹpha iya
bụ Ojejoje; bya abụru
Ọkaribe-Kakọta-Ike.
Mgbọnwu, a-bya nụ
17 Unu kwakọbekwa iphe unu; lụfu l'alị-a; unubẹ ndu ono, ndu ọhogu unu nọ-pheru mgburumgburu ono;
18 kẹ l'ọwaa kwa iphe Ojejoje ekfu: Lẹ nta-a; bẹ ya a-gba ndu bu l'alị-a; gbafụ ẹphe mgba lanụ. Ya emee ẹphe mkpawere; k'ọphu aa-kpụ ẹphe lẹ ndzụ.
19 Aphụ tsọkwaru mu;
kẹ l'e mekaru mu iphe!
Ọnya, aba mu nụ abụru 'emeta emeta!
Ọle; iphe mu ekfujeru
onwomu bụ l'ọ bụwa
iphe-ememe, nọ swiru mu nụ.
Mu a-taru iya nshi.
20 Ụlo-ẹ́kwà mu b'e mebyishiakwaru.
Eri iya b'a tụkookwaru gbabushia.
Ụnwu mu shiakwa mu l'ẹka gbakashịhu;
ọphu mu l'ẹphe anọhedu.
Ẹ to nwehedu onye ọphu phọduru nụ
kẹ t'ọ kpọberu mu ụlo-ẹ́kwà ọbu ọdo;
m'ọ kpọonu t'ọ tụaru mu nwamkpu.
21 Ndu eche ayi l'ọ bụ atụru;
bẹ ọriri nahụru;
ọphu ẹphe 'akpatajẹdu Ojejoje ishi.
Yọ bụru iya meru;
iphe te kwejeheru ẹphe;
a chịa atụru ẹphe nanụ nanụ.
22 Unu lekwa! Nzi abyaakwa.
Oke utsu, e-shi l'ụzo isheli; l'ada l'abya.
Oo-me alị Júda;
yọ daburu ochobo;
bụru ẹke nkụta-ọswa a-bya akwaa ufu.
Jeremáya ekfu anụ Nchileke
23 Nggụbe Ojejoje;
mu makwaru-a lẹ ndzụ
madzụ ta bụdu nk'iya;
l'ẹ tọ bụdu madzụ atụru iya
ọnu ẹke ọo-dzọ ọkpa.
24 Byiko Ojejoje; baaru mu rụ mba!
Ọlokwa t'i gude ikpe, dụ maa baaru mu iya;
be egudekwa ẹhu-eghughu baaru mu iya;
a nọnyakwaa; nggu emee mu;
t'ẹ b'o nwehe iphe mu a-bụ.
25 Tụ-koshi ọhamoha ono
oke ẹhu-eghughu ngu;
mbụ ndu ono,
ẹ-te ekwedu nke ngu ono.
Tụ-koshi iya ndu ono,
ẹ-te ekujedu ẹpha ngu ono!
Kẹ l'ẹphe riwaru eri Jékọpu ripyaa ya.
Ẹphe rigbuwaru iya kpakparakpamu;
bya emebyishia alị iya l'ọ ha.